Sunday, March 18, 2007

رسائل اليك

ماعرفش ليه ساعات بحس ان انا مش من هنا..وبرضه مش من هناك
تسألني عن ابوخ سؤال ممكن يقابلني.......انتي منين؟؟
يييييييييييه...باتنح...التتنيح بتاع بلاده بيطلع بقي..وبتبتدي تظهر الابتسامات البلهاء اياها..وكلمات من طراز..ماهو ,,اصل,, ف الحقيقه,,, يعني,,,ممممممممم,,....وافضل عالحالة دي بتاع دقيقه علي ماربنا يفتحها عليا
مش دي المشكلة...المشكله الحقيقيه ان انا فعلا ماببقاش عارفه انا فعلا منين...اي ناصح حايقوللي طلعي البطاقه يافالحه وانتي تعرفي وبلاش تدوشينا...حاقولله لو عالبطاقه يبقي مكانش حد غلب ..وروح اتشطر علي حد تاني انا مش فايقالك...
الشئ الغريب فعلا ف القصه دي كلها هوه اني ...
ماعرفش ليه انا كده....وماعرفش لامتي حافضل كده ....لدرجه ان ليا اصحاب بيقولو عليا.
ساكنة في اللا مكان ..قد ايه برتاح اوي لما باسمع العباره دي..اجمل ف نظري من اي حاجه تانيه ممكن اقولها واوصفها....
.بس ساعات بخاف اوي اني افضل طول عمري لا مكانيه
بخاف اوي من كتر التتنيح وال ماهو,,اصل,,,ف الحقيقة,,ممممممم
بخاف اوي من صوتي المهزوز وانا بقول انا من هناك ...وهناك مُصِر يرفضني
بموت م الخوف لما بحس
..اني ممكن اعيش طول عمري بادور علي وطن...ينتمي ليا...قبل ماانتمي ليه
واني ف الاخر اضطر أأجر وطن جديد..واعمل بطاقه جديده..بمكان جديد..معرفش عنه حاجه
او ارضي بوطني القديم ...ببطاقتي القديمة ....ومكاني القديم...اللي عمري ماعرفت عنهم حاجه
تفتكر اختار انهي فيهم؟؟
من تهييسات العصاري....آدي اخرة اللي مابيشربش شاي بعد الغدا

6 comments:

يا مراكبي said...

مدونتك ظريفة جدا .. مبروك على النجاح الباهر ده في الدراسة .. ومتضايقيش من موضوع القصر ده .. إن أكرمكم عند الله أتقاكم .. وإبقي ما تشربيش شاي بعد الغدا علشان تكتبيلنا بوستس تاني زي كده كمان وكمان

سلسبيل said...

يامراكبي..
منور المدونة اوي والله
ياريتني كنت بطلت اشرب شاي بعد الغدا من زمان علشان كنت اتشرف بمعرفتك من بدري
..
بالنسبه بقي للدراسه فربنا يبارك فيك
اما بالنسبه للقصر..فانا بطلت اتضايق وبدات استغله لصالحي..استغله ازاي الله اعلم بس اكيد هوه ليه ميزة
اسعدتني باول زياره يافندم واتمني انها ماتكونش الاخيرة

الأباصيرى said...

وعرفت الحل
أصلى سألت واحد صاحبى مهندس
وقاللى على وصفة طبية هايلة

طبعاً هتسالينى ومال بتاع هندسة بالطب
طبعا معذورة لانك متعرفيش
ان كلية هندسة جنب كلية طب علطول
والكليات لبعضيها برضة
:)
المهم قاللى حلها الوحيد
أنها تشرب نص ليتر سم سيانيد
وتتولد من أول وجديد فى بلد تانية

لذيذ اوى موضوع
آدي اخرة اللي مابيشربش شاي بعد الغدا

صباح الخير

سلسبيل said...

يااباصيري..
ايه الحلول الجهنميه دي...
وبعدين واحده صحبتي مهندسه قالتلي اخد قرصين اسبرين..
اصل عندنا كليه هندسه جمب كليه صيدلة
عارف..انا ليا واحد صديقي هوه كائن فضائي من المريخ.
كان دايما حلم حياته انه كان يبقي من من الارض
كان بيتكسف اوي لما حد من سكان الارض يكتشف حقيقته انه فضائي ويعرف هوه منين لانه مابيحبش فكره انه الكل يعامله علي انه مريخاوي
فكر ف فكره عبقريه حقيقي..
بقي لما يتسئل انت منين..




.يقول انا من بلوتو...
العبيط....
خسر الارض والمريخ
معلش....
ادي اخره اللي ينزل الكليه من غير فطار

الأباصيرى said...

أأأأأأأأأأأة وجدتها
-قول ياعم أنشتاين-

يبصلهم بقرف ويقول للناس اللى حوالية

بلغت قوما بهم جنةٌ
يقولون من ذا وكنت العلم

أو يقولهم

أنا البحر فى أحشائة الدر كامنن
فهل سألوا الغواص عن أسرارة

أو يبص فى الأرض ويقول

جئت لا أعلم من أين أتيت
ولكنى أتيت


وبعدين مينفعش يقولهم أنة من بلوتو
كدة ممكن عم دهب يزعل منة

ههههههههههههههه

سلسبيل said...

ليه...
عم دهب عمره مايزعل من بطوط ابدااااا
ههههههههه