Tuesday, May 29, 2007

ايه النظاااااااام

ان تعشق التنظيم فانت انسان رائع...اما ان تعشق تنظيم حياة الاخرين....فهذا شئ اخر
لامي العزيزة طريقة في الحياة تعتمد علي الجمله الثانيه..
رجعت امبارح من الكلية كعادتي مشتاقة لغرفة نومي الصغيرة..ومكتبي..واشيائي الصغيرة التي اضعها فوقه كان اخرها لوحة زجاجية صغيرة رقيقة وملونة مكتوب عليها اسمي بلون ذهبي كان هديه من مني صديقتي وكنت اضعها في اخطر مكان ..فوق احد سماعات الكمبيوتر.لتكون ظاهره لمن يدخل الغرفه.
...قفزت علي درجات السلم الطويييييييييل في بيتنا...ووصلت كالعادة الي باب الشقه الهث ...فين الصحة ياولاااااااااد
فتحت الباب وسلمت علي ماما....توجهت الي الحجرة و...مهلا.
.مامااااااااااااااااااااااااااااااااااااااااااااا حرااااااام
لا ليس مرة اخري...ياالهي
تسمرت للحظة امام الكمبيوتر الذي تم فصل جميع كابلاته عن الكهرباء...والاربع سماعات المتصلة بالسب ويفر التي تبدلت اماكنها...و.....لاااااااااااااا هدية مني..المقسومة الي نصفين...والادهي...اين كتبي واوراقي؟؟...اين التاتو الذي وجدته في كيس الشيبسي الاسبوع الماضي...لاتسألوني ايضا عن اي شئ وضعته في اي ركن في الغرفة ولا عن عدساتي اللاصقه التي تركتها علي المكتب صباح اليوم..اوحتي كارنية اشتراك النادي الذي نسيته فوق الكومودينو...فقط اسألو امي
...فأمي قد قررت ان تنظف الغرفه اليوم وتنظف حياتي
لييييييييه كداااااااااااااااااااااااااااا
كتمت تلك الصرخه بداخلي...اعترف انني اتمتع بكم من الفوضي في غرفتي ..خاصه خلال ايام كايام الامتحانات..حيث اوراق لا اول لها ولا اخر..هنا وهناك..وبالرغم من بعثرتها الا انني اعرف كل ورقه موجوده في كل ركن وكيف اصل اليها ومتي..واعترف ايضا انني ارتبط باي شئ بسرعه...ك تاتو بطلي المفضل بطوط التي وجدته في كيس شيبسي..وساعة المكتب القديمه بالرغم من انها مكسوره الي 6543543 قطعه لكنها تمثل شيئا ما لي..وورقة باليه وجدتها في مكان ما..وطرأت علي فكره لقصيده فقررت كتابتها عليها..الخ
ماما عندها اعتقاد ان نصف مكونات الاوضه مالهاش لازمة..والنصف التاني محتاج اعاده تنظيم.... ولازم يتنظم بضمير..واهو الضمير ده خلا هديتي تكسر عشان كانت فوق السماعات اللي وماما بتفصلهم عشان تنضفهم وقعت من عليها ..... وورقي يتلخبط علشان كان واخد مساحه م المكتب والاوضه وكان لازم يترتب ف الدرج اهئ اهئ...بس والله مافتحت بقي ولا حاتكلم
انا مش عاوزاها تزعل....طب اعمل ايه طيب اعمل ايه اناااااااااااااااااااااا
انا بس عايزة اوجهلها رساله من موقعي هذا
القليل من الفوضي مفيد احيانااااااااااااا ياست الكل

10 comments:

انتظار مؤقت said...

يظهر ان دي من عوايد الامهات اقتحام الغرف و التنظيف باي شكل و الي يحرق الدم لما تدخلي تلاقي نظام الغرفه متغير السرير مكان المكتب و المكتب مكان الدولاب و الدولاب مكان السرير متقدريش لما تبصي في وشها و باين عليها التعب غير انك تقولي تسلم ايدك يا امي و انتي دمك محروق ...اول زياره ليه عندك بس اكيد مش الاخيره ياريت تنوريني

كراكيب عادل said...

