دليل المحتاس في معرفة صنوف الناس 3

((عن نظرية رجل المعزة واشياء اخري)).

ولان الانسان اتخلق علشان يتعلم

ولان الانسان عشان يتعلم لازم يجرب مرة واتنين

ولان الانسان عشان يجرب مرة واتنين فيه عشر مرات
منهم حايتلسع فلازم تكون علي الاقل بفايدة..ويطلع منها بدروس مستفادة
لا مش زي اللي علي ضهر كتب القراءه والنصوص اياها

عارفين حكاية الراجل اللي راح لملك وكان عاوز يجوزة
بنته ولما شافها لقي كان عندها رجل معزة؟؟؟الراجل
خاف وجري والملك وقفه قالله مالك؟؟

قالله دي عندها رجل معزةالملك ضحك ضحك مجلجله..حلوة مجلجله دي..وقالله
مش زي دي..؟؟

.ايه ده دا الملك كمان طلع كده؟ طب مش غريبه يمكن عشان ابوها

الراجل خاف اكتر وقعد يجري يجري لحد ماقابل ف
طريقه عجوز شكله طيب..العجوز صعب عليه الراجل
الخايف واستضافه ف بيته وجابله اكل..قالله ايه قصتك
يابني

حكاله عن البنت ام رجل معزة وابوها...فجاه ارتسمت علي وش العجوز رسمة براءه عجيبه وهوه
بيقولله...زي دي؟؟؟

وانتهت القصه ان الراجل قعد يجري يجري وكل ماكان
يقابل حد ويحكيله يكتشف انه هوه كمان عنده رجل معزة
يادي النيله..

دي كانت اخر معلوماتي عن القصه

من هنا كونت نظرية رجل المعزة...
اتعلمت اني مانتقدش حد قدام حد لاي
سبب ولو بحسن نية لان غالبا باطلع انا الوحيده اللي غلطانه وحساباتي مش صح..وماشتكيش لحد من حد تاني زعلني..لان اللي اشتكيتله ببساطة ممكن يبقي اخوه!.حتي لو واحد عاكسني ف الشارع..ماباقيتش انده لحد كبير يكلمه..لان الحد الكبير شخصيا ممكن يبقي ببساطة زي الباقي.......عنده رجل معزة

اما عن الجزء التاني من النظرية فدي محتاجه قصه تانية...

اخطفلي محاضرتين اورجانيك واجي احكيها