واحد...اتنين..

.

.

.

الدم العربي فيـــــــــــــن

مرسوم من البلاط الملكي

انا بحذرك

وبنبهك

!!!وباهددك

لو مكنتش عارف ابعاد اللي بتعمله

هتخسرني للأبد

!!! انتهي البيان

وكل واحد مننا يركب حصان خياله..درجن درجن درجن درجن

مش عايزة حد يتخض من عنوان البوست..عاااااادي جدا

واحده وبتمتحن..مفيش اي داعي للاندهاش

احلا حاجه ف الواحد لما بيركب حصان خياله ف وقت ماهو مش فاضي اصلا يكون عنده خيال ولا يركب حصان

ماهو اصل الابداع مابيطلعش الا ف ايام الشده

ومااكثرها ف الامتحانات

وتلاقي ورق المذاكره مليان خواطر وقصايد ورسومات لو لزم الامر

طبعا بغض النظر عن الرسومات والاستركشرات المقرره ف المواد اصلا..دي طبعا العبقريه بتتألق فيها وف النهايه

بيطلع مركب واخد صفحه بحالها

ولو الصفحه ماكفتش ممكن اكمل رسم ع الترابيزة لو امكن بس ياريت محدش يعرف ماما

:)

ايام الامتحانت لا شك ف انها فترات غلسه

لكن بحس اني بكتشف فيها نفسي من جديد

يمكن لان من صعوبتها بتخلي مخ الواحد طالع ع الرابع

بيشوف الحياه بمنظار واحد قرب يتجنن

الحياه ساعتها بتبقي باينه حلوة اوي ومبهره ومش عارفين نطولها

علي عكس شكلها باقي السنه

او يمكن لانه بيسرق ساعه قبل النوم يفكر فيها ف كل الحاجات التافهه والمهمه اللي مش بتفرض نفسها عليه الا ف الامتحانات

او يمكن لانه بيحس انه مهم وكل البيت شايله علي دماغه عشان بيمتحن

محدش عايزة يتعب عشان بيمتحن

محدش عايز يزعله عشان بيمتحن

يطلب اي حاجه عايزها تتنفذ ف ساعتها عشان ايييه؟؟

برافو

برضه عيشه حلوة

وملوكي

بس لو مايبقاش فيها صداع..وقله نوم..والام الفقرات الفظييييييييييييييعه اللي انا حاساها دلوقتي

كنت اتمني كل السنه تبقي امتحان

واتمني ليه

طب ماهي حياتنا كلها امتحان

سبحان الله

وانا اللي زعلانه عشان بمتحن ف الكليه بقالي شهر

طلعت عايشه ف لجنه امتحانات

طب ياتري تقديري هيطلع ايه

سؤال نط ف بالي فجأة

ياتري كل واحد مننا فكر تقديره ايه ف الامتحان الفاينال بتاع الدنيا

يارب نكون من اصحاب الامتياز ف الدنيا والاخرة وخصوصا الاخره

؟؟

انا حاسه اني بدات افصل شحن ودا شئ كويس جدا بس للاسف خايفه المرحله الجايه اشوف هلاوس والا قي المركبات اللي ف الورق طلعت تتكلم معايا وبصراحه انا مبحبهاش ومخصامها ومش عايزة اكلمها تاني لانها اخر مره كانت بتهزر هزار تقيل

هقوم الم مجزرة ورق الفايتو الي مغطي الارض

واكمل اخر تلات صفحات ف المذكرة اللي مش عايزة تخلص

وان افتكرت منها حاجه بكره ابقو قابلوني :)

واشد اللحاف

وانام عشان اصحي

واصحي عشان اذاكر

واذاكر عشان انجح

وانجح عشان انام

وانام عشان.....

تخيل؟

.

.

.

أنا بقي حسيت دا معاك

!!!!!

الله اكبر الله اكبر ولله الحمد

كل عام وانتم بالف خير

وعيد مبارك علي الجميع

وربنا يتقبل من كل اللي تركو الاهل والاحبه وذهبوا لقضاء مناسك الحج

يابختهم

سامعه حد بيقول بطلي قر بقي مانتي لسه راجعه م العمره ماكملتيش شهرين

بس والله نفسي اروح تاني

يارب يارب يارب ماتحرمنيش وماتحرمش مسلم ابدا من زياره بيتك الحرام مرة تانيه وتالته ومية

ويارب يارب يارب اطلع احج مع اهلي

كل عام وانتم بخير

وادعولي بقي عشان بمتحن

اكمنك..دوبت وحبيتها

قلبَك بقي انتيـــــــــــــــــكة

ف بيتها

افكار مسافرة علي ورق المذاكرة

عارف

نفسي ازعل منك

لكن للاسف مش بلاقي فرصه لكدة

بس اوعدك لو لاقيتها

هستغلها

واطير لوحدي من جديد

..

..

كان نفسي اسمع رد منتظراه.

.بس للاسف محصلش فرصة

يمكن لان الانتظار اصبح قدري

ويمكن لان ....

مش عارفة بصراحة احتمال تاني ..

..

..

سؤال واحد هموووووت واعرف اجابته..

اشمعني انا؟؟؟

..

..

الكلام دا حقيقي ولا بجد

حقيقي؟؟

اصلي افتكرته بجد

..

..

لعلمك

انا مش بيتهيألي

ولو حد فهم غلط

يبقي اكيد لان في حد عبر غلط

..

..