اولا توجهي اليها فورا واشكريها بحرارة ......... بس اطلبي منها انها تقولك علشان تركني حاجتك علي جنب او تكوني معاها علي الاقل

عموما هترجع كل حاجة وهتتعودي علي الشكل الجديد تاني

الهدية برواز جديد

بس هدي نفسك كدة

كلها اسبوعين وتروقي

وتفضي الاوضة نهائي من حجات كتير

تحياتي

LOJAIN said...

عارفة انا لو مكانك كنت ولعتها حرييييييييقة
انا كمان سريعة الارتباط بالاشياء
انا عندى ملاحة متكسرة 6000 حته و محتفظه بيها هى و شظايا القزاز شظيو شظية ... عادى ولاااااا هاممنى

بس انتى الفرق ان ماما عايزة ترتب لك الاوضه
انا مبرضاش ترتبها بقى
شايفة انى هجيب لها الشتيمة بعدين


Regards:
Lojain :)

يا مراكبي said...

أنا مش هأعلق على البوست ده لأني منظم جدا جدا .. هأروح أعلق على البوست اللي قبله

سلسبيل said...

انتظار مؤقت
هوه بالرغم من ان نيتهم دايما بتبقي حلوة..وان ساعات فعلا الاوضه بتبقي شبه الملاهي...بس برضه الواحد مابيحسش بالامان لما كل يوم يلاقي حاله اتشقلب كده خالص
بس برضه بارجع واقول
ربنا يخليها ليا مهما عملت
علي فكرة انا معجبه باسم مدونتك جدا وباذن الله ف اقرب فرصه هتشوفني هناك بس ..اخطف امتحان الصيدلانيات بتاع بعد بكره
خالص تحياتي

سلسبيل said...

كراااكيب عادل
انت فكرك ماحاولتش..وبعدين ماما مستحيل تخليني ابقي معاها وهيه بتعمل كده لاني ببساطه حقوللها لا خلي ده مكانه وماترميش ده ومش عارف ايه...المتعه ف نظرها ...لما بتشوف نظره الفزع اللي علي وشي اول ماباشوف المفاجاه هههههههههههههه
وعموما احب اطمنك ان مش البرواز هوه اللي اتكسر..بالعكس دا اول حاجه اتخبطت فيها ف وشي اول مادخلت الاوضه
يلا حظوووظ

سلسبيل said...

لجين
يابنتي حرجع واقول ان سبب المشكله ف البدايه هيه ان امهاتنا مش بيقدروا يعرفو بجد ان فيه حاجات مهمه بالنسبالنا ومن حقنا نشوفها بالصورة اللي عاوزينها
يلا ربنا يجعله ف ميزان حسناتنا برضه ويخليهم لينا
منورة ياقمر

سلسبيل said...

يامراكبي
فعلا انا نسيت اكتب جمب عنوان البوست...(ماما واصدقاء النظام يمتنعون)ههههههههههههههه
عموما يافندم البوست التاني ينور بتعليقك..بيتك ومطرحك..دقيقه وحابعتلك كبايه شاي محترمة مع سعيدة
سعيدة مين؟؟ لا دي حكايه تانيه

اما اركب اول تاكسي رايح للبوست التاني اشوف التعليق بقي

Xee said...

ههههههه

فكرتيني بأيام جميلة والله

اخر مرة أمي العزيزة تكرمت و عملت كده كنت وقتها في تانية ثانوي
رحت نزلتلها كل حاجات المطبخ بتاعتها و سبتهالها في الأرض

الغريبة إن بعد كل السنين دي إكتشفت إني بقيت صورة طبق الأصل منها في موضوع التنظيم و النضافة ده

شكرا على البوست الظريف ده

هروح أكلم الست الداكتووره أمي و أقولها على قصتك

تحياتي

سلسبيل said...

xee
ههههههههههههه تصدق فكرة حلوة حكايه انك تقلب كل الحاجة اللي ف المطبخ..بفكر اعمل كده المره الجايه..بس علي ضمانتك..حتتعمل تكاليف عمليات التجميل
بس هيه ايه الحكايه...هيه المشكله ف امهاتنا بس
ولا المشكله بتبان اكتر ف امهاتنا لما بيبقو دكاتره؟..فابالتلي لازم يبقو موسوسين شويه ف مساله النظام والنضافه دي ولا احنا اللي نصيبنا كده بقي ههههههههه..لا انا لازم اعمل بحث ف الموضوع ده
منور جداااا يافندم