Saturday, November 22, 2008

رسالة بنت مصرية..الي السيد رئيس الجمهورية

رسالة بنت مصرية..الي السيد رئيس الجمهورية
سيدي الرئيس
بلاش بابا حسني
لاني لما بحتاج ابويا ف حاجه مش هبعتله جواب
برضه بلاش عمو حسني
لاني ع الاقل بشوف عمي ف المناسبات ف بيت العيله
خلينا رسمي احسن
هكلمك ك_مجرد_مواطنه عندها مشكلة
انا ليا مظلمه
رفعتها لله سبحانه وتعالي
بس علشان ماتقولش ماكنتش عارف وربنا بيحاسبك عليهاهقولهالك بصفتك ولي الامر
مش انت ولي امري برضه؟؟
طيب انا هشتكيلك واستحملني
انا مش بكتب الجواب علشان اشتكي من الغلاء.
.ولا من اسعار السلع اللي وصلت للسما
ولا اسعار البنزين العاليه مع ان العالم كله البنزين فيه نزل النص
مش هتكلم عن رغيف العيش اللي محدش بيلاقيه
حتي اللي بيلاقيه بياكله بزلطه بمساميره ب سلطاته بابا غنوجه وساكت..برضه الحمد لله طب
كويس انه لاقاه
مش هسألك خصخصتو البلد ليه ياريس..ولا فلوس الخصخصه راحت فين
ولا ليه شركات من القطاع العام اتباع بملاليم في مزادات مرسومه ومتخطط لها ومتفصله علي ناس
معينه بيبعوها بعد كده بملياراات
ولا هستفسر منك عن فكره بيع القطاع العام كله وتوزيع اسهمه علي المواطنين..وطبعا مش هدوشك تاني بموضوع اجريوم ولا بحكايه اخوه موبكو اللي بشوف دخانه من
بيتنا..لانك اكيد عارف الحكايه..وطالما ساكت يبقي انت ادري بمصلحتنا دا غير ان الشركه
وعدت انها هتبني مستشفي ف المنطقه عشان تعالج اللي هيتسممو..حد لاقي؟؟
مش هسألك عن قانون المرورولا عن المثلث ابو 40 جنيه ولا عن وجهه النظر العبقريه اللي خليتهم يقررو ابعادة وحجمه
ولا عن جدوي شنطه الاسعاف اذا كان اغلبنا مابيعرفش ازاي يعمل اسعافات اوليه اصلا
ومش متدايقه من الضرايب مع انها قطمة وسطنا
ولا فواتير التليفون والنور والميه
ولا هلومك علي حادثه الدويقه الله يرحمهم جميعا
ولا هسألك مين اللي حرق مجلس الشعب ومصلحته ايه
ومين غرق عبارة السلام
ومين هرب ممدوح اسماعيل
وفين الضحايا وايه سر اختفائهم؟ومين قتل سوزان تميم
ولا مين ادانا الصفر ف كاس العالم
مش هتقل عليك واسألك جمال هيورث الحكم ولا لأ عشان عارفه انه بياخد علي خاطره لما حد
بينكشه ويساله السؤال ده
ولا ليه هو امين سياسات الحزب الوطني
ولا ليه وزير الثقافه هو نفسه وزير الثقافه
مع ان الثقافه ف البلد من عهد سيادته ف النازل
ولا ليه ماستقالش بعد حريق المسرح القومي
ولا ليه ماقبلتش استقالته لما قدمها ايام حريق مسرح بني سويف
ولاليه وزير الماليه هو هو
وحبيب العادلي بيعمل فينا كده ليه
وليه المناهج بتاعتنا كده؟وليه بنستورد قمح..وبنزرع كانتالوب؟
وامتي هنفرح بتوشكي؟وليه اليهود لسه ف سينا وليه انتو مطبعين مع اسرائيل؟مع ان محدش فينا طايق ريحة اليهود
وليه مش بتفتحو معبر رفح؟
وطبعا مش هقوللك ليه فيه ناس لحد دلوقتي بتبات جعانه..وبتصحي جعانه
وبتكمل يومها جعانه
ولا كام طفل ف الشتا نامو بردنين وانت دفيان ف سريرك
ولا كام شاب عاطل
ولا كام اب مش قادر يعول اسرته بمرتبه اللي مايكفيش عيش حاف دا لو لقي العيش طبعا
ولا هقوللك ان الاطفال بيموتو ف المدارس من الضرب
ولو ماماتوش ف الضرب هيموتو ف المستشفيات من غاز النيتروز المسمم
ولو ماماتوش من الاتنين هيموتو ف حادثه قطر او يقعو ف بلاعه