بالمناسبة

انا قررت انسي

عارفة انه قرار باخده كتير

بس يمكن تصدف مره مارجعش فيه

صفحة اخيرة..وعطر لا يمحي

عندما اكتشفت ان عالمي امتلأ بملفات لم اتمني ان اراها تتكدس يوما فوق مكتبي

طويت كل الصفحات الصماء

بعثرتها ورائي

وبكبرياء نظرت اليها تتطاير

هنا وهناك

تحتل مقاعد استحقتها

في خزائن الماضي

طويت كل الصفحات بلا امل في العودة اليها

او رغبه في محاولة السكن بين اسطرها

ولا ترتيب كلماتها التي تناثرت هنا وهناك ..لانني لا اؤمن بجدوي ذلك

لم تتبقَ الا صفحة واحدة

بلونها الابيض الصريح جدا

مثلي تماما عندما نكون معا

لم تحكِ لها اسرارك

ولم تكتب الحروف الاولي من اسمينا في احد اركانها

لا شئ سوي ذلك العطر الساكن في احضانها

الذي يذكرني بعينيك

ودفئك

وابتسامتك

هي اشياء غير قابلة للمحو

بقيت صفحة واحدة

اراك فيها

كلما افتقدتك

كل يوم

كل ساعة

تحتضن عيناي اسطرها

علها تراك فيها

طويت كل الصفحات

فقل لي من فضلك

كيف اطوي صفحة لازالت تحمل إمضاء عطرك

!!! مللت انتظارك

نسيتك او تناسيتك

لم تعد المسميات تعنيني

المهم انني اختفيت من عالمك

واختفيت انت من عالمي بلا اي رتوش او مقدمات ممله

في صمت ورقي ابتعدت عن مداراتك

لانني ادركت في لحظة مصيرية

انك لم ولن تكون

ابدا فارسي

لا تقرأ تلك القصيدة التي كتبتها من اجلك فقط

وزينت كلماتها كي تراها وحدك

فليس لها معني الان سوي انني كنت حمقاء

مزقها او مر جوارها مر الكرام

حتي وان قرأتها فلن تفهم حرفا منها

لانك لم ولن تستوعب يوما ما نصف احساسي بك

الذي نجحت باعجوبه في وأده

كلفني الامر الكثير من الشجاعة

والبكاء!!

علي اشياء شتي تعلمت اخيرا ان انساها

ولا انتظرها

ولا انتظرك

الي الابد

رسالة بنت مصرية..الي السيد رئيس الجمهورية

رسالة بنت مصرية..الي السيد رئيس الجمهورية

سيدي الرئيس

بلاش بابا حسني

لاني لما بحتاج ابويا ف حاجه مش هبعتله جواب

برضه بلاش عمو حسني

لاني ع الاقل بشوف عمي ف المناسبات ف بيت العيله

خلينا رسمي احسن

هكلمك ك_مجرد_مواطنه عندها مشكلة

انا ليا مظلمه

رفعتها لله سبحانه وتعالي

بس علشان ماتقولش ماكنتش عارف وربنا بيحاسبك عليهاهقولهالك بصفتك ولي الامر

مش انت ولي امري برضه؟؟

طيب انا هشتكيلك واستحملني

انا مش بكتب الجواب علشان اشتكي من الغلاء.

.ولا من اسعار السلع اللي وصلت للسما

ولا اسعار البنزين العاليه مع ان العالم كله البنزين فيه نزل النص

مش هتكلم عن رغيف العيش اللي محدش بيلاقيه

حتي اللي بيلاقيه بياكله بزلطه بمساميره ب سلطاته بابا غنوجه وساكت..برضه الحمد لله طب
كويس انه لاقاه

مش هسألك خصخصتو البلد ليه ياريس..ولا فلوس الخصخصه راحت فين

ولا ليه شركات من القطاع العام اتباع بملاليم في مزادات مرسومه ومتخطط لها ومتفصله علي ناس
معينه بيبعوها بعد كده بملياراات

ولا هستفسر منك عن فكره بيع القطاع العام كله وتوزيع اسهمه علي المواطنين..وطبعا مش هدوشك تاني بموضوع اجريوم ولا بحكايه اخوه موبكو اللي بشوف دخانه من
بيتنا..لانك اكيد عارف الحكايه..وطالما ساكت يبقي انت ادري بمصلحتنا دا غير ان الشركه
وعدت انها هتبني مستشفي ف المنطقه عشان تعالج اللي هيتسممو..حد لاقي؟؟

مش هسألك عن قانون المرورولا عن المثلث ابو 40 جنيه ولا عن وجهه النظر العبقريه اللي خليتهم يقررو ابعادة وحجمه

ولا عن جدوي شنطه الاسعاف اذا كان اغلبنا مابيعرفش ازاي يعمل اسعافات اوليه اصلا

ومش متدايقه من الضرايب مع انها قطمة وسطنا

ولا فواتير التليفون والنور والميه

ولا هلومك علي حادثه الدويقه الله يرحمهم جميعا

ولا هسألك مين اللي حرق مجلس الشعب ومصلحته ايه

ومين غرق عبارة السلام

ومين هرب ممدوح اسماعيل

وفين الضحايا وايه سر اختفائهم؟ومين قتل سوزان تميم

ولا مين ادانا الصفر ف كاس العالم

مش هتقل عليك واسألك جمال هيورث الحكم ولا لأ عشان عارفه انه بياخد علي خاطره لما حد
بينكشه ويساله السؤال ده

ولا ليه هو امين سياسات الحزب الوطني

ولا ليه وزير الثقافه هو نفسه وزير الثقافه

مع ان الثقافه ف البلد من عهد سيادته ف النازل

ولا ليه ماستقالش بعد حريق المسرح القومي

ولا ليه ماقبلتش استقالته لما قدمها ايام حريق مسرح بني سويف

ولاليه وزير الماليه هو هو

وحبيب العادلي بيعمل فينا كده ليه

وليه المناهج بتاعتنا كده؟وليه بنستورد قمح..وبنزرع كانتالوب؟

وامتي هنفرح بتوشكي؟وليه اليهود لسه ف سينا وليه انتو مطبعين مع اسرائيل؟مع ان محدش فينا طايق ريحة اليهود

