حالة كده ...

كالعادة باغطس كده كام شهر وبظهر فجأه في المدونه..

وكالعاده برضه بظهر ف اوقات غريبه اوي..يعني انا مثلا دلوقتي ف عز ايام الامتحانات الجمييييييله..ايه ده انت بتقول عز؟؟
بس حاسه اني لو مكتبتش اي حاجه هطق و اموت م الغيظ
اللي يفرس اني بقالي كتير جدا الحاله المزاجيه للكتابه عندي ف النازل ومش عارفه اكتب اي حاجه
فكميه الكبت اللي جوايا حاليا محدش يتخيلها
حاسه اني قطب موجب..بستقبل حاجات كتير..تفرح تدايق مش مهم..المهم اني مش عارفه اطلع اي حاجه جوايا
جربت اتكلم مع صحباتي..نخرج سوا.. . هم نص ساعة وبزهق...طب هتكلم ف ايه..ماهو الحاجات اللي خانقاني مش عارفه اقولها حاسه انها حاجات نصها مش مستاهل الكلام عنه ومجرد تراكمات والنص التاني مش عاوزة اتكلم فيه اساسا عشان هتخنق زياده
طب اعمل ايه انا دلوقتي :D
جربت اقرا..اهتم بحاجات جديده..اغير مواعيد نومي..اصاحب ناس جداد..اغير اكلي..نزلت اشتريت حاجات كتيييير....حتي اني بدات اذاكر..طب تخيلو اناااااا واعوذ بالله من كلمه
اناا..لما اذاكر دا معناه ايه..هو الملل وصل بيا للدرجادي
حاجه كمان ..غالبا هي نتيجه لمزاجي اللي زي الزفت
انا مباقيتش طايقه حد..الناس دلوقتي ف نظري كتله من القرف والغش والتلوّن...قال يعني انا اللي ملاك..طب ماهو انا برضه م الناس وبغلط..لييييه بقي منصبه نفسي عليهم قاضي وبقول مين حلو ومين وحش..مانا كده ابقي مقرفه ومتلونه برضه...اذن انا مش طايقه نفسي كماننننننن بالاضافه الي اني زي ماقلت سابقا مش طايقه الناس
جميل جميل

فيييييه حاجه غلط...اكرر..فيه حااااجه غلط..كمان مره..فييييييييييييييه حاااااااااااااااااااجه غلططططط

انا هتجنن

وبمناسبه الحاله الرائعه اللي انا فيها دي..

قريت النهارده قصيده تحححفه للشاعر علي سلامة..
حسيت اوي انها بتعبر عني


معرفش ليه تنحت للدنيا كده
وفجأه لقيتني مسكون بالملل
معرفش ليه..
لا عندي رغبه في البكا
ولا في الكلام
ولا عايز انام
ولا حتى بسأل ايه ده ايه
واخرتها ايه
و ايه العمل
حاله كده

وبخاف أقول لأي حد
أحسن يقوم يـقلبها جد
أو حد صاحبي ينزعج
يمد أيده جوه قلبه من باب الكرم
عشان يشاركني الألم
أو يستلـفلي مـ اللئيم حبه أمل
حاله كده
حاله كده ..معرفش أيه

ساعات تزورني في الشتا
في الربيع
في الحر وفــ عز الشتا
وتجيب حاجات ..
لا فيها روح ولا ميته
حاله كده
لا معاها ينفع كلمتين
ولا غنوتين
ولا لقطه من البوم صور
ألاقي قلبي في الهوا ويا الكور
وبخاف أقول لأي حد
أحسن يقوم يقلبها جد
حاله كده .. معرفش أيه
لكني برجع منها من بعد السكات
فاكر شويه ...
فاهم شويه في اللي فات
حاسس أوي بحضن الصحاب
محظوظ أنا ..
ساعات بشاور
يتـفتـحلي ألف باب
لكني برجع أغلط في الحساب
ومعرفش ليه
تنحت للدنيا كده

