بسم الله الرحمن الرحيم
وبناء علي رغبه الجماهير الغفيرة..(بحب كلمه الغفيره دي اوي)
قررت انزل الحلقه الاولي من دليل المحتاس...
الصنف الاول.
بالنسبه للنوع الاول اللي انا حابه اتكلم عنه..فهو النوع الغتيت
والغتاته هنا كلمه مطاطه ممكن تستوعب تصرفات كتير لا حصر لها
لكن الغريب انك احيانا تصادف شخص تحس انه غتت من غير ماتعامله..عالريحه كده..مش طايقه
كل ماتحاول تعمل باصلك وتقول يلا اجبر بخاطره...مش قادر ياناس مش قادر...بتبقي عاوز تخنقه
اعرف واحد زميلنا..كل الدفعة بلا استثناء اتفقت علي شئ واحد..انه لا يطاق
بنات وولاد ما بيعرفوش يستحملو يقفو معاه دقيقه علي بعضها..حتي الي بيتعاملو معاه من قريب..بيعصرو علي راسهم شجره لمون بحالها....خاصه لو كانو مضطرين يطلبو منه حاجه هوه اقنعهم انه الوحيد في الوطن العربي اللي يقدر يساعدهم فيها..فبيعاملوه من بعيد لبعيد علي مضض اتقاءً لرخامته
وبقينا لو متجمعين معا بعض وشفناه جاي من بعيد كل واحد مننا يجري ف حته
اختكم بقي اللي هي سيادتي كونت رابطة اسمها رابطه كارهي فلان....الجماعه دي اتفقت انها تستعمل سلاح الرخامه المضاده معاه....والولد مفيش فايده ابدا فيه..فكرني باحمد حلمي ف فيلم الناظر كان تنح كده برضه
بس علي الاقل ده احمد حلمي
عموما بعيدا عن احمد حلمي وصاحبنا الغتت
فيه حلين اتنين بس علشان تعرف تتصرف ف مشكلة زي دي...
الحل الاول....بربع جنيه سم فيران..وتعزم صاحبنا عالغدا...وهوووب...نص ساعه وتلاقيه اتنفخ
الحل التاني ودا اللي انا اضطريت انفذه لان ماكانش معايا فكه عشان انفذ الحل الاولاني...
انك تؤمن بالقضاء والقدر بقي..وتعرف ان كل واحد مابياخدش اكتر من نصيبه..وتستحمل يابني واهي كل حاجه بثوابها..بس اه محاجه تدعي ربنا يثبتك علشان ماتضعفش لما الدنيا تسود ف وشك وتشرب من ازازه الفنيك اللي الست سعيده نسيتها ف البلكونه مفتوحه بعد مامسحت
والي لقاء جديد مع دليل المحتاس
4 comments:
هو لسه فية حوسة
لا حوسه ايه ماتقولش الكلام ده وانا موجوده....ههههههههههههه
انتو بس اقروا البوستات والنصايح كويس وحاجه م الاتنين
ياالسجن يالعباسيه
هههههههههههه
لذيذ كتير واكيد هنستني باقي الاجزاء
تحياتي
3lool
لازم تستنو..لان النوع التاني اللي حاتكلم عنه اصعب م الاولاني بكتير..
ربنا يكون ف عوني م اللي بشوفه..
شكرا علي مرورك:)
Post a Comment