وليه مش بتفتحو معبر رفح؟

وطبعا مش هقوللك ليه فيه ناس لحد دلوقتي بتبات جعانه..وبتصحي جعانه

وبتكمل يومها جعانه

ولا كام طفل ف الشتا نامو بردنين وانت دفيان ف سريرك

ولا كام شاب عاطل

ولا كام اب مش قادر يعول اسرته بمرتبه اللي مايكفيش عيش حاف دا لو لقي العيش طبعا

ولا هقوللك ان الاطفال بيموتو ف المدارس من الضرب

ولو ماماتوش ف الضرب هيموتو ف المستشفيات من غاز النيتروز المسمم

ولو ماماتوش من الاتنين هيموتو ف حادثه قطر او يقعو ف بلاعه

او يخبطهم ابن مسئول او يخطفهم تاجر اعضاء ..بعد كده الحكومه تقول عليه انه مريض نفسي

ولا ليه يوسف شاهين اتعالج علي نفقه الدولة وناس تانيه احق بتموت من غير مالدوله تحس بيهم

انا مش بعتالك علشان دول ياريس

انا اللي مدايقني ابسط من كده بكتيرمع انه تاعبني اوي

انا خايفه

مبقيتش بعرف اعيش وانا مطمنه

مبقيتش بعرف امشي ف الشارع

لا بالليل ..ولا بالنهار

بقيت اخاف انزل من بيتنا اروح الكليها

و ازور واحده صحبتي

من اللي بشوفه...خايفه..

بمشي ف الشارع بتلفت حواليا

ابسط حقوقي كمواطنه اني اكون امنه علي نفسي وعرضي ومالي واهلي

وانا فقدت احساسي بالامان من الاربع جهات دول

مش عارفه وانا ماشيه ياتري حد هيسمعني كلام يخدش حيائي؟؟..ولا يقوم بتصرف يخدش حيائي؟؟ ولا يسرق
شنطتي..ولا يخطفني انا شخصيا؟؟؟

انا بقيت اخاف امشي ف شوارع مصر ياريس من اللي بشوفه

بقيت احبس نفسي ف البيت وبنزل للضروره

تخيل طالبه جامعيه تخاف تنزل كليتها؟بخاف ليه؟بخاف لما بنزل من العيون اللي باصه عليا واللي مش خايفه من ربنا ولا من الناس بخاف من ايدين الشباب اللي مش بتلاقي اي مانع انها تتمد عليا وعلي غيري من البنات...شيئ
زاد وبقي مثير للاشمئزاز والرعب من الايام الجايه

بخاف لما بشوف نظره اللمبالاه في عيون الماره ولسان حالهم بيقول خلونا ف حالنا دا شكله واد
صايع..سيبها تولع

بخاف لو فكرت اخد خطوة جريئه واعمل محضر لاي كلب دايقني ف الشارع

يفتري عليا بحاجه انا بريئه منها ومحدش وقتها هيدافع عني وهتعامل وقتها زيي زيه..بالعكس انا
اللي هكون ملامةا

او الظباط نفسهم يعملو معايا نفس اللي عمله وانا ف القسم زي ماحصل لكتير

بخاف من ظباط الامن المركزي

والشرطه

بخاف من لجان المرور..لان ممكن لاي ظابط يوقفني حسب مزاجه

بخاف لما راكبه تاكسي لوحدي او مع غيري..او راكبه ميكروباس وسط 15 بني ادم

بخاف لما ببقي راكبه مواصله ونعدي علي حمله

ويقرر الظابط انه يلم تلات اربع شباب وينزلهم وياخدهم بدون اي جنايه او شبهه لمجرد اننا نعيش
تحت ظل قانون الطوارئ

بخاف لاني عارفه ان لو ظابط قرر يعمل كده معايا..محدش هيقف ف وشه

بخاف علي ماما و بابا لما بيسافرو لوحدهم من قطاع الطرق اللي انتشرو في البلدب

خاف ظابط يفتري علي حد من اهلي ويقبض عليه من غير اي سبب(واظن بتحصل كتير)بخاف لما بسافر بره مصر ..اتجلد!! او اتظلم وساعتها هبقي زي اللي ف غيابات الجب محدش هيعرف عنه حاجه

بخاف من العصابات اللي بيخطفو البنات ف عز الضهر ومحدش بتحرك ينجدهم

زمان كانو بيقولو البنت اللي بتخاف علي نفسها ماتمشيش ف الشارع بعد 8 بالليل

طيب ايه جاب 8 بالليل ل 8 الصبح ياريس؟

وليه نفس الوشوش المخيفه اللي قالولنا انها بتظهر بعد 8 بالليل هي نفسها نفس الوشوش اللي بقت
تظهر 8 او 9 و10 و12 الضهر؟ وف كل مكان

ليه كل الناس بقوا ف نظري مشبوهين

ليه كلهم ف نظري بقو حرامية

ليه كلهم ف نظري بقو ظلمة

طب هو انا اتجننت؟؟

ولا دا حقيقي
يمكن اللي يقرا كلامي يكون شايفه حاجه بسيطه او ماتجيش حاجه جمب المصايب اللي عايشينها او
انا مضخمه المسالة ويقول مين العبيطه دي

يمكن اكون كده فعلا

بس

والله والله والله

انا خايفة

خايفة ياناس

خايفة يابشر

خايفة ياريس

وربنا هيسألك علي خوفي وروعي يوم القيامة

صحيح يمكن هيسألك عن حاجات تانيه كتير غير دي

بس انا ساعتها لو سامحت عن كل حاجه

مش هسامح ف دي

اخر مهرب

اتعلمت الملم اسمك

من فوق ورقي

واخفيه جوا ادراج المكتب

وكل مافكر

اكتب احساسي المتخبي

برجع اشطّب

واكره حيرتي

..وغصبن عني مابيني وبيني

احبك اكتر

وانكر كل مشاعري قصادك

ولما بتيجي عنيا ف عينك

منهم بهرب

وابعد لما اشوفك جمبي

مانتاش جمبي

أصل وجودك _بالنسبالي_زي غيابك

نفس الجرح

ويمكن اصعب

حاجه جت ف بالي اكتبها لما قريت بوست عند الجميله تي ووتر

قلت مابدهاش بما اني ماكتبتش قصايد من فتره فرصه انزل حاجه جديده ف المدونه

!!هلاوس

عادي؟؟؟..لألأ

مش عادي

معلش تخريفات المذاكرة بتعمل اكتر من كده خاصه لما بتبقي مصحوبه بامتحانات و شيتات ونقص حاااااد ف النوم