محدش يعرف ليه ينوبه فيا ثواب :(:(

بعدك علي بالي

النسمات المتسللة في خجل

تحمل رسائل من نيسان

عشقي الابدي

الشتاء يقاوم النعاس كطفل شقي بعد يوم ملئ بالعبث

لكنه سيستسلم في اخر الامر

و اصحو من سباتي

نغمات رحبانيه تحلق بي بعيدا بعيدا

الي ارض يغمرها الربيع فقط

انتظر القادم من المجهول

كل عام ينقضي

يقترب اكثر

اشعر بذلك وان كنت لازلت اجهل احداثياتك

لم يتبق الا القليل ياعزيزي

سنلتقي

حتما سنلتقي

انفلوانزا البني أدمين..من وحي الفالانتين

الاسبوع اللي فات كان كارثي بكل ماتحمله الكلمه من معني

فنتيجه الجو قارص البروده للي كنا فيه ده..((بغض النظر عن اليومين الحلوين اللي احنا فيهم دلوقتي))..كانت النتيجه الطبيعيه لامثالي من كارههي البلوفرات اني اصاب بالتهاب في الحلق خلاني معرفش اتكلم اصلا..

وعشان النكته تكمل كنت مضطره اتغلب علي الااااااامي واروح فرح واحده صحبتي..وانا سايلانت كده ودا ف نفس الوقت كان لحسن حظي لان كل صحبات العروسه كانو بيزغرطو وانا طبعا نظرا لظروفي معرفتش لكن مش دا السبب الوحيد..فانا اساسا مبعرفش ازغرط لكن طبعا مقلتش لحد واكتفيت بحجه زوري هههههههه فالحمد لله الحكايه دي حصلت عشان تمنع فضايح كتير

بعد الفرح قضيت ليله بشعه اخري لما فوجئت ان التعب بلغ بيا مبلغه وان بسبب كرتونه الاستربسلز اللي بلبعتها وياريتها جابا نتيجه بدات احس ان فيه عيال صغيره بتتنطط ف معدتي..شعور غبي بصراحه خلاني مش طايقه روحي ومش عارفه انام

قلت معلش

حاولت اتغلب علي كل ده وانام..ماهو انا محدش يقدر يقف قصادي ف النوم..لو مانمتش ال 15 ساعه بتوع كل يوم اتعب بصراحه..لازم اعوض ايام الذل بتاعت الامتحانات

صحيت الصبح وانا مش عارفه اخد نفسي..خير يارب..فوجئت ان الحاله اتطورت..وان التهاب الحلق انضم ليه زكام

واختفي حرف الميم من حياتي وتحول الي باء واصبح صوتي اشبه بصوت يوسف شعبان في مسلسل الضوء الشارد..الامر اللي دفعني اني اتوقف تماما عن الرد علي اي تليفون حفاظا علي مشاعر الناس اللي بتتصل..دا غير انهم كتير اوي كانو بيفتكرو انهم اتصلو بنمره غلط او يقولولي..حضرتك مين(بفتح التاء)

كانت المشكله التالته لما اعلن بابا اننا رايحين معرض الكتاب..قلتله وانا مدهوله تماما من اثر الادويه..

تاليستشلهعلاسشليسشالينتسلينشتسليش7هع

؟؟؟؟؟؟؟

ترجمت له اختي معاناتي وقالت له

بتقوللك هو لازم اروح معاكو..انا تعبانه جدا

قاللي ايوة لازم لان المعرض هيخلص بعد تلات ايام تقريبا وانا مش هفضي بعد كده

عدت لاقول له:

نتالتنيلنتالاتببيبلسثسث

((ماتروحو انتو وسيبوني))

قاللي براحتك بس انا كنت فاكرك عاوزة تشتري الكتب اللي كنتي بتدوري عليها ومستنياها طول السنه

امري لله

رحنا القاهره واللي حصل هناك يحكي في بوست اخر علشان مايكفيهوش البوست ده بصراحه

بدات احس اني تعبانه فعلا وسخنه دا غير اني من كتر الزكام.((اختي الله يساااامحها اشترتلي مناديل مصنوعه من جلد التماسيح تقريبا هههههههههههههه.))..اصابتني بالتهابااات بششششعه في بقي ومناخيري ..بقيت بخاف ابص للمرايه لحد دلوقتي بسببها

حاولت اتغاضي عن كل ده..صحيح عندي خطوبه واحده صحبتي كمان ايام بس اتعشم ان كل ده يكون راح وقتها ..

