Friday, July 22, 2011

عزبة ابوهم

كان ياما كان الشعب اتحرر..
من تأبيدة..لتأبيدتين
لعبو معاه حراميه وعسكر
خد بسببهم عزق متين
قاللك"يوليو"وقلبو الطاولة
ويسموها مجازا ثورة
واخدو البيت من بابه مقاوله
عزبه ابوهم..مش سائلين
واما ف خمسه وعشرين ثورنا
واتحرر قطعا تفكيرنا
بعد بيان حسبونا سكرنا
وقالو لبعض "خلاص..لازقين"ـ
مجلس عار وندامة وخيبة
افكار دايبه وسحنه كئيبة
وشباب جدا..يادي الخيبة
اصغرهم فوق السبعين
عيب والله عليك يازواوي
شكله عبيط انما غلاوي
ياما ف جراب الحاوي بلاوي
واللي(يَزيد) فاكرينه (حسين)ـ
تبقي حرامي حبيبه كفاءه
او سفاح تطلع ببراءه
انما ثاير..لأ..دي جراءة
هايخزأ عينك الاتنين
اضرب..واسجن..واحرق..واكسر
نفس غباءك وبيتكرر
يســـقط..يســقط حكم العسكر
لا بنستسلم..ولاخايفين
---------------------


مي رضوان
23-يوليو-2011
كل انقلاب وانتو طيبين

Thursday, June 16, 2011

الاجابة..لسه تونس

يابلد دي الثورة قامت
والبطون ع الذل صامت
والشباب اللي اتفطم
ع الصبر
بطل يبقي صامت
بس لسه فيكي حاجه!
الغراب اللي ف سطوحك
العبيد اللي ف صروحك
والتنابله اللي ف مكانهم
لينا بيبصو بسماجه
لسه باقي فيكي شئ
فيه شيطان طامس معالم ف الطريق
والسذاجه
اننا نقفل عينينا
عن خياناته الصريحه
او نآمن للغيلان
حتي لو كانت جريحه
يابلدنا فيكي حاجه مش مريحه
البلابل اللي صوتها
صم ودن الموت ف قصره
اصبحت اصلا فريسه
للرصاص الميري منزوع الارادة
والمعادله مش عويصه
فُك راس واحد بعشره
كلهم نفس الربايه
كلهم نفس البلادة
يابلدنا ايه الحكايه
نمنا بنخاف م العصايه
فقنا خايفين م البيادة
لا العزا اتاخد ف ميت
والفقير لساه مبيت
ع البلاطه
اما عش الحدايات عمران باهله
زي ماسبناه وزياده
والقلم ممكن تضيع صاحبة كلمه
يابشر دانا بس بسأل
حد شايف حاجه فيكم؟
الا ضلمة
زي ضلمة بطن حوت
سيدنا يونس
يبقي طول مالسكة واقفة
والبيبان مقفوله
ف وشوش الغلابه
ليه ندور ع الاجابة
والاجابة..
لسه تونس!
---------
مي رضوان
16-6-2011