وهنيالك يافاعل الخير والثواب

لأنك هنا

اليك

يامن ابحث عن تعريف يلائمه من بين المصطلحات

امامي انت ولكنني لازلت افتش عنك

اكتشفك

اذيب علامات الاستفهام المحيطة بك

اكرهها جدا

لكنني..ببساطه شديدة.. احبك

لذلك لا اقسو عليك اكثر من قسوة ام حنون علي طفلها

ولو أنك علي طول الخط تشعرني انني انا طفلتك

وانك مسئول عني مسئوليه تفوق تصوري

التمس لك الاعذار مهما استحالت

فأنت وان كنت لا تدري

لم تترك لي خيارا سوي حبك

انت وانت فقط

اتعلق بك اكثر كلما اقتربت...او ابتعدت

لم يجعلني غيابك انسي او اتناسي

انك علي طول الخط كنت الافضل

احبك لانك تختلف

احبك لانني منذ لحظة لقاءنا الاولي

رأيتني في المستقبل معك

تحتضن كفي بين راحتيك

وتبتسم ابتسامتك الحبيبه

وتقطف الكلمات كي تتوجني بها

اميرة قلبك الاولي والاخيرة

احبك لانك..

لا

دعنا من التفسيرات المنطقية

فمهما اجتهدت في صياغتها

فلن تستطيع التعبير عن نصف الحقيقة

كلمتان اخيرتان

شكرا لك

حتي وان كنت لا تعرف شيئا عن هذياني هذا

او كنت لا تهتم كثيرا به في الواقع

فقط اشكرك من اعماق قلبي

لأنك هنا

اجازة

امبارح صحيت من النوم..مزاجي وحش..شيئ عادي اتعودت عليه من فترة وكنت متأقلمة معاه

لحد ماقررت فجأة اني زهقت من كده

سألت نفسي

حد مزعلك يابنتي

لأ

طب حد قاللك كلمة تدايقك

برضه لأ

طب انتي عايزة ايه

.....

بس كده؟؟..كل النكد اللي انتي معيشاني فيه بقالك شهرين تلاته ده بسبب كده..وماصرحتينيش م الاول ليه كنت قلتلك

طب ودي حاجه اصلا تستاهل انها تدايق..فكري كده وانتي احكمي..بالعكس دي المفروض تخليكي متفائله..ولو ماخلتكيش كده ع الاقل ماتزعلكيش..مشكلتلك انك دايما بتدي الامور حجم اكبر من حجمها الطبيعي

تصدقي فعلا..

طب تصدقي انتي انك عيلة..

اضحكي بقي ..محدش عارف الايام الجايه مخبيه ايه

ليه نبكي بمزاجنا اذا كان فيه حاجات ممكن تبكينا غصب عننا كده الدنيا كلها هتتملي بكا

خلاص

اجازة من النكد ..بس الي اجل غير مسمي

الله اعلم ممكن تخلص بكره بعده..ماتخلصش خالص

يامسهل يارب

ولاكان ف بالي

وأنا بحتاجلك دلوقتي اكتر ماكنت محتاجلي

لن املّ انتظارك

احبك عندما تبتسم لي

احبك لأنك تجعلني ابتسم

تغمرني باحساس لم اعرفه من قبل ان اكتشف وجودك

من قبل ان تدخل عالمي بهدوء

وبثقة تفرض حضورك علي قائمة الموجودات من حولي

حتي انني صرت اخشي من ان تكون حقيقيا

انسان ما بهذه الروعة لا اتخيل وجوده الان في حياتي

افعل شيئا اخيرا

تثبت لي ان ما يسكنني الان ليس محض خيال..او ترهات انسانه وحيدة

لا ترحل في صمت بعد ان اقتربت وقطعت كل تلك المسافه اليّ

فانا _وان لم اقل لك_احتاج اليك بجانبي..قلبا جميلا اتعرف علي نفسي من خلاله

ويخطو معي الي عالم ساراه معك

واسمع قصصه منك

سأمحو _ان اردت_ قصائدي وقصاصاتي واوراقي القديمة

وامزق مجلداتي

واكتب فصلا جديدا

يبدأ من يوم لقائك

فقط

عدني بانك ستأتي مرة اخري

تنثر اوراق الزهور من مدخل شارعي حتي عتبه بابي

وتنهي حيرتي باربعه احرف

تكسر بهم حاجز صمتي

وتمحو اخر ماتبقي من خوفي

لن امل انتظارك هذه المره

لانك فعلا

تستحق الانتظار

عدت

عدت اخيرا الي مدونتي الحبيبه

بعد غياب في الاراضي المقدسه دام ل 20 يوم

بصراحه لولا الكليه والتزاماتها...الواحد ماكانش يبقي عايز يمشي من هناك ابدا

بس برضه مصر بنت الايه دي كانت واحشاني..دا كفايه الحاجات البسيطه اللي الواحد كان بيعتبرها من البديهيات..رجع حس بقيمتها

اشكر كل اللي سال عني في غيابي..واللي كان عايز يسال وماسالش واللي ماكانش عايز يسال برضه مايضرش

بحبكم كلكم ودعيتلكم بظهر الغيب

انتظرو قريب يوميات معتمره..لاني عايزة اكتب كل اللحظات اللي حسيتها هناك عشان بجد ماتتعوضش

تحياتي للجميع

هنيّا لي وعقبالكم

اعزائي..

