Wednesday, October 24, 2007

غصب عني..حاجه قديمة علي قد ماقسم


من همس صرخة نبضة جواك
تنتفض
تهرب من الناس م المكان
م الازمنة
تكره حصارك ف الطرق
..ظلم القيود الممكنه
لون دنيتك؟؟
مش هوه دا اللون اللي ف الحلم اترسم
يكبر ويعلا و......وف النهاية
بيترفض.....!
اكسر
...اكسر بُنا الضعف اللي خيم فوق كتافك
واعترض
ايه يعني تتكعبل مادام حتقوم بطل
هدِّم جدار الخوف عشان
تقدر تشوف ..المشكلة .
.اجري ف غيطان مالهاش بيبان متقفلة
ايه يعني لو هاتتوة مادام
عندك امل
ارجع.
.ارجع ف حضن الموجة وانده
ع السنين اللي انقضت
واسأل عن الصوت الي غني
ف يوم بقلبك
ليه سكتْ؟؟؟
انا كنت زرعه اما اتسقيت ف الغربه شهد
بدال ماتطرح...دبِّلِت
انا كنت غنوة ف حب ايام اتنست..واتبدلت
انا كنت كلمة وروح (وكومة اسئلة) 0
وصحاب عرِفت ان الحياة بيهم مملة.. ومذهله
وجدار ف اوضة هناك
عليه صورتي ف اطار...ماعرفش ليه اتبسِّمِت
ماعرفش امتي اتعلمِت
ترمي الكـــراكيب اللي كانت
يوم ف ادراج مكتبي
اللي احتمت فيهم زمان من نفسها
وتدوس برجليها الورق.. وتشوف نهايتة بنفسها
انا كنت فين
اما البيوت اتغيرت؟؟
واتغير العنوان واصبح مسأله
م الصعب جدا حلها
..انا كنت فين...لما اتمحي
اسمي ومكاني ومهنتي...واتبدلو بانسان غريب
كاره حاجات بيحبها
حابب حجات مغصوب لها
ناسي النسيم وقت العصاري
وطعم حبات المطر
قبل اما بيهل الشتا
_يخطف اواخر بسمة فوق وش الخريف
_لكن عرفت اتحمله
علشان بترجع ليا احلامي
اللي مجْدُولة بخيطان شمس الربيع
يعزف بقلبي زي عاشق للكمانجه علي الوتر
لما بايديه بيضمها
واللحن دايما كان بيحلم بكرة ييجي يكملّه
ليه الحجات دي اتأخرت؟؟؟
ليه لسه جوايا الطريق مليان سفر...؟؟
ليه لسه صعب اني افتكر شئ من بعيد
وازاي احط الحرف جمب الحرف واعمل من جديد.
.درج واجنده وكراسات.. فاضيين وباحلم يتملوا
انا مش حضيَّع عمر تاني ف اوله
وابكي علي شوية حاجات راحت خلاص واتهدِّمت
فوق الحقيقة ..المؤلمه
انا مش حبيع اخر قلم
وادفع تمن ناس من زمان اتهمِّشت
ماعرفش عنهم غير صور..باهته وكئيبه ومظلمة
اتلوِّنِت
بخطوط صريحة من الخدع
متزوقة بحبة رتوش
انا مش حتوه وسط الوشوش
علشان ملامحي _غصب عني_ اتشوشت
القصيدة بتاعتي
كتبتها من حوالي 9 شهور كنت باقلب ف الفايلز بتاعت قصايدي لاقيتها قلت اهو احسن من مفيش يمكن لما انزلها اتشجع واكتب حاجه جديده علشان انا في مرحلة صدا فكري ويارب مايقلبش بجفاف او انسداد في حنفيه الشعر علشان لو الواحد ماطلعش همه ف الكتابه يا هايطق يا حايتحوج لاي دبدوب لعبه يفضفضله وانا مابحبش الدباديب
اما التصميم فا لاختي العزيزة الفنانة الفانتاستيك جدا..ندي
ربنا يوفقك يانيدو وتدخلي فنون تطبيقيه علشان تطلعي جنانك علي البشرية كوولها ههههههههههه يمكن يشوفو اللي انا بشوفه

25 comments:

shreen said...