بس ازااااي..صحيت النهارده احسن الحمد لله

بس خير اللهم اجعله خير ببص ف المرايه

لاقيتني طلعلي بق تاني جمب بقي

ببص كويس

عااااااااااااااااااااااااااااااااااااااااااااااااااا

وكنتيجه طبيعيه لاي دور برد يحترم نفسه..واستكمالا لمسلسل التشوه..جالي هربس لطيف اليف مؤؤؤلم جداا تاني..الامر اللي خلاني للمره التاني افقد القدره مش علي الكلام بس لكن وحتي الاكل...

باقي من الزمن اقل من يومين ع الخطوبه وانا بهذه الحاله التي يرثي لها..اضيفو لكده نوبات الكحه اللي ظهرت فجاه كاني اسطي قديم في الشيشه..لا تنسوا تشوهات المناديل اياها..

انا دايما متعوده قبل اي مناسبه يحصللي حاجه لذيذه كده..قرصه نموسه ف مكان واضح ف وشي..حبايه غلسه تطلع بدون سبب..تعويره ظريفه تزين جبهتي..لكن اللي حصل ده كله..كتير عليا والله :D

اللي لفت نظري اكتر ان اصعب حاجه واجهتها ف دور البرد الخرافي ده مش اعراضه..والله اعراضه تهون وكبيرها قرص بنادول..لكن تبعات الدور هي اللي عجيبه شويه هههههههههههههه ربنا يستر بقي وماصحاش بكره كمان الاقي حاجه تاني..مانا اتعودت طول الاسبوع

الي فات اني كل ماصحي الاقي تغيير جذري ههههههههه

انا عارفه ان كل الكلام العاتشيفي اللي قلته فوق دا مالوش اي علاقه من بعيد او قريب بالفالانتاين اللي مااخدتش بالي انه النهارده الا من ساعات قليله..وماهانش عليا اسيب المدونه فاضيه كده وبتنش..حتي مايصحش
:D
كل سنة وانتو طيبين..يلا عشان متقولوش حارماكو من حاجه

المهم بس

دعواتكو كحححححكححححححكححح..ليا كح كح بالشفاء العاجل كححححح

تحديث..

صحيح..استكمالا لمسلسل التشوهات اللي حصل لي..
امبارح تعرضت لحادث مؤسف كان نتيجه ليه اني اتعورت ف جفني..ودلوقتي صحيت م النوم والمنظر مش لطيف بالمره ههههههه مع العلم ان الخطوبه بتاعت صحبتي النهارده..انا بدات احس ان الخطوبه دي نحس عليا..واني لو اصريت اروحها ممكن ينزل نيزك ولا حاجه او تحصل اي كارثه ههههههههه بجد انا اتعقدت اعمل اييييييه انا خايفه ابص ف المرايه

الشرح المعلِّل....لنظرية البصل المخلل

من طفولتي ولحد دلوقتي.وانا عندي ازمة بتؤرقني وتطير النوم من عيني الا وهي التردد
عمليه اتخاذ قرار فاصل بتتحول الي حاجه مرهقه وصعبه جدا بالنسبالي سواء القرار ده ف حاجه

مهمة او تافهة
من كتييييييير اوي..ولا بلاش كتير دي احسن انا لسه صغننه :D
يعني تحديدا وانا عندي 4 سنين
كنا ف المصيف وبناكل سمك زي اي ناس طبيعيين
وفي النص فيه طبق مخلل في اصناف واشكال وانا طبعا سايبه الاكل وقاعده باكل جزر بس..كانت

هوايه عجيبه..وياريته نفع بعد كده :)
المهم..لاحظت ان كل البشر الطبعيين اللي جواليا باكلو حاجه مدورة صغيره كده ف طبق المخلل
سالت ماما ايه دي قالتلي دا بصل ..وانا بقي مكرهش ف حياتي قد البصل عشان وانا صغيره لما

