Sunday, February 01, 2009

!..علي فكرة دا مش لعب عيال




من حقي احلم واهرب فيك
واتجنن وياك ف الحلم
ونقصقص ورق الايام
فوق مشاويرنا
ال..نص بعيدة
ونشقلب شكل المعقول
او نخرج عن نَص الفيلم
نبقي عيال
جواهم اكبر قلبين
بيشخبطو علي الحيطة كلام
ركنو العقل هناك ع الرف
واتحرروا من زحمة غيرهم
جوا الصف
نضحك سوا علي نفس النكته
بدون تكتيف
ونسمة صيف
تلمس احساسك.>>تتكلم
بحروف واقعة ف وسط الجملة
بعشق نغمتها المخطوفه
لما تقرب من احساسي
ولما تضم

--------------
7-12-2008
---------------
ساعات بنحس اننا اتولدنا مجانين..ساعات بنحس اننا اتولدنا عشان نجنن غيرنا...ساعات بنطلع للحياة عاقلين زياده عن اللزوم..وبنخطف لحظات الجنون بين الحين والاخر..عشان نكسر رتابه الحياة..كل الحكايه اني كالعاده كنت برتب ملفاتي اللي مش قديمة قوي...ولاقيت القصيده دي..وبصراحه سالت نفسي انا ليه مانزلتهاش وقت ماكتبتها..واكتشفت اني ماكانش ليا مزاج ساعتها..حاجه بايخه جدااا لما يكون مزاجك هو اللي متحكم فيك..خاصه لو كان بيتغير كتير حسب مزاجه هو!!...بس بما اني اعلنت العصيان علي مزاجي...الاعلان ده كان النهارده الصبح قبل ماقوم من السرير علي فكرة.....فقلت اما الحق انزل القصيده لاني عارفه اني ع الضهر هيبقالي اكيد راي تاني..وع العصر هيبقالي راي تالت..وع المغرب..مش هيبقالي اي آراء لأني..ا بنام بعد العصر.....المهم انا برغي ليه معرفش...صحيح..كلمه اخيره واقفه ف زوري
صباح الخير ,,والاحساس,, والطيــــــــــــــــبة

22 comments:

بنوتة said...

صباح النور
وكلماتك جميلة جدا ومعبرة
وحلو التنفيذ سريع أنا برضه مش بحب التفكير الكتير
يا ريت تزورينى في مدونتى وتقوليلي رأيك في القصة ايللى بكتبها وقررت أنزلها بسرعة قبل ماأرجع في كلامى
سلام وتحياتى ليكى

سنتوفة ..!! said...

هى دى سلسبيل ولا بلاااااش..
جميلة جدا ..و مستنية اجمل كمان..
و صباح الورد عليكى.. :)

مسدس صغير said...

كلمات جميلة جدا
تحمل فى ثناياها الكثير .
ميزتها اختلافها وتنوعها
كلماتها جديده

اقصوصه said...

كلمات رقيقه :)

تقبل مرورري:)

ملكة في بيتي said...

حاجه بايخه جدااا لما يكون مزاجك هو اللي متحكم فيك..خاصه لو كان بيتغير كتير حسب مزاجه هو!!..

****

انتي هتقولي لي على المزاج لما يتحكم !!!

عقبال انا كمان لما اعلن العصيان

دمتي مبدعة

تحياتي

alshared said...

من حقي احلم واهرب فيك
واتجنن وياك ف الحلم

....
ومن أعطاك هذا الحق
:)

.............
ربما كانت زيارتي الأولي
ولكني وجدت مالم أتوقع

وجدت شيئا يرقي بحبرالكتابه
ليضعه بين وريقات الأوركيد

..............
دمتي مبدعه

ياسمين نعمان said...

صباح الفل
جميلةوعجبتني .. بس ده رأيي بعد العشا يمكن بكره بعد الظهر أغير رأيي
إنت وحظك بقى :-)))

Muna said...

صباح الجمال على أحلى سلسبيل عرفتها في حياتي

ايه الكلام الجامد ده ..
بصي
عندي ليكي اقتراح صغنتوت خــالص

ايه رأيك تنزلي ديوان شعر رائع من اللي بتكتبيه ده ..
خسارة الناس متشتوفش الموهبة العظيمة دي


وصباح النور

سلسبيل said...

بنوووووته العسولة
ربنا يخليكي ياجميل سعيده باول زياره ليكي واتمني انها تتكرر
ماتخليكي شويه نشرب كابتشينو ;)

سلسبيل said...