سلسبيل الحمد للة
انا اول واحدة اكتبلك

القصيدة رائعة
واروع ما بها انها قد تكون لكل واى شئ
من الممكن ان تكون رومانسية
ومن الممكن ان تكون سياسية


كل الثورة المختبئة فى السطور

لابد ان يحرك شيئا ما فى اعماق من يقرؤها

لابد ان يدفعك ان تغير شيئا ما فى مكان ما

روحا حرة متمردة انت
لذا احببتك واحببت كتاباتك

-_- said...

جميلة

يا مراكبي said...

جميلة بجد من غير مجاملة

لكن أحب أقول حاجة في موضوع الكتابة والإحساس بالصدأ

إحنا أولا مش شغلتنا إننا نكتب كل يوم زي اللي في الجرايد والمجلات .. صعب جدا إن الواحد يعصر إحساسه ودماغه كل يوم علشان يطلع حاجة للكتابة

إحنا بنكتب لما بنحس .. ولما بنحتاج إننا نخرج شيء من جوانا

Unknown said...

ايه يا سلسبيل ده

بجد تحفة وتجنن وتهبل وكل حاجة والله

مش مجاملة ليكى مش بعرف اجامل اصلا بس انا ذهلت وازبهليت من المعانى والتشبيهات والإحساس


لالالالا بجد كلها على بعض رااااااائعة فنية بجددددددد

:D

ahmed mefrh said...

بصراحه
بورك من قلم و بورك من كلمات

تحياتى اليكم و الى شعركم

ابو مفراح

ولــــــــــو said...

ماشاء الله
ده على ما قسم
دي وليمه بس اللي يقدر عليها
بجد كلمات رائعه واحساس عالي وتعبير ولا اجمل والاكتر انها لكل وقت ولكل مناسبه ولكل احساس
فعلا ابدعتي
اول مره ليا بس بجد استمتعت جدا

Yasmine Adel Fouad said...

ليه الطريق مليان سفر

علشان دى سنة الحياه
الحياة رحلة و احنا مسافرين شايلين متاع و بنسيب حاجات و نجيب حاجات لحد و لا عمرنا بنقول كفايه


____________

وحشتينى

على فكرة عندى خبر حلو
تعالى انبسطى اوى

Tamer Nabil Moussa said...

هدِّم جدار الخوف عشان

ودة حل سليم

لكن الهروب

او البكاء على ما مضى لايفيد

كلمات جميلة

تحياتى

. said...

محدش هيعرف قيمة القصيدة دي غير لو قراها كويس لان فيها حتت لازم تتقري بسرعه وحاجات لازم تتبطأ في القراية
وبصوت عالي
عارفة لم الواحد يكتب من قلبو بيبان عل الورق
بجد لمستني زي ما كل بوستاتك بتلمسني
عشان انا عملت كده ورميت كل ما املك
وابتديت ارجع اجيب كراريس تتملي من تاني تتملي ايه لسه هنشوف
بجد اكتبي كده على طول ونزلي بوستات حتى لو من القديم لان كلو فالاخر بيلمسني وبترجمي الكلام الي مبعرفش اطلعو
تحياتي
هيا اختك فسنة كام صحيح؟

Mo3Az said...

جميلة ما شاء الله

بس حلوة حته الصدا الفكرى دى (تعبير جديد )

بعد الشر يارب وان شاء لله هما شوية زيت والعمليه تلين وتبقى تمااااااام

:) :)

hamsaa said...

سلسبيل كلماتك هايلة بجد و احساسك فيها حلو قوي و بسيط للغاية
و بالذات تهرب من الناس فعلا احنا بنهرب من الناس لكنهم مصرين يطاردونا تحياتي يا قمر
و تسعدني زيارتك دائما
همسه

سلسبيل said...

شيرين العزيزة
منوراني باول كومينت
واشكرك علي رايك في القصيدة
وكويس اني لاقيت حد اقتنع بتمردي..اللي مسببلي المشاكل ده هههههههه
ربنا يديم الود ياجميل

سلسبيل said...

شارم
سعيدة باول زيارة ليك للمدونة
واتمني ماتكونش الاخيرة
تحياتي

سلسبيل said...