كنت لما ماما تقطعه عيني كانت بتحرقني
قلتلها حلو؟
قالتلي اه ياحبيبتي اديكي واحده تجربيها
نطيت من علي الكرسي بذعر...لالا خايفه يحرقني ف بوقي
قالتلي لا دا التاني البصل الني دا بصل مخلل
قلتلها يعني حلو ومش بيحرق
ايوة حلو ومش بيحرق
سكت شويه ورحت معيطه وقلتلها لا بس انا خايفه يحرقني
هنا ماما كانت زهقت وقالتلي خلاص ياحبيتبي براحتك
طبعا سكت تاني وبعدين اكتشفت ان الجزر خلص وكدا لازم احل محله باي صنف تاني..وجه ف
بالي ال بصل لاني بصراحه كنت هموت واجربه
قعدت جمب بابا ووشوشته
بابا..انا عاوزة اكل بصل
ماشي ياحبيبتي خدي واحده اهي يامانو
مسكتها بتردد..وقربتها من بقي وبعدين رميتها تاني وقلت لااااااا بس انا خايفه تحرقني
ماما اخدت بالها وبدأت تتنرفز...انتي يابنت..عاوزة تاكليه كليه مش عاوزة بطلي هبل واقعدي
كملي اكلك ماتوجعيش راس بابا
بس انا عاوزة اكله
طيب كلي
لا خايفه يحرقني
متخافيش مش هيحرقك
متأكد
بابا كان خلاص مش قادر يبطل ضحك وقاللي ..ايوة
عاااااا انت بضحك كده ليه اكيد بيحرق ومخبيين عليا
خلاص ماتاكليهوش
لكن انا عاوزة اكله
وانفجر الكل ف الضحك
وفضلنا ف موال عاوزة اكله بس خايفه يحرقني دا لحد باليل..واللي كان موجود من قرايبنا وقتها

اتدخل عشان يفض النزاع والجيران سمعو.. وانا مفيش فايده فيا..مخي كوتشي اديداس
لدرجه انهم اتلمو حواليا ف حلقه وبدأت اتحول لوسيله تجلب الضحك..والحاضر يعلم الغايب

بقي..وكل من هب ودب بقي يشتغلني كده..ومفيش مانع لو واحد معدي ف الشارع وسمعني يطلع

يضحك عليا شويه ويمشي تاني مانا خلاص بقيت هزق
الغدا خلص وماما قامت عملت الشاي ورجعت بقي وكل واحد فيهم يشرب الشاي

ويقوللي مابتاكليش بصل ليه يامانو
اقولله خايفه
خايفه ليه يامانو
خايفه يحرقني
ييييييييييييييييييه بجد الكبار دول مفتريين اوي :D
وبعد ماكبرت ..فضلت قصته ملازماني لحد دلوقتي ف كل حاجه ولازم كل

ماتردد بابا يقوللي...انتي هتعملي زي يوم البصل المخلل !!!!
ومش انا بس
اي حد متردد تلاقي اللي حضر الموقف اياه يقولله انت عامل زي اللي خايف ياكل البصل المخلل

هههههههه قصتي بقت تتاخد كحكمة من حكم القدماء..والله ودخلتي التاريخ يامانو
-----
فاكرة مرة تانيه برضه بس دي كانت ماما هترميني م البلكونه
كان عندي امتحانات و المفروض انهم ف البيت يسافرو
وكنت متردده اسافر معاهم ولا لا
توكلت علي الله وقلت هسافر معاهم وهي ساعه مسافه السكة ولما اوصل معايا كتبي هذاكر ف اي

حته
جهزت الشنطه..ولبست ووقفت عند باب الشقه..
وهم خمس دقايق..قلتلهم لا مش مسافره..رجعت تاني اوضتي بالشنطه ورحت مخرجه اللي فيها

ورجعت اللبس الدولاب
عشر دقايق بالظبط ولاقوني لابسه ومحضره الشنطة تاني ههههههههه وواقفه علي باب الشقه باقوللهم

يلا انا جاهزة
بابا ساعتها كان مشغول ف حاجه لسه ودا للاسف اداني وقت اضافي للتفكير
علي ماخلص اللي ف ايده وقاللنا يلا..لاقاني بالبيجامه
جرا ايه يابنتي؟؟
لا خلاص مانا فضيت الشنطه تاني وقررت مانزلش ماهعرفش اذاكر
طبعا لحس حظي ان بابا اهدي شويه من ماما ف المواضيع دي
قاللي طيب ياحبيبتي براحتك عموما ماهانتأخرش..سلام يامانو
سلام يابابا....بابا بابا..بقوللك ايه
تفتكر يعني اسافر؟؟
بدات احس انه عاوز يرميني بالفازة اللي جمبه بس حاول يتمالك وقاللي الانسب ليكي يامانو اعمليه
قلتله يعني ماسافرش؟؟
مع السلامة يابنتي
نزلو ع السلم وانا فضلت واقفه علي باب البيت
يعني انتو متأكدين ان كده انسب؟؟ولا كنت اسافر..بس لو سافرت هضيع وقت..وانا عندي

