Thursday, August 28, 2008

الخاطرة السادسة عشرة...بناء علي توجيهات عمنا المراكبي


انا قلت مش معقوله المراكبي بذات نفسه يطلب مني اول طلب ومانفذوش

دي حتي تبقي عيبه ووحشه ف حقي خالص

آدي الخاطرة السادسة عشرة(ولو اني لا بحب رقم16 ولا 6 ولا 60ليه معرفش )..او خلينا نقول الخاطرة رقم ستاشر احسن وسيبنا م الفصحي شوية

اصلها حاجه عامي حلمتنيشي علي قد ماقسم

بصراحة انا وقت التعبير عن المكنون والمستخبي..مبلاقيش احسن من العاميه اللي بتطلع اللي جوايا..

معرفش انا كده خلقة ربنا..

وبصراحة برضه انا لسه ماكملتهاش...وبرضه لسه ملاقيتلهاش عنوان

واحتمال لا اكملها ولا اعنونها..واسيبها مفتوحه...كده احسن


بعيدا عن الرغي اللي انا قلته فوق ده

فالقصيدة اهي..عشان ماعطلكوش فتتخنقو وتحلفو علي المدونه وصاحبتها وانا اما صدقت رجعتلها تاني وطلعت الفرش يتهوا ف الشمس ونفضت التراب من علي الطقم المدهب بتاع الصالون :)

احم احم...




انا حسيت..بشاير نبضة محتارة
ومن شباك عيوني السود
بترميني
قصاد شطك
ومستنيه تسقيني
وانا معرفش ليه حنت
عليك انت
ضفاير بنت متحرم
عليها العشق من قبلك
كأنك صورة محفورة
ف وسط مسام تكويني
وكان بينا المعاد صدفه
علي ورقة نتيجة يوم من الايام
رميتلي سلام
حضن كحلي برموش عيني
.علي النني الكلام تايه
مابيني وبينك اتجزأ
ل سين
مستني رد الجيم
وانا معرفش ف التنجيم
واحب الحلم لما يجيني
يتفسر
بدون تأخير
ولا تقديم
ف ريحني
_عشان خاطري_
ورسيني

5 comments:

يا مراكبي said...

متشكر جدا جدا على تنفيذ الطلب .. ده كرم كبير منك

وبجد بقى .. الخاطرة ال 16 طلعت أحلاهم .. أحلى من اللي فاتوا كلهم

أحسنت

سلسبيل said...

يامراكبي
حقيقي انا اللي متشكره
ومتشكرة اكتر علي رايك فيها
تحياتي

Ahmed Othman said...

كلمات لا تصدر الا من قلمك
انسياب الحروف
هو اهم ما يميز اسلوبك
شكرا لنشر تلك الرائعة
و شكر أوفر
لأخي المراكبي
الذي اتاح لنا تلك الفرصة

تحياتي

أسماء علي said...

اقتباس
....
مابيني وبينك اتجزأ

ل سين

مستني رد الجيم

وانا معرفش ف التنجيم

واحب الحلم لما يجيني

يتفسر

بدون تأخير

ولا تقديم

ف ريحني

_عشان خاطري_

ورسيني

...

بسسسسسسسسس

كده جبتي كل اللي ف الموضوع

و احب الحلم لما يجيني.. يتفسرررر

جميلة اوووووي يا مانو

أكثر من رائعة

دمتِ جميلة

و كل سنة وانتي طيبة يا مانو

سلسبيل said...

دكتور احمد
شئ يسعدني جدا ان يكون دا رايك ف كتابتي
تحياتي ليك
ورمضان كريم