او يخبطهم ابن مسئول او يخطفهم تاجر اعضاء ..بعد كده الحكومه تقول عليه انه مريض نفسي
ولا ليه يوسف شاهين اتعالج علي نفقه الدولة وناس تانيه احق بتموت من غير مالدوله تحس بيهم
انا مش بعتالك علشان دول ياريس
انا اللي مدايقني ابسط من كده بكتيرمع انه تاعبني اوي
انا خايفه
مبقيتش بعرف اعيش وانا مطمنه
مبقيتش بعرف امشي ف الشارع
لا بالليل ..ولا بالنهار
بقيت اخاف انزل من بيتنا اروح الكليها
و ازور واحده صحبتي
من اللي بشوفه...خايفه..
بمشي ف الشارع بتلفت حواليا
ابسط حقوقي كمواطنه اني اكون امنه علي نفسي وعرضي ومالي واهلي
وانا فقدت احساسي بالامان من الاربع جهات دول
مش عارفه وانا ماشيه ياتري حد هيسمعني كلام يخدش حيائي؟؟..ولا يقوم بتصرف يخدش حيائي؟؟ ولا يسرق
شنطتي..ولا يخطفني انا شخصيا؟؟؟
انا بقيت اخاف امشي ف شوارع مصر ياريس من اللي بشوفه
بقيت احبس نفسي ف البيت وبنزل للضروره
تخيل طالبه جامعيه تخاف تنزل كليتها؟بخاف ليه؟بخاف لما بنزل من العيون اللي باصه عليا واللي مش خايفه من ربنا ولا من الناس بخاف من ايدين الشباب اللي مش بتلاقي اي مانع انها تتمد عليا وعلي غيري من البنات...شيئ
زاد وبقي مثير للاشمئزاز والرعب من الايام الجايه
بخاف لما بشوف نظره اللمبالاه في عيون الماره ولسان حالهم بيقول خلونا ف حالنا دا شكله واد
صايع..سيبها تولع
بخاف لو فكرت اخد خطوة جريئه واعمل محضر لاي كلب دايقني ف الشارع
يفتري عليا بحاجه انا بريئه منها ومحدش وقتها هيدافع عني وهتعامل وقتها زيي زيه..بالعكس انا
اللي هكون ملامةا
او الظباط نفسهم يعملو معايا نفس اللي عمله وانا ف القسم زي ماحصل لكتير
بخاف من ظباط الامن المركزي
والشرطه
بخاف من لجان المرور..لان ممكن لاي ظابط يوقفني حسب مزاجه
بخاف لما راكبه تاكسي لوحدي او مع غيري..او راكبه ميكروباس وسط 15 بني ادم
بخاف لما ببقي راكبه مواصله ونعدي علي حمله
ويقرر الظابط انه يلم تلات اربع شباب وينزلهم وياخدهم بدون اي جنايه او شبهه لمجرد اننا نعيش
تحت ظل قانون الطوارئ
بخاف لاني عارفه ان لو ظابط قرر يعمل كده معايا..محدش هيقف ف وشه
بخاف علي ماما و بابا لما بيسافرو لوحدهم من قطاع الطرق اللي انتشرو في البلدب
خاف ظابط يفتري علي حد من اهلي ويقبض عليه من غير اي سبب(واظن بتحصل كتير)بخاف لما بسافر بره مصر ..اتجلد!! او اتظلم وساعتها هبقي زي اللي ف غيابات الجب محدش هيعرف عنه حاجه
بخاف من العصابات اللي بيخطفو البنات ف عز الضهر ومحدش بتحرك ينجدهم
زمان كانو بيقولو البنت اللي بتخاف علي نفسها ماتمشيش ف الشارع بعد 8 بالليل
طيب ايه جاب 8 بالليل ل 8 الصبح ياريس؟
وليه نفس الوشوش المخيفه اللي قالولنا انها بتظهر بعد 8 بالليل هي نفسها نفس الوشوش اللي بقت
تظهر 8 او 9 و10 و12 الضهر؟ وف كل مكان
ليه كل الناس بقوا ف نظري مشبوهين
ليه كلهم ف نظري بقو حرامية
ليه كلهم ف نظري بقو ظلمة
طب هو انا اتجننت؟؟
ولا دا حقيقي
يمكن اللي يقرا كلامي يكون شايفه حاجه بسيطه او ماتجيش حاجه جمب المصايب اللي عايشينها او
انا مضخمه المسالة ويقول مين العبيطه دي
يمكن اكون كده فعلا
بس
والله والله والله
انا خايفة
خايفة ياناس
خايفة يابشر
خايفة ياريس
وربنا هيسألك علي خوفي وروعي يوم القيامة
صحيح يمكن هيسألك عن حاجات تانيه كتير غير دي
بس انا ساعتها لو سامحت عن كل حاجه
مش هسامح ف دي

