الثلاثاء 3 يوليو......
صحيت من النوم الساعه 10 الصبح علي غير عاده
متفائله وخايفه وقرفانه ومبسوطة ومش عاوزة انزل
فتحت الدولاب اشوف حلبس ايه..فطرت وانا لسه بشاور عقلي اني مانزلش..بصراحه انا مش متعودة علي النظام ده بقي..مابحبش حد يكتفني كده ..انا مش عيله علشان الدكتور كان يعمل كده امبارح ويديني النصايح الظريفة دي..انا ماحدش عمل فيا كده قبل كدااااااا علي راي هاني رمزي
كل الافكار دي دارت ف ذهني ماقاطعنيش غير صوت ماما...مي ياحبيبتي الساعه 12 الا عشره يلا عشان تروحي الصيدليه ياجميل
نزلت ووصلت الصيدليه مالاقيتش صاحبنا..بدات اهدي شويه من الضغط الي كنت فيه
لاقيت هناك الناس اللي بتشتغل ف الصيدليه فيهم واحد عارفنا من زمان اللي هو عمو احمد كان بيقولي وانا ف ثانويه عامة.. ان شاء الله حتيجي هنا لما تدخلي صيدله ..هاهاهاهاهاهاهاها الدوونيا صوغيرة ياجدعان ..دا انا اللي بقول
دخلت وانا متنحه..مش عارفه ايه سر التتنيحه بتاعتي اليومين دول مع اني عاده كنت باعرف اسلك ف اي حاجه وكنت اتريق علي اصحابي لما بيتنحو ف الاماكن الجديده عليهم او وهما بيتعاملو مع ناس مايعرفوهمش
.بس فعلا حسيت ان الجو مطمئن شويه
كانو تلاته
عمو احمد..وواحد اسمه استاذ علاء ((بيتعمد يطلب مني الدوا اللي ف الرفوف العاليه ويقوللي ادي اخره القصر ))..بس حسيت انه ساعات بيبقي طيب معايا وساعات بيغتت عليا جامد
وبنت اسمها ايمان طيبه جدا..صاحبتها طبعا دا اساسي..وكانت بمثابه ملاك حارس من طلبات استاذ علاء الي مابتخلصش..ومن الدكتور اللي بيطب علينا احيانا
قالولي بصي..اختاري الريون اللي يعجبك واقفي فيه..المهم تحفظي ترتيب الادويه ف المكان بتاعك واحنا حنعلمك كل حاجه
سالتهم عن الدكتور اياه قالولي لا دا بيجي بالليل بس
ياااااااااااااااااااااااااااااااااه الحمد لله اني باجي الصبح
اتعودت علي المكان بسرعه...وتصورو..بعت ازازة شامبو وعلبه جل وتلات مراهم مش فاكره اسمهم ههههههههههههههه خير خير
المهم ماحسيتش بنفسي غير الساعه 4 لما بابا وماما جم ياخدوني بالعربيه عشان وحشتهم بقي وبقالي 4 ساعات بره و....احم...خلاص...قلت ماحدش يضحك...
يتبع.............
9 comments:
ربنا معاكى
انا كمان هنزل تدريب قريب
انا اختك فى الصيدله
تحياتى ليكى
مريم
احسن ناس طبعا..
داحنا زمايل بقي
ربنا معانا يابنتي
تحياتي ليكي ياجميل وماتحرمينيش من تواجدك
ازازة شامبو مرة وحدة
وبابا وماما جم ياخدوكي
طب ازي مضحكش انا دلوقتي
بصي هخرج من هنا وبعدين اضحك
:)
كراكيب عادل..
امال لما ابقي احكي علي المواقف اللي بتحصل ..ياربي علي البني ادمين اللي بيدخلو الصيدليه دول
بس عموما عشان انت زبون حسمحلك تضحك جوا المدونه
هاهههاهاهاهاااا
ايه المدونه الجميله ديه
بجد التوبيكس دمها خفيف اويييي
ربنا معاكي يا بنتي يا رب
ارتعاشات
الله يخليك..المدونه جميله بزوارها
لسه لما تقرا الجزء اللي هتكلم فيه عن صفيه الارهابيه حتدعيلي فعلا
منور يافندم واتمني تبقي تشرفني بزيارتك مرة تانيه
ازازة شامبو وعلبه جل وتلات مراهم
ياعينى ياضنايا
دلوقتى بس عرفت لية كلية صيدلة بتاخد مجموع كبير
ههههههههههههههههههه
اباصيري
تلات كومينتات مره واحده..لا انا بحلم يارجاله
انا برضه عرفت ليه صيدله بتاخد مجموع كبير تصور..اكيد بتوع التنسيق غلطو
وبعدين انا عندي مشكله كبيره جدا هيه ان انا ماباعرفش اطول حاجه اعلي من الرف التالت بعد كده انسي
وطبعا مفيش حاجه اسمها اقف علي كرسي او اطلع علي السلم المتحرك الصغيور اللي عندنا اللي بيستخدموه عشان يطولو الحاجات العاليه..لان وقتها ركبي بتشتغل عالفايبريشن...وباطلق عبارات من طراز بلاش الطاقيه عندي حساسيه وباخد جمب لحد ماعمو احمد يطلع يجيب الحاجه....انا بقول يعملو اساسنير او سقالات
منور يازعيم
ارتعاشات..معلش انا لسه صاحيه والفيوزات لسه ماركبتهاش ومااخدتش بالي من تعليقك
يارب تكون المدونه عجبتك واتمني اشوفك منور التعليقات مره تانيه
تحياتي
Post a Comment