Wednesday, January 31, 2007

ترافشخانات ....1.


اضربو رؤوسكم في الحائط فلم اعد ابالي.بكم ايها الاوغاد.......>.... مقدمه لابد منها




كلية الصيدلة: هي معهد تجاري عالي...لمستحضرات التجميل والاعشاب الطبيه والعطارة والحبشتكانات . وكل مستلزمات تجهيز العرايس وفك الاعمال وا.لكيمي كيما كا الكيمي كيمي كو...,.>.....تعريف لابد منه


الله يخرب بيت دي كلية...الله يسامحهم

بهذه العبارات الصغيرة..افتتحت سكشن العضوية...بنفس مقبله علي العلم متعطشة لمعرفه كل ماهو جديد عن هذا العالم الرااااائع الخاص بتلك المادة..اللعينة

وقفنا امام ابواب المعامل منتظرين..الفَرج..حتي ينتهي السكشن السابق لنا ونستطيع الدخول الي المعمل..حيث شعارنا هو..حانشممك اللي عمرك ماشميته

..بحيث تخرج منه بعد 5 ساعات لا تستطيع التمييز بين رائحه المانجو والقلقاس

..انشغلت بارتداء البالطو ..واخراج ادواتي من حقيبه ظهري وترتيبها في كيس بلاستيك صغير كي لا اسقطها في احد الاحواض الموجوده علي البنشات كما فعلت في ال 15 حقيبه السابقه لها..!

========

هيووووووف

انفتحت الابواب واقبل الطلاب من كل حدب وصوب الي هدف واحد....اندفعت بالقصور الذاتي

واستقررت عند نفس المكان علي نفس البنش بجوار نفس الجيران اياهم..كانت نها صديقة كفاحي بالتأكيد جواري..ومش عارفه هل من الطبيعي احيانا شعوري برغبه شديده في خنقها؟؟ولا الامر محتاج استشاره دكتور عاطف؟؟ يليها منه..والتي نطلق عليها منه توتر.لانها تشبه هاني رمزي في مسرحيه وجهه نظر عندما تصرخ كل خمس دقايق مفيش فايداااااه ..منه من البنات الجدعان جدا اللي اتعرفت عليهم بعد فتره قصيرة من دخوله الكليه..وهي انسانه يعتمد عليها..لولا بس ان عندها ربع ضارب

وجوارها

مها صديقه منه
ومني صديقه منه وهم بنات ظراف جدا بس مش اصدقائي بمعني الكلمه يعني

اما التي تقف هناك لا تكف عن النظر الي شزرا متبوعا بابتسامه ثم ضحكه مجلجله تنتهي دايما بجمله واحده هي..ازااايك يا لولو ..لولو مين ماعرفش بس هيه مقتنعه انها انا.ثم النظر شزرا مره اخري.هي طبعا منال مجانينو...صديقتي اللدودة

علي البنش المجاور يستقر اعدقائنا الافاضل..وهم
.
.
مسرور...كتله من السخافه واللزوجه تمشي علي قدمين...ببساطه مجرد رؤيته من الممكن ان تفسد علي يوما باكمله..لا اعتقد انني شاهدته يتحرك من مكانه منذ بدايه السكشن..فقط هو يقف مذبهلا..يحملق بغباء للي رايح واللي جاي

عز..اينما تجده..وقتما تراه..تجده مبتسما ومنشرحا لسبب مالااعرفه لكنني ساتقصي الامر...يقضي معظم الوقت في المعمل في صنع تجارب مخيفه..ادت يوما ما الي احتراق شعر احد صديقاتي ..لكنها قصه اخري
محمد..لا اعرف لم اتذكر..مسلسل سكرابز المعروض علي الفضائيات فهو شكلا ومضمونا يشبه ذلك الفتي جي دي بطريقه كلامه وحركات رأسه المستفزة .يتميز بانجازات عجيبه جدا..مثال كنا نعمل علي تجربه ملخصها.ان يتحول لون الفينول فيثالين الفوشيا الي لون شفاف..مع العلم ان الفينول فيثالين مستحيل لونه يتغير الا من الشفاف للفوشيا او العكس..وفوجئنا.ان اللون معاه اتغيرللاخضر.....معجزة
انتهيت من تقديم ابرز الشخصيات في معمل العضويه...نرجع للمهم...دخلنا السكشن وكل منا انهمك في ترتيب ادواته امامه حاولت اقناع نفسي ان فوطتي الصفراء مازالت صفراء..مع ان نها سئمت من اقناعي انها لم تعد فوطة اصلا..خاصه بعد سقوط السالفوريك اسيد المركز عليها..وهذا الثقب المحترم في منتصفها...جعلها لا تصلح الا لتنظيف الاحذيه