اعتذر عن التدوين والتواجد علي النت بصفه عامة الفترة القادمة

لقضاء مناسك العمرة

ولي عودة باذن الله بعد عيد الفطر المبارك

خالص تحياتي ودعواتي للجميع

سأفتقدكم جدااااااااااااااااااااااا

ملاحظات:

اليه.:..من بين كل ماسأفتقدهم في هذا الوطن..كنت انت صاحب النصيب الاكبر .. كم كنت اود لو اسمع دقات مميزة من جهاز حديدي صغير تخبرني انك اردت فقط الاطمئنان علي قبل رحلتي الطويلة .كان هذا سيحدث فارقا وان كنت اظن انك تريد..ولن تفعل...علمتني مواقف من الماضي الا اطلب او اتوقع الكثير

فقط سأدعو الله لي ولك..والله يعلم مابنفسي ويعلم مابنفسك

ميشو: قد يظنك البعض مجرد حيواني الاليف لا اكثر..لكنني اراك صديقي المرح دائما ..الغلس احيانا الذي يوقظ شيئا ما بداخلي يحولني الي قطه صغيرة مثلك هوايتها الكبري هي استكشاف العالم في فضول

سافتقدك يامشمشايه قلبي

وارجو ان تهتم بك دار الرعايه تلك..وان اتركك عندهم ميشو..القط الشيرازي ذو ال ثمانيه اشهر..ولا اجدهم عند عودتي يسلمونني

ببغاء ناطق يسمي فرغلي

او

صندوقا اسودا مكتوب عليه بياناتك كي اتكفل بدفن الجثه

تلك فكره ابشع من اتخيلها

سلسبيل: اتمني من الله الا اري وجهك ثانيا الا وقد تغيرتي

وان اعود من بلاد الحرمين ب سلسبيل اخري..غير الاولي التي حولتها الايام لتصبح شخصا ما لا اعرفه

عديني انت تتغيري

علي الاقل حاولي ذلك

انتظار

؟؟؟؟؟؟

!!!!!!!!!!!!!

سئمت هؤلاء

صورة محفورة..

في الواقع هي الفكرة جت ف بالي ف يوم شديد الحراره من ايام الصيام
فطبعا معرفش الفكرة قدرت تصمد ازاي ف وش الظروف دي وطلعت للنور
هي قصيدة انا كنت كاتباها هنا من فتره
http://salsabeeel.blogspot.com/2008/08/blog-post_28.html
والقصيده بقي قاعده تزن علي دماغي
فقلت لندي اختي الصغننه
بما انك ديزاينر قد الدنيا ماشاء الله
افتحي الفوتوشوب واعمليلي تصميم علي القصيده
اصل انا كل ماتفاءل لقصيده بقول لندي تعمل لي تصميم عليها
طبعا ندي هرشت راسها كعلامه تدل علي التفكير العميق
قالتلي انا ماعنديش رصيد حوليلي 5 جنيه رصيد علي موبايلي بما انك ربنا كرمك وغيرتي النمره وبقيتي خط مش كارت..دا لو عاوزاني اعمللك تصميم
ياسلام ع العقليه الاقتصاديه الفذة.....سعد الدالي ياولاد..
بس قلبي كان واجعني وانا بحول لها ال 5 جنيه
المهم بعد ماحولتهم لها
لاقيتها بتبصلي بجديه وبتقوللي
دلوقتي اطلعي برا وسيبيني اشتغل
طبعا ياريت الكل يلاحظ ان اللي بتقوللي كده اختي اللي اصغر مني باربع سنين هههههههههههه
وطبعا كرد فعل طبيعي
ماسكتش
قلتلها حاضر
و خرجت وسمعت الكلام
بعد شويه لاقيتها بتندهلي توريني التصميم
بصراحه يعني
كان يستحق 50 جنيه مش 5

لدرجه اني عملته وولبيبر ف الموبايل

لاني حسيته جدا وحسيت انه ادي للقصيدة طعم
بس طبعا ماقلتلهاش كده احسن تصدق
بعيدا عن الرغي اللي فوق ده واكيد فيه ناس قاعده تقول مالك واجعه دماغنا م الصبح ورينا التصميم اللي بتحكي عنه ده بدل العطله دي
فالتصميم اهه

وبجد بجد بجد

تسلم ايدك يانيدو ..ربنا يحفظك

!! بكلمة منك

.

.

.

.

...تـنسّيني اللي عدّى قوام

مابتعلمش

.

.

.

.

.

.

بغيره القلب مابيحلمش

رمضان جانا..أهلا رمضان

رمضان جه تاني

وكأنه كان لسه هنا امبارح

الايام بتعدي بسرعه اوي ودي حاجه تخوف بس مش مهم طالما بتيجي وف ايدها رمضان بصيامه وقيام لياليه ولمتنا علي سفرة واحدة واغنية عبد المطلب اللي جايه من مكان ما بالليل بتدي احساس رائع

مبنحسوش الا مرة ف السنه

رمضان ..يعني الصبر يعني اللهم اني صائم يعني نسامح

ونصفي نفوسنا من اي زعل تجاه حد

ونطلب من اي حد انه يسامحنا لو كنا اسأنا له ف يوم

رمضان يعني الخير والبركة والعطاء والود

يعني دعوة إن شاء الله مستجابه

وشهر بنتغير فيه للاحسن وبنحاول نفضل كده باقي السنه

رمضان يعني.......

كل عام وانتم بالف خير

اربع ملاعق سكر

راقبته من بعيد يضع السكر في كوب الشاي الساخن

الذي اتي به اليه ذلك الصبي البائس من القهوة المجاورة

في هدؤ كان يضيف ملعقة تلو الاخري

ويقلبها ببطء..حتي تذوب كريستالات السكر الشفافة

كأحساسي به..