Sunday, May 22, 2011

رسالة الي المجلس العسكري...إرحل

ًبداية ًاحب اقول ان الايام اثبتت ان مبارك لعبها صح لما سلم سلطتة للمجلس العسكري..لانه كان عارف انه سايب البلد في ايد(امينه ) هتعرف تمسكها زي ماكان هو ماسكها بالظبط..والا فما تفسير بعض المسبحين بحمد المجلس العسكري ومن قبله مبارك المخلوع ..
للتصرفات الصادره من المجلس العسكري واللي بقالنا 3 شهور بنفترض فيها حسن النيه لحد مالناس افتكرتنا هنود..
وطبعا علي سبيل المثال لا الحصر
اعتقال ناشطين في مظاهرات سلميه..المفارقه هنا اننا لم نشهد ولا حاله اعتقال لاي حد من بتوع انا اسف ياريس اللي كانو بيروحو مصطفي محمود.....مش غريبه شوية؟
تعذيب المتظاهرين في المتحف المصري..وما ادراكم ما المتحف المصري..الجيش نجح انه يغير نظرة الشعب للمكان ده 180 درجه..فبعد ماكان رمز لتاريخ مصر..اصبح رمز للتعذيب والكهربا والاهانه لكل الشباب والبنات اللي تم التحفظ عليهم بداخله..وحقيقة لا افهم ايه ممكن يدفع ظباط ف الجيش الي الكشف علي عذريه بنات في مظاهره..وتفرق ايه بالنسبالهم..او انهم يكهربو ويجلدو شباب .دا غير سيل السباب اللي كان بينهال علي مسامعهم..من جيشنا العظيم..وكل دا لانهم شباب طاهر قام بثورة علي الظلم والفساد وفوجئ ان كل اللي اتغير ف البلد..ان مبارك اتنقل من قصر العروبه لمنتجع شرم الشيخ...لا انجاز بصراحه.,
الحاجه التانيه اللي تنقط هي نفي نبره التخوين في رسائل المجلس العسكري..ونفس المصطلحات القديمة اللي شبعنا منها ايام النظام البائد(ولا باينه مابقاش بائد) ..مصطلحات زي مندسين..جهات خارجيه..البلطجيه..مثيري الشغب..ومجموعه من العبارات المطاطيه المبهمة بيحاولو يخوفونا فيها من خطر مش معروف مصدره بالظبط....واساليب مستحيل تكون صادره من نظام جديد مبني علي الشفافيه والصراحه
...وبعد مالمجلس قال انه لا يطمع في الوصول الي السلطه بدأت انباء غريبه عن جمع توقيعات لبقاء المجلس في الحكم..ياااااجمالو
والجمعه اللي فاتت كان فيه منشورات علشان الناس تطلع في مظاهره مؤيده للمجلس..وكأننا قبل 25 يناير...نفس الحركات البلدي المفقوسه والمحفوظة عن ظهر قلب..
الجديد ان الناس اللي كانت بتعبد الصنم مبارك..بعد ازاحته..حطو مكانه صنم المجلس العسكري..ودا مش صنم واحد المرادي للأسف
لما سمعت وشفت شهادات الناس اللي كانو في احداث سفاره الكيان الصهيوني..وسمعت ان عناصر من الجيش(مش الداخليه) كانت بتخلي الشباب ينامو علي بطنهم ويسبهم باقذع الالفاظ عشان هم شباب الثورة وبتتوعدهم بالتعذيب والاهانه ..سالت نفسي سؤال دايقني اوي...هو دا جيشنا فعلا؟؟؟..طب ياتري فين المجلس العسكري؟؟ وياتري عارف ان رصيده لدينا لم يعد يسمح؟؟
ياتري ماسالش نفسه احنا اتخنقنا ليه؟؟
هل مثلا لان سوزان ثابت تم الافراج عنها مقابل تنازلها عن ممتلكاتها اللي حسب الورق..لا تتجاوز ال 24 مليون دولار...ليه..احنا بنشحت؟؟ وايه تتنازل عن ممتلكاتها دي؟؟ هو احنا بلطجيه ثبتناها ومضيناها علي عقد بيع ف وسط الطريق؟...دي فلوسنا وعرقنا وشقانا ودمنا..
يعني سوزان وكل الحراميه دول وعلي راسهم الشيطان الاكبر مبارك..يتم التعامل معاهم بهذا التباطؤ المقزز..لكن المتظاهرين يتمسكو وتطلع عين اهاليهم احكام عسكريه.....ومبارك يسجل شرايط ويبعتها محطات بره تذيعها..والحياه بمبي ولا فارقه معاه..والراجل عنده ارتجاف اذيني ومحدش يزعله ..ونتنقط احنا بقي
وعلي الجهة الاخري تلاقي احداث فتنه امبابه..قبضو علي كام واحد ويقوللك مش هيتحاكمو عسكري...طب اشمعني..ولمصلحه مين
وازاي الجيش عرف يقتل ناس عشان يدافع عن سفاره الصهاينه
لكن ساب بلطجيه ومتطرفين (الله اعلم مين دافعهم) يقتلو ف مدنيين ابرياء ويولعو في كنيسه
لمصلحه مين الانفلات الامني اللي ف البلد؟؟
والفتن اللي بتولع الدنيا بسبب اشاعه مصدرها مشبوه او خبر هنا او هناك وتلاقي الدنيا ولعت
واحداث ماسبيرو اللي الجيش ماتدخلش فيها خالص؟؟
اه نسيت دا ماسبيرو مش عليه علم اسرائيل...
لمصلحه مين ان الشرطه ماتنزلش وتركب دماغها..وطبعا لا ننكر الدور الجبار لسعاده اللواء منصور العيسوي اللي انا مش عارفه هو عمل ايه لحد دلوقتي
وبرضه زي النظام السابق(اللي اشك انه سابق) يتبع معانا المجلس العسكري نفس الاسلوب القديم..انه يلهينا باي مصيبه تنسينا نفسنا وباقي مطالبنا..
خلصنا من الفتنه طلعلنا مشكله السولار..وكان المظاهرات هي السبب..دا علي اساس ان كل متظاهر بيشرب لترين سولار علي غيار الريق كده عشان يعرف يأدي ف المظاهره..
نسينا السولار يقولولنا دي مصر هاتفلس ف خلال 3 شهور...دا لو محل بقاله عمو ميجو اللي علي اول شارعنا..هاياخد وقت اطول من كده عشان يفلس ..وللاسف الناس البسيطه مش فاهمه..بقت تقدس الجيش وكأنه نبي مابيغلطش..ولو غلط..فهو معذور..
يامجلسنا العسكري..اسفه جدا الكلام ده كان زمان...
احسن لك..وللمؤسسه العسكريه وللبلد كلها
ارحل
ارحل وكفايه تخبط
وكفايه غموض
ارحل وخلينا نبني البلد بقي..ونعرف طريقنا من غير وصايه..زهقنا من دور الابوه ودور العالم بكل شئ اللي بيتحكم في حياتنا
زهقنا محاكمات عسكريه وتطرف وفتن وتهديد بالجوع وتخوين فينا
بجد رصيدكم نفذ لدينا ومفيش اي مجال لاعاده الشحن
لا الدوله المدنيه ولا الديمقراطيه هاتتحقق بالشكل ده
ولا يمكن ابدا تحت اي ظرف اثق في حاكم كان معينه الديكتاتور المخلوع في منصبه
مهما ادعي انه حما الثورة او غيره..
كانت فين حمايه الثورة طول ال 18 يوم؟
كانت فين يوم موقعه الجمل؟
كانت فين لما القناصه كانو بيقتلو شباب زي الورد قدامكو والبلطجيه بيهجمو علي المعتصمين ف التحرير
اسفين جدا
احنا ماخترناش المجلس العسكري ده
وبنرفضه
وبنطالبه انه يرحل
ا
ر
ح
ل