امتحانات..لكن ف نفس الوقت نفسي اسافر

محدش بيرد عليا لييييييييه
--------
اما الخروج بره مع صحباتي فدا ازمة لوحده
خصوصا لو محتارين هناكل فين بره..بناخد ساعه علي مانقرر وكل العطله دي بسبب حضرتي
كنتاكي ولا بيتزا ولا مؤمن يامانو
همممم كنتاكي...

لالالا استنو...هممممممم...طب قررو انتو علي مافكر وف الاخر نستقر علي راي جماعي
!!!!!
طب خلونا نتكلم بصراحه
فيها ايه لو اتكلمنا بصراحه

التسرع مش حلو ياجماعه ....انتو بتبصولي كده ليه
وبعد تفكير وعصر مخ
بسم الله الرحمن الرحيم...الاجابه تكا
احنا خيرناكي بين تلات حاجات حد جاب سيره تكا
انا بقي عاوزة تكا
موافقين ..خلينا نعدي الخروجه دي علي خير
شويه كده
احم بست بست
بنات
هاااا
مابلاش تكا
مانخليها بيتزا
اللهم طولك ياروح
احنا اساسا مش هنسمع كلامك تاني وبعد كده عاوزة تكلي كلي ف بيتكو
وبعد شد وجذب نستقر علي راي اخيرا ونروح مكان تاني خالص
وتيجي الازمة الاكبر
الاوردرررر
كل البنات يقررو ف ساعتها هايطلو ايه
والجرسون مستني ياخد الاوردر مننا
والشئ الوحيد اللي مانعه
هو سعادتي
طبعا بحاول اتجاهل صحباتي وهم بيبصولي شزرا..وبافضل ابص ف المنيو
اطلب فراخ
لالا...
طب مكرونة...همممممم والله فكره
طيب خلاص مكرونه
اخيييييرا
لااااااااااااااااا استنا
هات المنيو تاني كده
همممممم لا هاتلي سمبوسه
هممممم لاااااااااا استنا
هات المنيو انت مستعجل ليه
لالا مكرونه خلاص
وبعد مالجرسون يمشي وهو بيشتمني ف سره
اهمس في ودن صحبتي اللي جمبي واقوللها..تفتكري كان هيبقي احسن لو طلبت محشي؟
-------------
بجد شئ بشع..وبيحطني ف مواقف فظيعه

ولحد لوقتي بحاول اتغلب علي الحكايه دي..وبصراحه فشلت ف اغلب الاوقات
بس انا مصممة اتغير خلاص

وهاخد قرار وهتحمل اختياراتي من هنا ورايح ايا كانت
.
.
.
.
.
.
.
.
.
.
.

هو انا بس عاوزة اسال سؤال
متأكدين ان البصل المخلل فعلا مابيحرقش؟؟!!!؟؟

i'm freeeee

اجاااااااااااااااااااااااااااااااااااااااااااااااااااااااااااااااااااااازة

اخيرا.

بعد اكتر من شهر سهر وتعب وبهدلة..الحمد لله

يارب بس يطلع بفايده

:D

بجد حاسه ان الواحد مابقاش يصلح لاي حاجه

وان مخي كان بيتعصر ف الاخر من كتر المواد وضيق الوقت

مواد حجمها خرافي وقبلها يوم ونص او يومين

انا وزمايلي الاول كنا فاكرين ان الدكاتره اكيد هيجيبو امتحان سهل يتناسب مع الظروف البشعه اللي كنا فيها دي

لكن ميييين

هم تقريبا حبو يطبقو مبدا الانتخاب الطبيعي قبل مانتخرج..

