Monday, February 09, 2009

توهااااااان




(1)

مبخافش م التوهان

مبقيتش زي زمان

ف القلب باقي كتير

لسه الجراب مليان

-------

(2)

لسه الورق عطشان

للحبر والالوان

للبحر لما يغير

ع الرمل م المشاوير

فوق شطك الدفيان

-------

(3)

بعض الكلام احلام

ساكنين ف برج حمام

مش محتاجين تفسير

مع انهم فوازير

عايزين معاد تصوير

مع ريشة للفنان

-------

(4)

سن القلم مسكون

مصباح وفيه مارد

شارد

ومش مضمون

باعت جواب للكون

ع الظرف ميت عنوان

لكنهم واحد:

(خارج عن المالوف

ضايع من الاوطان)

-------

(5)

جوايا فيه اسرار

محسوبه ع المشوار

شخبوطة من سطرين

مشحونه بالافكار

حرف الندا ..حرفين

فارس عليه العين

موجود ومش موجود

مجنون لكنه ..رزين

بس ف معادنا يتوه

ويسيح كلام الليل

لما النهار

هيبان

-------
توهااان..معرفش دا الي كنت حاساه ساعت ماكتبتها..بغض النظر عن اني ببقي زعلانه لما مزاجي يتحكم فيا زي ماقلت ف البوست اللي فات ..لكن ببقي في قمة سعادتي لما بحس بالتوهان...بشرط ان توهاني يكون توهان ايجابي ..مش سلبي حد فاهم حاجه؟
هعتبر ان حد قاللي اه
المهم اني حاليا اعيش حالة توهان لا احسد عليها..عارفه انه توهان لحظي..ومسيره يتكل علي الله ويرحل
عارفه برضه انه توهان بسبب اني مش عاوزة اواجه حاجات كتييييييير جدا عشان لما جربت اواجهها قبل كده بقيت عامله زي عربيه فرامل اليد بتاعتها مرفوعه ومش عارفه تتحرك وماكنتش عارفه اكتب ولا اعمل ايه حاجه...عشان كده التوهان احسن حل
اتمني الحاله دي تدوم اطول فتره ممكنه...لانها فعلا عامله زي المخدر..مخلياني مش حاسه باي شئ مؤلم حواليا او يدايق..بس للاسف لما هتخلص...بوووووم
برضه مش قادره افهم ايه الرغي الكتير اللي انا كتبته فوق ده..بس مش مهم اعتبروه مش موجود
برضه كلمه اخيره واقفه ف زوري
أنا بتعلم منك..علم قلبي كمـــان...ولا اقوللك كفااااااايه علام لحد كده بليييييز

13 comments:

Muna said...

جميل

تصدقي .. النهارده كل ما كنت اجي اطلع بالعربية تطفي مني .. بعد 3 مرات افتكر ان في ابتكار اسمه فرامل اليد !

قلبي معاكي ..
استمتعي بالحالة دي زي ماتحبي ..
لكن متطوليش .. لأن المخدر دوره بس يداري الشعور بالألم .. لكن المسبب للألم أكيد مش هيختفي !

حبيت البوست بتاعك .. والقصيدة تحفة ..
ورينا من ده كتير
ولا اقولك .. اتبعي القول القائل : لا تعطه سمكة ولكن علمه كيف يصطاد
علميني بقى :D

صدى الصمت - عاشقة الورد - said...

أول زيارة لمدونتك والحقيقة عجبتنى قوى تقبلى مرورى
عاشقة الورد

alshared said...

سن القلم مسكون

مصباح وفيه مارد

شارد

ومش مضمون

باعت جواب للكون

ع الظرف ميت عنوان

لكنهم واحد:

(خارج عن المالوف

ضايع من الاوطان

............
ضائعٌ
في بحر بلا عنوان
في كون من النسيان
بعين
تُرهق الثقلان
بحق
ليس للأنسان
بصمت
يشبه الحملان
....
أفكار
بعثتها ولم تصل
............

دمتي عزيزتي بكل الود

أخوك

مسدس صغير said...

سلسبيل شاعرة تستحق كل
تقدير كلمات بساطتها
هى روعتها
وروعتها فى بساطتها
..

اشكرك ولك تحيتى

بنوتة said...

السلام عليكم
كلماتك رائعة وجميلة جدا
أما عن حالة التوهان انا بفضل المواجهة دايما عن اننا نكون زى النعام ساعة ما بيخاف بيدفن راسه في الرمل
لازم نواجه ونجرب على الاقل نكون كسبنا شرف المحاولة
تحياتى ليكى

سلسبيل said...

فيرووووز
طب المهم العربيه طلعت تمام بعد مانزلتي فرامل اليد...الموتور لسه بخير يعني هههههه
-----
بالنسبة للتوهان ..المخدر الطبيعي اللي ربنا خلقهولنا ف عقولنا عشان مانتجننش
ماظنش هيطول
مانتي عارفه اللي فيها..الترم التاني خلاص ع الابواب...ادخله وانا تايهه خلاص ساعتها انسي بقي هههههههه
------
وبعدين ياجميل ربنا يخليك علي ذوقك..دانا اللي عايزة ادخل تلميذه ف المدرسه عنك يمكن اتعلم حاجه من الحاجات الجميله اللي بتكتبيها
خلاص مافيش مشاكل
انا اعلمك وانتي تعلميني
تبادل منفعه برضه
كالعاده منووووورة

سلسبيل said...

العزيزة صدي الصمت
سعيدة بزيارتك الاولي وشرف ليا ان المدونه تكون عجبتك
شكرا علي مرورك العطر

سلسبيل said...

الشارد
عارف
ساعات بحس ان الضياع والتوهان شئ جميل جدا
بشرط واااحد
انهم يكونو بمزاجك
لانهم لو غصب عنك
تبقي ف مشكله حقيقيه
شكرا علي تفاعلك المميز
تحيه طيبه لك

سلسبيل said...

مسدس صغير
والله مش عارفه اقوللك ايه علي كلامك وشهادتك دي كبيره عندي اوي خاصه لما تيجي من شاعر حساس زيك
ربنا يخليك
فائق احترامي

مهرة سالم said...

السلام عليكم...
بصي التوهان حلو ومخدر بس لما تفوقي لازم تخلصي كل إلي وقفتي عنده وتبدأي وإنتي شايله الحاجات الجديده إلي حصلت وقت التوهان ...
.....

بعض الكلام احلام
ساكنين ف برج حمام
مش محتاجين تفسير
مع انهم فوازير
عايزين معاد تصوير
مع ريشة للفنان
حبيت كل حرف كتبتيه فيها تعبير رائع..
دمتي بخير

سلسبيل said...

بنوووته
لا هو التوهان مش بختاره عشان اهرب من الواقع
انا بعتبره محطه راحه عشان اقدر افكر ف الامور من غير مابقي عايشه فيها عشان اقدر احكم صح
تحية عطرة ليكي ياجميل

سلسبيل said...

نهار
ميرسي علي زيارتك الجميله
عندك حق لازم التوهان يخلص بسرعه ونبتدي من جديد
وشكرا علي رايك ياجميل

ياسمين نعمان said...

إيه ده ؟؟!!
دي جميلة أوييييييييي .. على فكرة بجد انتي فعلا بتكتبي شعر جميييييييييييل أوييي
لأ فعلا حلوة ..
أكيد ده توهان ايجابي إللي يطلع كلام جميل كدة :-))))