في احضان ذرات الشاي

واذوب معها في التفكير فيه

!...اربع مرات من الذوبان

الخاطرة السادسة عشرة...بناء علي توجيهات عمنا المراكبي

انا قلت مش معقوله المراكبي بذات نفسه يطلب مني اول طلب ومانفذوش

دي حتي تبقي عيبه ووحشه ف حقي خالص

آدي الخاطرة السادسة عشرة(ولو اني لا بحب رقم16 ولا 6 ولا 60ليه معرفش )..او خلينا نقول الخاطرة رقم ستاشر احسن وسيبنا م الفصحي شوية

اصلها حاجه عامي حلمتنيشي علي قد ماقسم

بصراحة انا وقت التعبير عن المكنون والمستخبي..مبلاقيش احسن من العاميه اللي بتطلع اللي جوايا..

معرفش انا كده خلقة ربنا..

وبصراحة برضه انا لسه ماكملتهاش...وبرضه لسه ملاقيتلهاش عنوان

واحتمال لا اكملها ولا اعنونها..واسيبها مفتوحه...كده احسن

بعيدا عن الرغي اللي انا قلته فوق ده

فالقصيدة اهي..عشان ماعطلكوش فتتخنقو وتحلفو علي المدونه وصاحبتها وانا اما صدقت رجعتلها تاني وطلعت الفرش يتهوا ف الشمس ونفضت التراب من علي الطقم المدهب بتاع الصالون :)

احم احم...

انا حسيت..بشاير نبضة محتارة

ومن شباك عيوني السود

بترميني

قصاد شطك

ومستنيه تسقيني

وانا معرفش ليه حنت

عليك انت

ضفاير بنت متحرم

عليها العشق من قبلك

كأنك صورة محفورة

ف وسط مسام تكويني

وكان بينا المعاد صدفه

علي ورقة نتيجة يوم من الايام

رميتلي سلام

حضن كحلي برموش عيني

.علي النني الكلام تايه

مابيني وبينك اتجزأ

ل سين

مستني رد الجيم

وانا معرفش ف التنجيم

واحب الحلم لما يجيني

يتفسر

بدون تأخير

ولا تقديم

ف ريحني

_عشان خاطري_

ورسيني

شوفتك..

شوفتك حبيت عنيك.

حسيتها حنينه

وكأني عرفتك انت.

.من قبل ماكون انا

ورق الكراريس مليته

..وحكيتله كتير عليك

شوقه بيتداري منك

دايب علي شط بحرك

..فوق موجه ملونه

صورتك ف القلب رسمة

..من غير ورقه وقلم

_عُمر ومفروش نغم

حدوته ومش هقولها..

علشان حدوتي انا

احساس جوايا ليك

مش سهل اني اوصفه

لو غني حد عنه

مش هيبطل غنا

عارف لما اتقابلنا.

.لما اتبسمت ليا

ردت بكسوف عنيا.

.كات اول مره ليا

اكون مطمنة

مع ان الناس كتير

اشمعني بحس بيك

طايره باحساسي ليك

.كلمة بتربطني بيك

معرفش حروفها لسه

!....مع اني مخمنه

مش عارفة..ساعات بنشوف ناس بنحس انهم ممكن يكونواالاشخاص المناسبين لينا..مع انهم مش كده وبنكون بنخدع نفسنا يمكن لان الظروف كلها وقتها بتبقي بتوجهنا لكده

او يمكن عشان محتاجين نتخلص من احساس الفراغ

وعلي كل حال بيفضل جزء جوانا مقتنع اننا غلط

لكن ساعات تانيه..بنشوف ناس برضه نحس ناحيتهم نفس الاحساس..مع اختلاف ان جوانا حاجه بجد بقي بتحسسنا اننا كده علي الموجه الصح ..حاجه كده زي الحاسه الساسه علي راي القرموطي

المشكله الوحيده بتبقي..هل هم علي نفس الموجه؟؟؟..غالبا الاجابه بتكون لا

والسؤال هنا..اشمعني...ومش هحط علامات استفهام عشان مش هتكفي المدونه لو حطيت

ايه علاقة دا باللي انا قلته فوق معرفش

بس اهم كلمتين وقفو ف زوري.. كتبتهم ف مدونتي.. حد شريكي بقي :D

كل يوم

ملل كل يوم اصبح شيئا معتاداً

الكمبيوتر المفتوح بلا اي قيمة سوي انه يريني عالما اكثر مللا في نظري علي الاقل

افتح مدونتي يوما..علني استفز قلمي الكسول جدا لكتابه حرف واحد

يقنعني بانني مازلت اتنفس مع الاحياء

لكنني في الغالب

اسأت الفهم

.فليس كل من تنفس ..علي قيد الحياة

احاول تخطي مرحلة الملل تلك بكل طاقتي.لكنني اشبه بمن يبذل كل مايملك من قوة للخروج من دوامة رمال متحركه..

بينما تسحبه الرمال ببطء

الي المجهول!!!

ف الحقيقة....تاني

بس عارف!

لازم الايام هتجمعنا بطريقة

اتنين ف يوم واحد

طبعا انا قلت بما اني كرهت كل اللي حواليا ف الحياة والنت ايام امتحاناتي فلازم برضه اوريهم الجانب المشرق

نتيجتي ظهرت والحمد لله جيد جدا 82% واللي عايز يعتبرها امتياز والله ماعنديش مانع هههههههه

وخبر تاني احلا

نيدو اختي جابت 98% ف تانيه ثانوي

سبحان الله انا نتيجتي ونتيجتها ظهروا ف نفس اليوم الواحد اعصابه باظت يعني

ربنا معاها السنه الجايه عشان الواحد بقي يطمن عليها ويبقي كده لسالها ف ذمتنا العريس