او زي برنامج الحلقه الاضعف كده علي راي واحده صحبتني

اما المراقبين ف كانو عارفيني جدا

اصل انا الوحيده اللي بابقي باحل وانا بقول حسسسبي الله ونعم الوكيل حسسسبي الله ونعم الوكيل

وبفضل كده لحد مادخل الشفوي واول مانخرج م الشفوي لازم ننسي كل حاجه عن الماده اللي امتحناها لان بكل بساطه

بيبقي عندنا امتحان تاني بعد 48 ساعه وحبه صغيرين

واحنا مانمناش من يومين..والمفروض ف ال يومين دول ننام شويه عشان مانفصلش بس

ونرمي المعلومات بتاعت الماده اللي فاتت عشان عامله زحمة

ونبتدي نحشي معلومات الماده الجديده

بالله عليهم دا نظام تعليييييييييم

وقال اييييييييييه عاوزين يعتمدو الكليه

في المشمشششش

هانت ..لسالي ترم ان شاء الله واخلص منهم كلهم

زلطة واطلع بره هههههه

بس الكليه وصحباتي هيوحشوني اهئ اهئ اهئ

سيبنا من اي حاجه..بلوجر كان واحشني اكتر

فاصل قصير ونوااااصل

لعلُه خير..!!!

فيه حاجه بتحصل للواحد بيبقي حاسس انها وحشه اوي..وان فيه قوي خارجيه اتفقت علي انها تضره

وان كل الظروف ضده..وانه اتظلم وشويه الافلام الهندي الي لا بتودي ولا بتجيب دي..كلنا مجربينها وبنحس بيها ساعات

بس طبعا كل ده هبل

حاجات كتير بنتعرضلها بحكم اننا بني ادمين ونظرتنا للحياه اصلا ضيقه..بنحس انها اسوأ حاجه ف الدنيا

لكن بعد فتره ومع الوقت ..مش بس بنكتشف انها كانت ف صالحنا

لكن كمان ممكن نلاقي انها احسن حاجه كانت ممكن تحصل لينا..واننا لو كنا جبنا مهندس مكنش خططلنا حياتنا بالدقه والروعه دي..

كل يوم هتقابل او هتقابلي موقف يثبت كده

..ربنا راسملك حياتك علي اكمل مايكون..انت شخصيا لو كان قُدر ليك انك تختار حياتك مكنتش هتعرف تختار اجمل من كده

ماتجزعش من اي ازمة او عثرة ف طريقك

كل تعويره ف حياتك تساوي كنز..

مهما حصل..خليك دايما واثق....لعله خير

من جديد

ها انا ذا من جديد..افتح صفحة البلوجر التي كدت انسي معالمها

ادخل في خانه الاسم ..اسم الدخول..وفي الخانه المجاورة كلمة المرور التي استغرقت دقائق افرك جبهتي كي اتذكرها..تاهت في غياهب الذاكره هنا او هناك بين اكوام من المعلومات تكدست في عقلي خاصه في تلك الفترة من السنه بسبب امتحانات نصف العام ..لكنني في النهايه تذكرت ..بعد جهد..لكنني فعلت

دخلت وكانني انتقلت من عالم الاوراق الممله ورائحة حبر الطباعه الي عالمي المفضل الذي ابتعدت عنه رغما عني خلال العام المنصرم عده مرات..لكل مرة حكايه..لكنني تخلصت من الحكايات..ومللت من الابتعاد..ولم يبق سوي الامتحانات هي العائق الوحيد بيني وبين مملكتي الخضراء..عسي الله ان انتهي منها جميعا علي خير كي اعود الي بيني الالكتروني من جديد..

شكرا لكل من علق علي اي بوست في غيابي..واسفه جدا علي عدم ردي..فالله وحده يعلم اني مطحوووووونه في المذاكرة

بكالريوس بقي

وعلي وعد بعدم التاخر مرة اخري ان شاء الله

تنويه

شاهدت علي قناه الجزيرة منذ دقائق..قصه الشاب المكافح المثابر خلدون سنجاب شفاه الله..وتاثرت جدا بشجعاته واصراره علي النجاح وعدم جعل الاعاقه حاجزا بينه وبين طموحاته..

وخلدون لمن لا يعرفه هو شاب سوري اصيب بحادث جعله مشلولا بالكامل الا عضلات وجهة..لكنه عقلا خارقا في مجال البرمجه والكمبيوتر وله موقع الكتروني

www.ar.sinjab.com

ارجو نشره..عسي ان يتعظ اصحاب الابدان الصحيحة ولا حول ولا قوة الا بالله

-------------

دعواتكم لي ولكل الغلابه اللي بيمتحنو..خصووووصا اللي ف بكالريوس صيدلة واسمهم سلسبيل :D