Tuesday, February 13, 2007

دا اسمه كلام؟

احباط عام بلا سبب..او بالتأكيد هناك سبب خفي وبالتأكيد ايضا انا لا اعرفه
الغريبة انني اشعر به بعد حاله عجيبه من النشاط والانفتاح علي الحياة ثم بوووووووووووووم هبطت الي الارض السابعه بلا اي داع
! اللعنة علي تقلباتي

Monday, February 05, 2007

2........ترافشخانات

احيانا ترغب في صفعها حتي الموت تلك الكره الكامنه في تلافيف الانبعاجات الفطريه في
لاوعي الواقع الحزين الدرامي الذي يدعو الي الشفقه
كما ان انبعاثات الهبوط اللا منطقي المتواصل لا تكفي لصنع فرضيه الوجود الحتمي للاحتمالات المعقوله في التوحد الاستنباطي الضعيف
وعلي صعيد اخر..كل الامكانات الزاءله لـ لاحدوديه الاستنتاج المنبثقه من تفتح حديث لعقليات كانت كامنه اسفل دهور من نسيان تلك القدرة المعقده جعلت من البحث الذاتي وسيله مهجورة بالرغم من
جدواها عند زوال اسباب انشقاق الافتراضات المتعلقه بهذا المنهج وهذا مايرفضه كل متعمق الدراسه
بهذه القضيه
م الاخر ام نوال ماعجبهاش القرنبيط اللي اشترته البت ساميه بنتها من الواد عرفه وقررت انها حاتعمل قلقاس مع الكوارع وامرها لله..وان دي اخر مره حاتخلي حد يشتريلها حاجه داغير ان حايبقالها كلام مع امه اما ترجع م الحجاز..لان دي تاني مره يعملها فيها الشهر ده

Saturday, February 03, 2007

انا الزعيم

كنت نايمه علي سريري ف امان الله...بابحلق ف السقف كأني اول مره اشوفه....بافكر ف حال البلد..اللي...............زي الفل ..الدبلان كده
قلت يابت يا مي ..ماحدش حايعرف يعدل البلد دي زي مابتحلمي..الا انتي ..وزي ماحنا عارفين..ما حك جلدك مثل ظفرك
وف ساعتها ظهر قدام عيني خطة انتخابيه خمسيه..مكونه من سبع نقط بس اختصرتها ف عشر نقط منعا للاطاله يعني وحسيت وقتها ان دي الخطه اللي فيها الشفااا ان شاء الله ..علي الله يطمر وكله بثوابه برضه
اولا..حالغي قنوات الميلودي والمزيكا والتشات والقرف ده..ولا اقوللكو...حافجر النايل سات واعمل قمر صناعي تاني علي نضافه واختار القنوات اللي عليه بحيث تبقي حاجه محترمه..لاتخلو من الترفيه بس بلاهة قله ادب بقي زهقنا
ثانيا..حانفي عادل امام. وحسين فهمي و هاني سلامة و يسرا و دينا و هاله سرحان وايناس الدغيدي ...بره مصر...او احتمال كبير مااديلهومش شرف الخروج ..واعتقلهم من غير اي تهم واصادر اموالهم واوزعها عالشعب..افترا بقي اشمعني يعني بتعمل كده ف الاخــ...ولا بلاش اسكت يابوقي
.ثالثا..باقي المطربين النص كم بتوع الكليبات اياها..حاحطهم ف صندوق زباله كبيييير وبعدين اولع فيهم عشان اكتشفت ان دول مالهمش حل الا كده
رابعا..حاعمل اتفاقيه مع سويسرا انها تسلم مصر الاموال المتهربه ف البنوك مقابل انها تاخد حصه منها
(عشان ترضي تسلمهالنا بقي....تفكير سياسي يعني)
خامسا..حابطل استورد قمح من امريكا وليكن مايكون.....ناكل دره ناكل شعير..بس مانمدش ايدنا لحد.. وطالما بنعمل كده حانقدر نستغل المساحات اللي بتتزرع بالحاجات اللي مالهاش لازمه واللي مابتسدش الجوع ..ونزرع القمح زي ماكنا زماان...دا غير اني حالغي مشروع توشكي اللي بنرمي نص فلوسنا ف الارض علي حسه بقي
سادسا:حاعين بابا يبقي النائب بتاعي وحاعين ماما المتحدث الرسمي باسم الرئاسه مش عشان هما ابويا وامي طبعاااا
سابعا:حاعين البت اختي الصغيرة وزيرة الشباب والرياضه واخويا وزير الصحه وحاكون وزاره اسميها وزاره الستات واخلي رنيم صحبتي نصيرة المرأه الوزيره بتاعتها وهيه وعدتني انها حاتعدم كل الرجاله مش عشان هما اخواتي ومعارفي ابداااا
ثامنا:مش حاسكن ف قصر الرئاسه..حاسكن ف بيتنا علشان اوضتي بحري وكمان مش متعودة ابيت برا
تاسعا: حارفع الكلفه مع الشعب يعني مالهاش لازمه سياده الريسه راحت سياده الريسه جت..اسمي مي حاف لازم يحسو ان اللي قدامهم قريب منهم من غير القاب كده اريح يعني عشان مايخافوش مني ويقولو اللي نفسهم علي طول. بدل مالاقيهم بيشردو لي عالنت وف صحب المعارضه واللهم لا شماته بقي.....ولو اني عارفه انهم اكيد اكيد حايحبوني صح ولا ايه ياجااابر؟؟؟؟؟؟
عاشرا:حالغي القانون اللي بيجرم بيع الاثار وحابيع الاثار المتخزنه ف المتحف دي واللي كل من هب ودب بيتفرج عليها والشعب مش لاقي ياكل...ابيعهم والفلوس اللي تيجي منهم تتوزع ..يعني الحي ابقي م الميت ..هما الفراعنه حايقرفونا وهما صاحيين وهما ميتين كمان..والمواطن اللي يلاقي اي حته اثار كده ولا كده يتصرف فيها وحلال عليه اللي ييجي منها
لكن طبعا فوجئت ان احلامي ماوقفتش عند كده زي ماتوقعت الاول.....لكن هذه قصه اخري

Friday, February 02, 2007

لون جديد

زهقت م الاخضر والتركواز اللي باكتب بيهم قلت اجرب لون جديد..وطبعا مش سهل لان الخلفيه اخضر غامق....انا عارفه ايه اللي خلاني اختارها يلا بس اعتقد ان اللون ده مناسب

معقول؟

استيقظ صباحا ...كاي يوم عادي
امسكت بموبايلي وتفقدت اذا ماكان قد اتصل بي احد خلال ال 12 ساعه التي نمتها لاجد ان عدد المكالمات صفر..نظرت في دهشه مصطنعه.. خاصه لمن يعرف انني اعتدت علي هذا...كرهت الجميع للحظة....تذكرت بلا داعي انني لا اعرف تاريخ اليوم...تفقدت النتيجه....انه الثاني من فبراير..لا بأس
توقفت لثانيه في دهشه حقيقيه هذه المره.....اذن انا ادون منذ عام؟؟؟