وبالمناسبه السعيده دي اهدي للكل اغنيه قوم اقف وانت بتكلمني

!!!معرفش ليه حاساها اوي كده

خواطر مملة.. لصيدلانيه تحت التمرين.. ج7

بعد البداية المشرفة اللي بدأت فيها علاقتي مع زملائي في العمل في صيدليتي العزيزة

بدأت اشوف العجب العجاب من زبايني الافاضل واللي في خلال مده مش كبيره ممكن يؤدي لحرقان في المراره وارتفاع في الضغط وزغلله مع رغبه متكرره في ضرب اي حد يدخل يطلب دوا واحساس ان الربع اللي كان ممشيني طول السنين اللي فاتت هيضرب وساعتها مش هيبقي موقف لتشيف

(عروستي)

بالرغم من انها لعبه كنا بنلعبها زمان ...صراحه طول عمري بكرهها عشان كنت باكسل افكر....بس اكتشفت انها طلعت اللعبه المفضلة للمترددين علي الصيدلية

حسب معلوماتي ان ابسط حاجه ممكن انسان يعرف ابسط اداب الحضارة سواء متعلم او لا المفروض يعملها هي انه يحفظ اسم الدوا اللي بينتظم عليه واللي حياته ماتمشيش من غيره

لكن ازاي هو الواحد في بلدنا فاضي لايه ولا لإيه حتي اسم الدوا يامؤمنين مش ف دماغكو اصلا تحفظوه..خلاص الطناش وصل للدرجادي

ححكيلكو علي موقف بيتكرر ف اليوم حوالي اربع خمس مرات ودا ع الاقل

يدخل رجل كبير او ست او ممكن انسه او شاب

لو سمحتي يادكتوره انا عايز دوا للقلب

انا ببراءه..اسمه ايه يااستاذ

هو ف الحقيقه انا معرفش بس ممكن افتكر شكله لو شفته

طبعا انا بتنح بكل ثقه وبالتاكيد مش بحاول ادور علي حاجه لاني معرفش اطلعله كل ادويه القلب اللي ف الصيدليه انا مش ابو بكر الرازي

فطبعا بنده لاستاذ احمد ينقذني علي اساس انه عارف طبعا اكتر مني واشوف زباين تانيين بس بفضل اراقب من بعيد عشان ببقي عايزة اعرف صراحه المريض كان عايز انهي دوا وبسمع بقي حوار زي الفل

استاذ احمد في محاوله للتركيز:: ايوة يااستاذ قلتلي دواك اسمه ايه

والله مش متذكر بالظبط بس العلبه كانت لونها اخضر وفيها دواير بني شبه الكحك

كحك!

اشوف استاذ احمد ساب اللي ف ايده ولف علي كل ادويه القلب اللي لونها اخضر وعليها كحك ولو كان حظه حلو ولقي حاجه تقرب لها غريبه مثلا مش كحك ههههههه ووراهاله

شوف كده دي

معلش تصدق طلعت كنت بتكلم علي دوا تاني...اللي اقصده ابيض وفيه خطين حمر

يحاول استاذ احمد انه يتجنب حدف الراجل بالمقص اللي جمبه ويقولله وهو بيجز علي سنانه ويقولله علي عيني حاضر هشوفهولك

بعد عده دقايق يظهر استاذ احمد بشويه علب

هي دي

لا

طب دي

لا

ودي

برضه لا

الراجل وكانه جاب التايهه: طب بص سيبك من كل اللي فات لاني بصراحه مش واثق من اي حاجه قلتها عشان ناسي لكن اللي فاكره فعلا هو ان العلبه منه كانت ب 11 جنيه

ومكون من مقطعين تقريبا ومقطع منهم فيه حرف كاف

ابص لاستاذ احمد الاقيه قرب يصفر م االغيظ زي مابراد الشاي بتاعنا بيصفر لما بيغلي

يقطع الزبون افكار استاذ احمد وهو بيضيف بكل ثقه وابتسامى صفراء تكسو ملامحه

او لام

ياعم حرام عليييييييييك بقالك نص ساعه مستلمني وطلعتلك كل ادويه القلب اللي هنا

الراجل ببراءه تغيظ:قلب؟؟ انا قلت قلب انا قلت دوا للضغط طب اقوللك علي ماروح البيت ادور علي علبه فاضيه ليه لاني حاسس اني تعبتك شوووووووووية

هاتلي شريط ريفو

يخرج واحنا في ذهول

بل اذبهلال

واستاذ احمد بيشد ف شعره

عليه العوض اذا كنت انا اللي كنت بتفرج بس ضغطي علي

امال الراجل اللي بيجري علي ولايا ده يعمل اييييييييه

السؤال هنا..امتي هيهتم المواطن المصري بابسط امور حياته ومش هطلب انه يكون استاذ جامعه ولا ان ذاكرته تبقي فولاذيه...علي الاقل يحتفظ بورقه يكتب فيها ...الحاجات اللي ممكن تنقذه بدل مايفتكر انه بيفتح محرك بحث جوجل او

بيلعب كلمات متقاطعة

ولا ايه؟

ف الحقيقة

انت نبض العمر

وحروفي البريئة

حد صعب ف يوم يكون اصلا حقيقه

والحقيقة

!! انت اجمل حلم يتعاش ف الحقيقه

خواطر مملة..لصيدلانية تحت التدريب ج6

بلغني ايها الملك السعيد ذو الرأي الرشيد ان تدريب المدعوة مي الساكنه بشارع الشهيد عبد الحي قد انتهي العام الماضي علي خير وربنا دفع عنها بلاوي كتير..ولمن لا يعلم فمي صيدلانيه تحت الانشاء...تحب دراسه الادويه من الالف الي الياء

ولها مذكرات قديمة عن معاناتها ف الصيدليه لمن يريد ان يعرف كم كانت تعاني هذه البونيه