Wednesday, February 16, 2011

ارجو النشر

مقترح وزارة انتقالية من كفائات مستقلة (تكنوقراط)

أجمعت أغلب قوى الثورة و القوى الوطنية و المجتمع المدني في مصر على ضرورة حل حكومة أحمد شفيق التي تمثل بقايا النظام البائد و حل محلها بحكومة مدنية من الكفائات المشهود لها بالنزاهة و الاستقالية و المعروفة لدى جموع الشعب.

تم التعبير عن ذلك المطلب في بيان ائتلاف شباب ثورة الغضب و بيان لائتلاف الجماعات الحقوقية و بيان ائتلاف المهنيين.

بمبادرة من مدونين و نشطاء مستقلين طلب من المهنيين اعداد قائمة بالأسماء المناسبة لغشل تلك الوزارة بحيث ينطبق عليها الشروط التالية:

  1. أن تخلو تماما من أعضاء الحزب الوطني و رموز نظام مبارك
  2. أن تخلو من القيادات الحزبية حيث أن دورها الانتقالي يجب أن يتم في حياد تام
  3. ألا ينوى أي من الوزراء الترشح للرئاسة أو للمجالس النيابية في الانتخابات المقبلة
  4. أن تكون شخصيات فوق الشبهات و خصوصا شبهات الفساد أو استغلال المناصب
  5. كما اشترطنا أن يكون وزير الداخلية مدني و من خارج جهاز الشرطة، يفضل أن يكون خبير قانوني له مواقف ضد التعذيب
  6. نظرا للثقة في المؤسسة العسكرية يترك أمر اختيار وزراء الدفاع و الانتاج الحربي و ما شابه للمجلس العسكري

