مايو
يعني اول الصيف
يعني الحر والامتحانات....ومشاكل الدنيا الجميلة اللي مابتفتكرنيش..الا ف مايو
يعني نسمة هوا بعد المغرب ...تصحي البنت اللي نامت طول الشتا يمكن..يمكن السنادي تبقي غير اللي قبلها
يعني ريحه البحر اللي واصلالي وانا وسط 100 كتاب وحاتجنن وانزل اتمشي عالشط
يعني امل لبكره ليه ماعرفش.....ويعني حلم قديم بيتفتح من غير استئذان ويدخل من غير معاد
يعني عيد ميلادي اللي عمري ماعرفت احتفل بيه بس باتبسط لاني كبرت سنه...عقلت سنه...
يعني ليلة عيد ميلادي اللي مابانامش فيها...جمب التليفون...اذ ربما اسمعه بيرن الساعه 12وقال ايه..كل سنه وانتي طيبه يامي
وعادة بتكون النتيجة مخيبه للامال بس ولااااا بيهمني برضه الفرحة بتكمل غصب عن الكل
يعني هدية بابا ..وهدية ماما...اللي لازم بتبقي لبس...وشيك اوي طبعا دا زوق ماما...ولازم لازم البسها اول يوم ف الامتحان عشان الكل يشوفها...وكانها مكتوب عليها صممت خصيصا لمي...
يعني حاجات كتير لما باقعد ف البلكونه بالليل بافتكرها...وماعرفش هيه ايه...بس عيني بتدمع من غير سبب
و بحس اني مفتقداها ومحتاجاها اوي
مايو
يعني مايو...
.يعني شهر واحد...لكن دنيا تانية...وقلب مفتوح علي اخره للحياة
2 comments:
كل سنة وانتي طيبة وعقبال مية سنة يا قمر
هبي نيو يييييير
ههههههههههههههههههه
مش عارف لية فكرتيني بمشهد في فيلم جاءنا البيان التالي
بتاع الراجل الي غاطس في البلاعة دة
ولما قال هابي نيو ير
لية محسسة نفسك انك ناقصة حجات كتير بكرة تتمني ان عيد ميلادك يرجع لورا لما تعجزي وتتسندي علي حفيدك
ربنا يسعدك يارب وتنجحي ومصير الايام جاية والسعادة والفضا مستنين
كل عام وانتي بخير يا مي
هههههههههههههههه ايوة حعمل حمام سباحة....للعياااال
هبي نيو ييييير ياباشا
وبعدين انت مش واخد بالك من حاجه
انا كل سنه باتمني اكبر سنه لحد مابقي 19
وبعد كده عاوزة اوقف العداد بقي
منطق برضه مش كده
ههههههههههههههههه
كل سنه وانت طيب :)
Post a Comment