ج1

http://salsabeeel.blogspot.com/2007/07/blog-post_07.html

ج2

http://salsabeeel.blogspot.com/2007/07/2.html

ج3

http://salsabeeel.blogspot.com/2007/07/3.html

ج4

http://salsabeeel.blogspot.com/2007/07/4.html

ج5

http://salsabeeel.blogspot.com/2007/07/5.html
ورجعت الي تدريبها هذا الصيف كالعادة...دون اي نقصان في المواعيد او زيادة..مع ان صاحب الصيدليه كان منها مخنوق ومنفسن..لكنه ارتاحلها وقال ان شغلها متمكن

وطلب منها ان تاتي مره اخري هذا العام علشان يدبحلها زوجا من الحمام كان معها في الصيدليه ثلاثة..التعامل معهم يحتاج الي تحليل و دراسه

فهناك استاذ علاء وهو رجل صبور ورزين

وهناك استاذ احمد الطيب ولكن خلقه ضيق ومزاجه دايما طين

وشيماء التي جاءت بدلا من ايمان...لا تتكلم كثيرا وكانها تعاني الما في الاسنان

ماسبق كان المختصر المفيد

اما ماسأرويه عنها الان فيحمل بين طياته كل غريب وجديد

ففي احدي ايام الروقان حكت لي مي وهي تتناول عصير البتنجان عن اول ايام نزولها هذا الصيف للصيدليه..وكيف كانت تفتقر الي المتعه والتسليه...

قالت في ملل وهي بادي علي ملامحها الكسل:

---------

ِنزلت من بيتنا وانا حاسه اني لسه بحلم علي سريري...مانا
مخلصه امتحانات بقالي يوم واحد ومع ذلك اصريت انزل
الصيدليه..اصل كلهم ف البيت كانو مسافرين وانا كنت لوحدي ..قلت بقي اقتل الملل مع ان كان فيه طرق كتيييييييير اوي لقتله
بس نقول ايه ع المخ الضارب من مناهج العاقير والتحليليه وخلافه... عليه العوض ..البرج الاستبن ضرب ..عايزة اوصي علي برجين ماركة ميشلان
دخلت هناك وسلمت علي الكل واخدت مكاني بثقه ورا اكبر ريون وقلت ف سري يافتاح ياعليم يارزاق ياكريم استرها معانا يارب كان ناقص بس ارش شويه ميه قصاد الصيدليه عشان المنظر يكتمل...يلا ماعلينا

--------
((عايز تعاكس عاكس علي قدك))
دخل طفل مايزيدش عمره عن 10 سنوات كان شكله ظريف اوي ..ابتسمتله وقلت اما اجيبله انا طلباته دا الاطفال احباب الله واما
جيت اديله الباقي لاقيته بيسالني وهو بيبتسم وباهتمام شديد..

.انتي اسمك ايه بقي

فانا قلتله هه؟؟ اشمعني ياحبيبي

قال بجديه وكانه رايح يزورنا مع اهله بكره وهو بيوجه كلامه لاستاذ علاء اللي كان واقف جمبي :

عايز اعرف اسمها ياعمو
اصلها عسوله

هههههههههههههههه طبعا الكل نزل ضحك..ايه الاحراج ده يعني اخرتها اتعاكس من عيل عنده 10 سنين قلتله يابني انا صحيح طولك بس اكبر منك مرتين عجوزة عليك يعني ههههههههههههه عارف لو كنت اكبر شويه ماكانش عندي مانع اقوللك اسمي ههههههههه

طبعا دا وشه بقي كيلو طماطم ياعيني م الكسوف وواخد حاجاته
وديله ف سنانه والله صوعوب عليا . من اولها باتسلي علي خلق الله كده
عموما كويس من اول يوم نزلت جالي معجب عنده عشر
سنين...هانتكمان اسبوعين يجيني عريس ف ثانويه عامه ماحنا ياما نشوف
هههههههههه

-----------

((كفايه زلط عشان خاطري..خلينا ف الدبش))

ع العصر كده كنت قعده في امان الله وخلاص مش شايفه قدامي
م التعب مانا واقفه علي رجلي م الصبح دا غير اني مانمتش من ساعه اخر امتحان لاقيت واحد دخل انا قلت اشوفه عايز ايه

لاقيته بيضحكلي اول مادخل وبيقوللي ازيك

طبعا بقي ولان اذا ذكر االاذبهلال ذكرت كاتبه السطورفانا بصيتله بكل قرف وقلت بقي هو فكرني حد يعرفه باين

فقلتله برقه متناهيه وبنظره يملأها الغل

انا بشتغل هنا...اي خدمه يا حضرت؟؟؟؟

ايوة كده هو ده الكلام يابنت يامي...لازم تبقي شديده كده قال بيسلم عليا قال هاهاها ليه بقي بيشتغل معايا ولا بيشتغل معايا وايه ده هو بيستهبل ..دا راح يقف ف مكان البيع ليه...وكمان
فتح الادراج بتاعت الدوا عادي كده؟؟؟؟؟؟قطع افكاري استاذ احمد وهو بيقوللي بسرعه قبل مافترس الشخص
الودود زياده عن اللزوم اللي دخل سلم عليا ده وعلي الكل

دا دكتور محمد يامي بيتدرب معاكي ف الصيدليه

انا : وشي جاب الوان وقلت ف سري اااااااحم يادي الكسوف ياولاد...يعني حبكت يامي
عربيه الزلط دلوقتي طب كنتي اكتفيتي بالدبش بس

طبعا معرفتش اظبط الموقف ازاي بس يعني كانت بدايه موفقه
وزي الفل ولحسن حظي انه غلبان ومااخدش ف باله وقعد يتكلم بعد كده عادي

انا طبعا قلت امشي ساعتها عشان الشيفت بتاعي كان خلص وكنت حالفه انام يومين بعد ماتش الامتحانات المرير اللي دخلته لمده شهرين .. وكمان عشان محدش يتصاب اكتر من كده
بعد كده بقي لما رحت التدريب تاني حصل حاجه غريبه اوي.....

مولاااااااااااي

((خلفيه موسيقيه وصوت ديك عنده سعال ديكي))