و بالفعل على هامش الاجتماع التأسيسي لائتلاف المهنيين قامت مجموعة من المهنيين و أساتذة الجامعة باقتراح قائمة موسعة و أكثر من شخص لكل منصب، و تطرح هذه القائمة على قوى الثورة و خصوصا الشباب لاختيار ما يفضلونه منها و تطرح على المجلس العسكري لاثبات أن لا نقص في الكفائات و لا داعي لاستمرار حكومة شفيق المرفوضة شعبيا و الفاشلة اداريا

الترشيحات

ريس الوزراء

  • ابراهيم فوزى
  • جودت الملط
  • حازم الببلاوى

وزارة العدل

  • تهانى الجبالى
  • زكريا عبد العزيز
  • نهى الزينى
  • نور فرحات

وزارة الداخلية

  • محمود الخضيرى
  • نور فرحات
  • هشام فرج (طبيب شرعى مؤلف كتاب عن التعذيب)

وزارةالمالية

  • احمد سيد النجار
  • حازم الببلاوى

وزارات الاقتصاد والاستثمار والصناعة والتجارة

  • ابراهيم فوزى
  • احمد جابر (أستاذ هندسة كيميائية بجامعة القاهرة)
  • احمد حسين (استاذ هندسة انتاج بجامعة عين شمس)
  • شريف دلاور
  • يحيى حسين
  • ابراهيم العيسوى

وزارة الاعلام

  • محمد عبد المنعم الصاوى
  • محمود سعد

وزارة الثقافة

  • بهاء طاهر
  • عادل السيوى
  • محمد عبد المنعم الصاوى

وزارتي التعليم العالى والبحث العلمى

  • محيا زيتون
  • مصطفى كامل السيد
  • رشاد برسوم (استاذ طب و باحث معروف)

وزارة التربية والتعليم

  • صلاح سبيع
  • محمود كامل الناقة
  • همام بدراوى زيدان
  • كمال مغيث

وزراة الصحة

  • شريف مختار
  • عبد الحليم بدر الدين (استاذ طب الاطفال بجامعة الاسكندرية - اول من وقف ضد هدم مستشفى الشاطبى)
  • محمد حسن خليل (الحق فى الصحة)

وزارة الخارجية

  • احمد يسرى
  • احمد يوسف (استاذ علوم سياسية)
  • محمد رفاعة الطهطاوى (سفير)
  • نبيل العربى (سفير سابق بواشنطن و اشتهر بمواقف مستقلة منها الدفاع عن البرادعي ضد حملة التشويه)
  • هانى خلاف (سفير)

وزارة التضامن

  • شريف عبد العظيم (جمعية رسالة)
  • عزة كامل (الوان واوتار)
  • عماد ثروت (جمعية سلامة موسى بالمنيا)
  • هنا ابو الغار (عيادة الامل)

وزارة الاسكان

  • حسب الله الكفراوى
  • ممدوح حمزة

وزارة النقل

  • عصام شرف

وزارة القوى العاملة

  • خالد على (المركز المصرى للحقوق الاقتصادية والاجتماعية الذي نشط في حكم الحد الأدنى للأجور)
  • حمدى عبد العظيم (استاذ ادارة- رئيس اكاديمية السادات)

وزارة الاتصالات

  • احمد حسين ( تي اي داتا و من أهم أنصار اللينوكس و البرمجيات الحرة بمصر)

وزارة البيئــة

  • مواهب أبو العزم
  • هالة بركات

وزارة الاوقاف

  • محمد جبريل

وزارة الزراعة ووزارة الرى

  • عبد الفتاح مطاوع رئيس قطاع النيل

كما تقدم المهنيون بمقترحين آخرين للفترة الانتقالية:

أولا تشكيل مجلس رئاسي مزدوج (مدني عسكري) تسلم له السلطة، بحيث يكون تشكيله:

  • المستشار أحمد مكي
  • المستشار أشرف البارودي
  • رئيس الوزارة الانتقالية
  • رئيس المحكمة الدستورية العليا
  • ممثل عن القوات المسلحة

ثانيا تشكيل لجنة للاشراف على عملية مطاردة الفساد في الدولة و فتح ملفات المسئولين السابقين برئاسة السيد جودت الملط رئيس الجهاز المركزي للمحاسبات و يضم اليها الأجهزة التالية:

  • مباحث الأموال العامة
  • نيابة الأموال العامة
  • النيابة الادارية
  • الرقابة الادارية
  • جهاز الكسب غير المشروع
  • المركز الوطني لتخطيط استخدام أراضي الدولة

رجاء نشر تلك المقترحات على أوسع نطاق و النقاش فيها، الفترة الانتقالية مهم جدا أن تتم بقيادة من يمثلنا و يجب أن تكون تحت رقابة شعبية يقظة


منقووووول

Tuesday, May 11, 2010

حالة كده ...





كالعادة باغطس كده كام شهر وبظهر فجأه في المدونه..


وكالعاده برضه بظهر ف اوقات غريبه اوي..يعني انا مثلا دلوقتي ف عز ايام الامتحانات الجمييييييله..ايه ده انت بتقول عز؟؟
بس حاسه اني لو مكتبتش اي حاجه هطق و اموت م الغيظ
اللي يفرس اني بقالي كتير جدا الحاله المزاجيه للكتابه عندي ف النازل ومش عارفه اكتب اي حاجه
فكميه الكبت اللي جوايا حاليا محدش يتخيلها
حاسه اني قطب موجب..بستقبل حاجات كتير..تفرح تدايق مش مهم..المهم اني مش عارفه اطلع اي حاجه جوايا
جربت اتكلم مع صحباتي..نخرج سوا.. . هم نص ساعة وبزهق...طب هتكلم ف ايه..ماهو الحاجات اللي خانقاني مش عارفه اقولها حاسه انها حاجات نصها مش مستاهل الكلام عنه ومجرد تراكمات والنص التاني مش عاوزة اتكلم فيه اساسا عشان هتخنق زياده
طب اعمل ايه انا دلوقتي :D
جربت اقرا..اهتم بحاجات جديده..اغير مواعيد نومي..اصاحب ناس جداد..اغير اكلي..نزلت اشتريت حاجات كتيييير....حتي اني بدات اذاكر..طب تخيلو اناااااا واعوذ بالله من كلمه
اناا..لما اذاكر دا معناه ايه..هو الملل وصل بيا للدرجادي
حاجه كمان ..غالبا هي نتيجه لمزاجي اللي زي الزفت
انا مباقيتش طايقه حد..الناس دلوقتي ف نظري كتله من القرف والغش والتلوّن...قال يعني انا اللي ملاك..طب ماهو انا برضه م الناس وبغلط..لييييه بقي منصبه نفسي عليهم قاضي وبقول مين حلو ومين وحش..مانا كده ابقي مقرفه ومتلونه برضه...اذن انا مش طايقه نفسي كماننننننن بالاضافه الي اني زي ماقلت سابقا مش طايقه الناس
جميل جميل
فيييييه حاجه غلط...اكرر..فيه حااااجه غلط..كمان مره..فييييييييييييييه حاااااااااااااااااااجه غلططططط

انا هتجنن

وبمناسبه الحاله الرائعه اللي انا فيها دي..

