بدأت اخد علي الشغل..دا اذا كنا حنسميه شغل..دي المسافه بينه وبين بيتنا ماتجيش كام متر..لولا بس ان الدكتور ساعات بييجي مره ف الاسبوع يغلس عليا ويروح كنت قلت ان مفيش احسن من كده ....
بس فعلا بعيدا عن الدكتور..انا مبسوطة اني باحتك بالناس وبتعامل معاهم..دانا شوفت حاجات ياولاااااد
الشعب المصري دا عجيب جدا..اللي يغيظ انه فهلوي فعلا وفاهم انه عارف كل حاجه يعني الواحد من دول
يدخل ..ويبقي لا راح عند دكتور ولا نيله ولا يعرف حاجه عن الطب.ويقعد يقاوح بقي ف الدوا..بس دي حكايه تانيه.....
----
في احد الايام المشرقه..دخلت الصيدليه مزاجي عالي وبدندن اغنيه من البوم عمرو الجديد وباشم ف ورده..
اخدتها من الجنينه بتاعتنا كانت ريحتها حلوة اوي...وقفت ف مكاني الغير مفضل ..الريون الصغير كالعاده
شويه كده ولاقيت ريحه المكان اتغيرت فجاه..اعوذ بالله دا من ايه ده
لاقيت واحد وشايل عيل صغير
انتي دكتورة؟؟ دا الراجل هوه اللي بيقول
في اقتناع وثقه قلت اه طبعا
وكان طارق علام حيظهر فجاه يديني ربع جنيه دهب عشان اجابتي
طيب يادكتورة الواد ابني عيان ماعرفش من ايه شوفي شوفي كده بقه..بينزل منه حاجات غريبه
...يع..جايبلي واد بيريل وعاوزني اعملله ايه..اجيبله كمامه..دانا ف سري
وشوفي كمان..مناخيره ..سايبه علي طول كده..
وشوفي كمان..مناخيره ..سايبه علي طول كده..
حطيت ايدي علي بقي وانا مش قادره خلاص ..بجد حيغمي عليا خاصه ان الواد اصلا شكله معفن..وبحسي البوليسي استنتجت انه مصدر الريحه قعدت ابص حواليا عشان الاقي حد ينقذني..وفجاه لقيت استاذ احمد..الحقني...حد يشيل الواد ده من قدامي دا انا اللي بقول
حد يكتبله علي ديتول وازازة فنيك وبودره صراصير وحيبقي كويس ايه الهم ده...لا واللي يغيظ ان الراجل بعد ماوراهولي مصر يعدي علي واحد واحد من اللي بيشتغلو ف الصيدليه علشان يوريله نفس المنظر وبيسال عن دوا ماعندهم مستشفي يروحو هناك
وكانهم سمعو افكاري..فجاه لاقيت استاذ علاء..((اللي بتغاظ منه احيانا)) بيقولله
ياعم روح بيه المستشفي ((لاننا ف مصيف ومفيش دكاتره متواجدين باستمرار)) ولما يكتبولك علي علاج حانجيبهولك..وسمعته بيقول لنفسه بصوت هامس ...بلاش قرف بقي
بعد معاناه في اقناع الراجل انه لازم يروح ..خاصه ان معاه عربيته يعني مش حياخد وقت
نجحنا اننا نخرجه من الصيدليه وبدات ريحه الصيدليه ترجع لطبيعتها
ابتديت اخد نفسي وقعدت شويه بدل الوقفه طول النهار كده
لكن ماكملتش 5 دقايق لغايه ماسمعت صوت واحد من ورايا
يادكتورة ..ل ل لو سمحت ي
التفت لمصدر الصوت...كنت عاوزة اساله عاوز ايه بس سمعت ايمان البنت اللي بتشتغل ف الصيدليه بتقول بصوت واطي ..يادي المصيبه..انت ايه جابك تاني
وراحت قايلالي..مالكيش دعوة بيه يادكتورة
استاذ احمد واستاذ علاء حيتصرفو معاه زي ماتصرفو قبل كده
طبعا ماكنتش فاهمه حاجه.................بس فهمت
يتبع
3 comments:
الخواطر بدأت تآخد منحنى مشوق جدا .. إوعي يكون طلع حرامي وألا حاجة
التجربة دي هتخليكي أديبة كبيرة في المستقبل على فكرة .. بكرة تشوفي
يامراكبي
ياريته كان حرامي..يبقي ارحم
...
علي فكرة..هوه بالاضافه الي كلام حضرتك ان التجربه ممكن تضيف ليا خبرات ف الكتابه..فانا شايفه انها بالفعل بدأت تضيف ليا خبرات ف الحياة كمان..حتي والله الصيدليه اسمها علي مسمي..اسمها صيدليه الحياة.. تصور؟؟
السلام عليكم
أنا مفهمتيش الرجل ده كان مين
بس بصرف النظر عن أي حاجة تحسي أنك بتحكي قصة مش تدريب بجد ياريت تستمري
و ممكن تتعبقري و تتخيلي قصص
هو الواقع مش ناقص بس بردو خرجي اللي ممكن يكون جواكي
Post a Comment