6 comments:

يا مراكبي said...

قال رسول الله صلى الله عليه وسلم: كلكم راع وكلكم مسؤل عن رعيته

والحساب يوم القامة سيكون عسيرا جدا .. لا أدري لماذا لا يخشاه الحكام ولماذا لا يفكرون فيه؟

حسبنا الله ونعم الوكيل .. يمهل ولا يهمل

انا حره said...

يااااااااه تفتكرى اللى مسؤل عن كل اللى كتبتيه فالاول هيخاف ان ربنا يحاسبه على خوفك

وبعدين انتى ليه يوم القيامه تسامحى فكل دا وتمسكى فالخوف دا احنا صابرين على كل البلاوى دى عشان عارفين اننا هنطلب من ربنا يوم القيامه ياخدلنا حقنا

ياسمين نعمان said...

ياااااااااااه
كلامك فعلا أثر فيه أوييييي
مش عارفة أقولك إيه بجد
أنا برده خايفة، مش بس من الحاجات اللي انت قولتيها .. انت عارفة إيه أكتر حاجة بتخوفني بجد ..
إن الناس مبقتش طايقة بعض .. على مدونات كتير و جروبس كتير على الفيس بوك الناس مختلفين مع بعض في قضايا صغيرة و بيهاجموا بعض بضراوة، و كأن كل واحد بيطلع كل قرفه و مشاكله فيمن يخالفه في الرأي ..
و عيني طلعت في إن أنا أحاول أقنع الناس بفكرة تعدد الآراء و حرية كل حد في إختيار قناعاته .. و مفيش فايدة و مبقتش عارفة أخرتها إيه و الناس هتوصل لفين
معلش صدعتك .. بس قلت أفضفض أنا
كمان .. إشمعنى انت يعني
:-)))

سلسبيل said...

يامراكبي
كلامك صح بس مين يسمع ومين يفهم ومين يتعظ
بجد بجد بجد
حسبي الله ونعم الوكيل

سلسبيل said...

حرة
انا مستعده اسامح عن كل حاجه ماعدا خوفي
لانه اكتر حاجه معذباني ف دول
ولانه الناتج عن كل دول
عارف احساس انك تبقي ماشيه ف بلدك مرعوبه؟
تصدقي احلا ايام حياتي واللي كنت فيها مطمنه وانا ماشيه لوحدي ف الشارع حتي الفجر!!! كان ف مكه والمدينه ايام ماكنت بعمل العمره
انا ماطلبتش ان مصر تكون حرم امن
واكيد ماينفعش
بس ع الاقل ماتبقاش غابه

سلسبيل said...

ياسمين
قولي ياجميل وفضفضي براحتك
انا متفقه معاكي ف ظاهره ان كل الاطراف بقت تشوف نفسها ح
ومحدش بقي بيطيق يسمع نقد من حد
وكإن اللي بينتقده ده بيعذبه ولا حاجه
كلنا بقينا متحفزين لاصطياد الاخطاء لبعض
وعلي راي الشاعر فؤاد قاعود

المجتمع زي الرصيف.....كملو انتو الباقي