قريت النهارده قصيده تحححفه للشاعر علي سلامة..
حسيت اوي انها بتعبر عني


معرفش ليه تنحت للدنيا كده
وفجأه لقيتني مسكون بالملل
معرفش ليه..
لا عندي رغبه في البكا
ولا في الكلام
ولا عايز انام
ولا حتى بسأل ايه ده ايه
واخرتها ايه
و ايه العمل
حاله كده

وبخاف أقول لأي حد
أحسن يقوم يـقلبها جد
أو حد صاحبي ينزعج
يمد أيده جوه قلبه من باب الكرم
عشان يشاركني الألم
أو يستلـفلي مـ اللئيم حبه أمل
حاله كده
حاله كده ..معرفش أيه

ساعات تزورني في الشتا
في الربيع
في الحر وفــ عز الشتا
وتجيب حاجات ..
لا فيها روح ولا ميته
حاله كده
لا معاها ينفع كلمتين
ولا غنوتين
ولا لقطه من البوم صور
ألاقي قلبي في الهوا ويا الكور
وبخاف أقول لأي حد
أحسن يقوم يقلبها جد
حاله كده .. معرفش أيه
لكني برجع منها من بعد السكات
فاكر شويه ...
فاهم شويه في اللي فات
حاسس أوي بحضن الصحاب
محظوظ أنا ..
ساعات بشاور
يتـفتـحلي ألف باب
لكني برجع أغلط في الحساب
ومعرفش ليه
تنحت للدنيا كده
محدش يعرف ليه ينوبه فيا ثواب :(:(

Saturday, February 20, 2010

بعدك علي بالي




النسمات المتسللة في خجل


تحمل رسائل من نيسان


عشقي الابدي


الشتاء يقاوم النعاس كطفل شقي بعد يوم ملئ بالعبث
لكنه سيستسلم في اخر الامر
و اصحو من سباتي


نغمات رحبانيه تحلق بي بعيدا بعيدا


الي ارض يغمرها الربيع فقط
انتظر القادم من المجهول


كل عام ينقضي

يقترب اكثر

اشعر بذلك وان كنت لازلت اجهل احداثياتك


لم يتبق الا القليل ياعزيزي


سنلتقي


حتما سنلتقي

Sunday, February 14, 2010

انفلوانزا البني أدمين..من وحي الفالانتين


الاسبوع اللي فات كان كارثي بكل ماتحمله الكلمه من معني

فنتيجه الجو قارص البروده للي كنا فيه ده..((بغض النظر عن اليومين الحلوين اللي احنا فيهم دلوقتي))..كانت النتيجه الطبيعيه لامثالي من كارههي البلوفرات اني اصاب بالتهاب في الحلق خلاني معرفش اتكلم اصلا..

وعشان النكته تكمل كنت مضطره اتغلب علي الااااااامي واروح فرح واحده صحبتي..وانا سايلانت كده ودا ف نفس الوقت كان لحسن حظي لان كل صحبات العروسه كانو بيزغرطو وانا طبعا نظرا لظروفي معرفتش لكن مش دا السبب الوحيد..فانا اساسا مبعرفش ازغرط لكن طبعا مقلتش لحد واكتفيت بحجه زوري هههههههه فالحمد لله الحكايه دي حصلت عشان تمنع فضايح كتير

بعد الفرح قضيت ليله بشعه اخري لما فوجئت ان التعب بلغ بيا مبلغه وان بسبب كرتونه الاستربسلز اللي بلبعتها وياريتها جابا نتيجه بدات احس ان فيه عيال صغيره بتتنطط ف معدتي..شعور غبي بصراحه خلاني مش طايقه روحي ومش عارفه انام

قلت معلش

حاولت اتغلب علي كل ده وانام..ماهو انا محدش يقدر يقف قصادي ف النوم..لو مانمتش ال 15 ساعه بتوع كل يوم اتعب بصراحه..لازم اعوض ايام الذل بتاعت الامتحانات

صحيت الصبح وانا مش عارفه اخد نفسي..خير يارب..فوجئت ان الحاله اتطورت..وان التهاب الحلق انضم ليه زكام

واختفي حرف الميم من حياتي وتحول الي باء واصبح صوتي اشبه بصوت يوسف شعبان في مسلسل الضوء الشارد..الامر اللي دفعني اني اتوقف تماما عن الرد علي اي تليفون حفاظا علي مشاعر الناس اللي بتتصل..دا غير انهم كتير اوي كانو بيفتكرو انهم اتصلو بنمره غلط او يقولولي..حضرتك مين(بفتح التاء)

كانت المشكله التالته لما اعلن بابا اننا رايحين معرض الكتاب..قلتله وانا مدهوله تماما من اثر الادويه..