سنتوفه ياحياتي
مش عارفه كنت هعمل ايه من غير تشجيعك
بحب دايما اسمع رايك ياجميل لانه يهمني
مش بس يعني عشان احنا صحاب وانك لاااااااااااااااااااااازم (تحت تهديد السلاح)هتقولي ان القصيده حلوة
لكن بجد لاني بثق في رايك وف احساسك
يلا كفايه عليكي حته الرومانسيه دي
امشي بقي عشان ماعيطش مانتي عارفه دمعتي قريبه اهئ اهئ

سلسبيل said...

مسدس صغير
شكرا كتير علي ردك
واتمني كتاباتي تكون عند حسن ظنك دايما
لك مني تحية

سلسبيل said...

اقصوصه
سعيده بتواجدك في صفحتي واتمني ان الزياره الجميله تتكرر ف المستقبل
احترامي

سلسبيل said...

ملكه ف بيتها

فعلا مشكلة..تحسسك ان جواكي طاقات كتيييير جدا بس كان حد مكتفك..الحد ده هو مزاجك طبعا
طب ياريتها بس تفضل ع الحاجات البسيطه زي الكتابه..وماتمتدش للقرارات الحاسمه ف الحياة
دمتي بخير

سلسبيل said...

الشارد
لاا كده كتييير عليا بجد
ربنا يخليك كفايه وجودك بين التعليقات
شكرا ليك :)

سلسبيل said...

ياسمييين
لااا ارجوكي..ابقي قولي رايك بسرعه ماتستنيش ههههههههههه
عشان برضه محدش ضاامن
منورة ياجميل

سلسبيل said...

فيروز الجميلة
بما اننا بالليل..ف مساء الورد
بالنسبه لمساله الديوان فمكدبش عليكي فكرت فيها كتير وفعلا هي كانت ومازالت حلم عندي
بس حاسه ان لسه بدري
محتاجه رصيد كبير من الكتابات اعتقد اني لسه محققتوش
ادعيلي بقي عشان ابقي احجزلك اول نسخه ان شاء الله
وبعدين كفايه انك شايفه موهبتي عظيمه مرة واحده
دي شهاده غاليه اوي
تسلمي ياجميل
خدي ورده بقي

أسماء علي said...

يا مااانو

كتير اوووي باقف مع نفسي و أقول محتاجة إني آخد من الحلم دقيقة
و من الجنان عمر كامل

دايما كلامك بيختلف
بيوصلني و بيغير فيا حاجة
حتى مزاجي بيتغير مع كلامك
يعني دلوقتي أنا حاسة إني عايزة أطلع أشوف الشمس و احلم و احتمال كمان انط الحبل من الشعور الطفولي الأبيض اللي جوايا

ألف وردة رقيقة زيك يا قمرايتي

دردشة على الماشى said...

إزيك
دى أول مرة أدخل مدونتك
بس بصراحة الكلام جميل
تعرفى مش عارفة لية أول ما قرأت الكلام جة فى بالى أغنية أم كلثوم ( الأطلال) طبعاً مش عارفة تعرفيها ولا لإ لكن كانت بتقول: (ومشينا فى طريق مقمر تثب الفرحة فية قبلنا وضحكنا ضحك طفلين معاً وعدونا فسبقنا ظلنا)
يعنى الحب ممكن يخلى الواحد يتصرف كالأطفال
تحياتى
سلام

زمن الشيكابالالالا said...

أول زيارة لمونتك والحقيقة مدونة جميلة جداً والبوست أكتر من رائع
دمت بكل الود والشيكابالا

سلسبيل said...

سمسم
يابنتي حاسه اننا توأم
كل يوم بيزيد احساسي بكده
بحب حكايه ان الواحد يتخلي عن عقله فتره ..يعمل فيها كل الهبل اللي نفسه فيه
من كام يوم خرجت البلكونه وكان المنظر جميل
والحياه باينه ورررديييي
كان نفسي افتح دراعاتي وابص للسما واقول بعلو صوتي ياهووووووووووووووو
بس ف اخر لحظة لاقيت جارتني بصالي بكل استغراب
الله يسامحها خرجتني م الموود
استنيني عشان جايبالك كيلو ابو فروة زياره وانا جايه المدونه عندك

سلسبيل said...

دردشه ع الماشي
سعيده بزيارتك واتمني انك تنوريني علي طول
الحب فعلا ليه قدرة سحريه علي انه يقلب حياة بني ادم
سواء لشئ حلو او لجحيم
بس اجمل شئ فيه
جنانه
تحية ليكي

سلسبيل said...

زمن الشيكابالا
شرفتني باول زياره يافندم
الا صحيح
ماقلتليش هي الشيكابلا بيتركبلها منين
دمت بكل خير