الانسان بيحتاج خبرات مش قليله علشان يقدر يتعامل بحكمة وقوة مع الوسط المحيط بيه
وبتكون الصدمه الاولي طبعا مع اول احتكاك حقيقي مع الناس
لما بيكتشف انه ماينفعش يترمي ف حضن بابا وماما ويعيط علشان يضربو الناس الوحشين اللي زعلوه..زي مااشتكالهم زمان من ميس ريهام اللي كانت بتزعقله..او مستر ايهاب اللي كان مستقصده في المدرسه ونقصه درجه ونص ف امتحان الانجليش..وطبعا بابا وماما ماسكتوش ايامها..وكانت ليله ميس ريهام ومستر ايهاب مطينه بطين بعد ماراحو للناظر شخصيا
...لكن مدرسه الحياه ..شئ اخر ياعزيزي
انا باعتراف الكل..ومن ضمنهم انا...بنوته بابا..وحبوبه ماما..وكل الكلام اللي بيحمل اي معني ساخر بين ثناياه واللي بسمعه كتير لما باكون بره مثلا مع اصحابي وماما تتصل بيا 4 مرات وبابا 7 مرات
عادي..عاجبني ومش متدايقه من كده..مش عيب ان الانسان يبقي مطمن ان ليه ملاذ امن يلجأ له ف اي وقت..بس ف نفس الوقت بدات احس انه يبقي عيب اوي بقي اما اروح بأوأ لو حصل مره و دكتور ف الجامعه شخط فيا وانا ف السكشن..يامي انتي كبرتي ((دا انا بقول لنفسي)) وماباقاش ينفع كده ...كده ماينفعش يامي..دي حياتك ومشاكلك حليها بمعرفتك انتي مش صغيره
المقدمة الممله دي كان لابد منها...لان اللي جاي اكثر مللا صدقوني
5 comments:
ماما بتتصل 4 مرات وبابا 7 مرات ؟؟
حظوظ فعلا انا بفضل بالسنة ولا حد بيسئل عني
وتقوليلي مقدمة مملة
عادي عادي
احنا ورانا حاجة
كراكيب عادل
ههههههه ايه محسسني انها حاجه غريبه
او يمكن انا مش شايفاها غريبه علشان اخدت علي كده ..وعموما بتختلف..دانت حتي لو باباك ومامتك بيتصلو بيك كل يوم سبع مرات تزهق يعني ولا ايه دا غير ان انا لو ماحدش عمل معايا كده باتقمص وبفتكرهم زعلانين
هييييييييييييييه حاجة عجيبه..استني الحلقه التانيه نازلة النهارده ان شاء الله
أنا أحسن شوية .. ممكن حد يسأل عني مرة كل شهر يشوفوني عايش ولا ميت
هههههههه
عموما هي فعلا الدنيا كده .. أولها بيبقى صعب كده .. لكن أولها بس
إن شاء الله يكون الموضوع أسهل بعد كده .. صدقيني
يامراكبي
ياريت فعلا يكون الموضوع صعب ف اوله بس..انا عن نفسي ماعنديش مانع..بس انا بحس ان فكرة كوني حاتأقلم مع صعوبة الحياة معناها اني لازم افقد جزء من الطفلة اللي جوايا اللي شويه شويه حاتروح ومش حعرف ارجعها ..يمكن تفتكرني مجنونه بس احيانا بحب ماكونش مرنه وماتأقلمش مع البيئه اللي حواليا وافضل احسس نفسي انها صعبه وماحاولش اواجهها حتي علشان افضل نفس الطفله ونفس البنت البريئه...
هي وجهه نظر.ماشفتش حد اعتبرها مظبوطة لحد دلوقتي غيري..واحتمال ماشوفش
منور يااستاذنا
يا سلسبيل انا مش عارفة مدوناتك اجمل ولا ردودك اجمل انا كل ما اقرأ حاجة كتبتيها احس انك اختى او حتى توأمىيارب نبقى اصحاب
بس على فكرة انا مش موافقاك على انك تفقدى
"جزء من الطفلة اللي جوايا اللي شويه شويه حاتروح ومش حعرف ارجعها"
دة غلط انت تغيرى العالم لكن العالم ما يغيركيش انت تقرهى الشر والظلم بالبراءة والا يبقى العالم كسرك واضافك لقائمة الناس العادية اللى موجودين فى كل مكان لة سمحت ان دة يحصل يبقى انت فقدت تميزك اللى بتفخرى بية
Post a Comment