تاليستشلهعلاسشليسشالينتسلينشتسليش7هع

؟؟؟؟؟؟؟

ترجمت له اختي معاناتي وقالت له

بتقوللك هو لازم اروح معاكو..انا تعبانه جدا

قاللي ايوة لازم لان المعرض هيخلص بعد تلات ايام تقريبا وانا مش هفضي بعد كده

عدت لاقول له:

نتالتنيلنتالاتببيبلسثسث

((ماتروحو انتو وسيبوني))

قاللي براحتك بس انا كنت فاكرك عاوزة تشتري الكتب اللي كنتي بتدوري عليها ومستنياها طول السنه

امري لله

رحنا القاهره واللي حصل هناك يحكي في بوست اخر علشان مايكفيهوش البوست ده بصراحه

بدات احس اني تعبانه فعلا وسخنه دا غير اني من كتر الزكام.((اختي الله يساااامحها اشترتلي مناديل مصنوعه من جلد التماسيح تقريبا هههههههههههههه.))..اصابتني بالتهابااات بششششعه في بقي ومناخيري ..بقيت بخاف ابص للمرايه لحد دلوقتي بسببها

حاولت اتغاضي عن كل ده..صحيح عندي خطوبه واحده صحبتي كمان ايام بس اتعشم ان كل ده يكون راح وقتها ..

بس ازااااي..صحيت النهارده احسن الحمد لله

بس خير اللهم اجعله خير ببص ف المرايه

لاقيتني طلعلي بق تاني جمب بقي

ببص كويس

عااااااااااااااااااااااااااااااااااااااااااااااااااا

وكنتيجه طبيعيه لاي دور برد يحترم نفسه..واستكمالا لمسلسل التشوه..جالي هربس لطيف اليف مؤؤؤلم جداا تاني..الامر اللي خلاني للمره التاني افقد القدره مش علي الكلام بس لكن وحتي الاكل...

باقي من الزمن اقل من يومين ع الخطوبه وانا بهذه الحاله التي يرثي لها..اضيفو لكده نوبات الكحه اللي ظهرت فجاه كاني اسطي قديم في الشيشه..لا تنسوا تشوهات المناديل اياها..

انا دايما متعوده قبل اي مناسبه يحصللي حاجه لذيذه كده..قرصه نموسه ف مكان واضح ف وشي..حبايه غلسه تطلع بدون سبب..تعويره ظريفه تزين جبهتي..لكن اللي حصل ده كله..كتير عليا والله :D

اللي لفت نظري اكتر ان اصعب حاجه واجهتها ف دور البرد الخرافي ده مش اعراضه..والله اعراضه تهون وكبيرها قرص بنادول..لكن تبعات الدور هي اللي عجيبه شويه هههههههههههههه ربنا يستر بقي وماصحاش بكره كمان الاقي حاجه تاني..مانا اتعودت طول الاسبوع

الي فات اني كل ماصحي الاقي تغيير جذري ههههههههه

انا عارفه ان كل الكلام العاتشيفي اللي قلته فوق دا مالوش اي علاقه من بعيد او قريب بالفالانتاين اللي مااخدتش بالي انه النهارده الا من ساعات قليله..وماهانش عليا اسيب المدونه فاضيه كده وبتنش..حتي مايصحش
:D
كل سنة وانتو طيبين..يلا عشان متقولوش حارماكو من حاجه
المهم بس
دعواتكو كحححححكححححححكححح..ليا كح كح بالشفاء العاجل كححححح
تحديث..


صحيح..استكمالا لمسلسل التشوهات اللي حصل لي..
امبارح تعرضت لحادث مؤسف كان نتيجه ليه اني اتعورت ف جفني..ودلوقتي صحيت م النوم والمنظر مش لطيف بالمره ههههههه مع العلم ان الخطوبه بتاعت صحبتي النهارده..انا بدات احس ان الخطوبه دي نحس عليا..واني لو اصريت اروحها ممكن ينزل نيزك ولا حاجه او تحصل اي كارثه ههههههههه بجد انا اتعقدت اعمل اييييييه انا خايفه ابص ف المرايه