يامراكبي
كلامك صح طبعا..بس كده دخلناف مشكلة تانيه
لحد امتي حفضل مش حاسه بحاجه عشان اكتبها
وبعدين انا ف مرحله معينه.. الكتابه عندي ماكانتش هوايه بس..كانت حاجه نفسي استمر عليها وعلي ممارستها بس فجاة..بقيت اتعب من مجرد التفكير فيها
برضه حرجع واقول مرحله وتعدي
شكرا علي تشجيعك ياباشمهندس

سلسبيل said...

انسانه
ياااه
الكلام ده كله عليا...اروح فين انا دلوقتي من الكسوف ياربي
والله دا بس من ذوقك واحساسك الجميل
سعيدة جدا بتعليقك واتمني اني اتشرف بزيارتك قريب

سلسبيل said...

ابو مفراح
ربنا يخليك وبجد شكرا علي مجاملتك الرقيقة

سلسبيل said...

ولو
عارف.. انت حسيت انها مناسبه لحاجات كتير لاني وقت مابكتبها كنت حاسه بحاجات كتير ف نفس الوقت
فلاقيتها طلعت كده
اشكرك بجد علي رايك واطراءك
خالص احترامي

سلسبيل said...

انا حرة

بالرغم من انها سنة الحياة لكن ساعات غصب عننا بنتعب من كتر الترحال وبنحتاج ارض محايدة نرتاح فيها من همنا ولو شوية
علشان نقدر نكمل الرحلة
سعيدة جدا بتعليقك ياعزيزتي وباذن الله ليا زيارة لمدونتك قريب

سلسبيل said...

تامر نبيل

البكاء احيانا بيكون مش ضعف
بيكون وسيلة علشان نقدر نكمل بيها المشوار الصعب
اسلوب نتبعه احيانا عندما نسام المواجهه لكننا سرعان ماننساه لنبدا من جديد ...ولكن اقوي

تحياتي

سلسبيل said...

سدرة حبيبتي
بجد مهما قلت مش حعرف اشكرك علي كلامك الرقيق ..دا من ذوقك وقلبك الابيض واحساسك المرهف ياجميل
اختي قدك ف تانية ثانوي وكيميا كمان
ربنا معاكو ياقمر وترفعو راسنا كده
قوليلي انتي عاملة ايه ف الدراسة؟؟

سلسبيل said...

معاذ
ههههههههههه فعلا شكلي حالجأ لحكاية الزيت دي
بس مخي حيحتاج صنفره الاول عشان الزيت يأدي مفعولة
حبقي اطمنك عالنتايج

:D

سلسبيل said...

همسه الرقيقة
مع ان الهروب من الناس عمره مابيبقي حل
لكن ساعات بيبقي مفيد لو لجأناله علشان نعرف نعيد حساباتنا بدون تشويش..ساعتها ممكن نرجع للناس بس بعد مانكون عرفنا من الحبيب ومين العدو ومين اللي زي قلته
ولا انتي رايك ايه
منوراني ياجميل وتحياتي لمدونتك صاحبة المشاعر الراقية

كراكيب عادل said...

انتي من ساعه ما رحتي الصيدلية اياها دي وبوظولك تسحبي ازي الكلام من جوة

الظاهر شربوكي حاجة حمراااا

شوفي اي دوا ها اي دوا لونة ازرق واشربي منة علي الريق

بس حلو الكلام دة بجد يا مي

هييييييييييية ايام

سلسبيل said...

كراكيب عادل
والله انا كاتبه القصيدة قبل ماروح الصيدلية
وبالنسبه للحاجة الحمرا فكات عصير فراولة وطبعا بيجيبلي حساسيه فقلت بلاش منه خالص
اقوللك انا نفسي ف ايه دلوقتي
نفسي ارجع تاني مش فاهمه حاجة..تصدق كنت اظرف
هيييييييييييييه دونيا

ناعومى said...

طبعا ياقمر من اجمل واروع ما قريت لك..اكتبى جديد عامى بقى ..قلمك رائع سواء فى العامى او فى سرد خواطره
ربنا يو فق ك ياميوى