شعرت بالملل من اول ربع ساعه في السكشن..الميزة الوحيده هنا هي روح الجماعه..فشلتنا الوحيده التي تعمل كجروب واحد..عكس باقي البنات في السكشن للي شعارهم يلا نفسي .وبالتالي بنخلص بسرعه..وبالتالي وقت الراحه اطول...هذا ان خلصنا اصلا ومااخدناش كل المعمل وقت راحه

======

انتهينا من 4 عينات ونظرت في ساعتي امله ان تكون الواحده لكنني فوجئت انها مازالت العاشره والنصف..اي ان ساعه ونصف فقط من المعمل مرت..ساعه ونصف فقط واكاد لا اشعر بقدمي ااااااااااااااااااااه

انتفضت علي صوت من خلفي اكتشفت انه تابع ل منه توتراعمل ايه يامي..اعمل ايه مش ممكن زهقت زهقت مش قادره بقي

انا:انا كمان والله يامنه مش طايقه..وعاوزة انام ورجلي واجعاني ..دا غير اننا من غير شغله ولا مشغله

منه:طب باقوللك علي ايه

انا:قوليلي علي ايه

منه:

دلوقتي..العينه الخامسه لسه مانزلتش وشكلها مش نازله قبل نص ساعه و,...
تنائي الي مسمعي صوت رفيع مميز.

::.من مكان غريب.بيقول

.:انتو اصلا عبط..انا قاعده هنا من ساعه ماجيت والدنيا وردي..وماحدش واخد باله
التفتنا الي الصوت ووجدناه صوت مناااال مجانينو هي التي تتحدث ولا تكف عن الضحك من بين نظراتها الشرسه حسنا كان الامر اقوي مني..وكان الالم اقوي من ارادتي الحديديه ورغبتي في الابتعاد عن منال قدر المستطاع ولم اشعر سوي بيداي تمسكان كتاب العملي والقيه علي الارض في اهمال ..واجلس فوقه بجوار منااال ولا ادري ايضا كيف او متي حدث هذا لكنني فوجئت بعد 5 دقائق بانني اصبحت في مركز تجمع لبنات السكشن كلهم الكل يثرثر ويرغي..وانا اولهم بالتاكيد ومع من؟؟مع منال شخصيا..

علي الجانب الثاني كان الاعدقاء منهمكين في امر اخر....!
فمسرور كان منهمكا في هرش راسه متسائلا في دهشه حقيقيه..احنا ف سكشن ايه
اما عز فرأيته بيتحايل علي احد الضحايا عشان يجرب احد ابتكاراته الجديده وانتهي الامر بعز وهو ينادي مسرور يكتف الضحيه عشان يشرب ....الله يرحمه كان طييب
ومحمد جي دي دا الاسم اللي اطلقته عليه.....اللي بالمناسبه عنده حساسيه من اي حاجه حريمي كان يمسك منديلا ورقيا..يغطي انفه وفمه..وغمض عينه وشق طريقه بين جموع الفتيات اللي حوالين احد العينات علشان ياخد شويه...مع العلم ان المنديل استلفه من واحد صحبه علشان قرف يفتح شنطته..لانها كانت ف الوقت ده تحت شنطه نها..نهايتة

سمعنا صوت الدكتور تبشرنا ببشارتين..الاولي ان السكشن بقي 4 ساعات مش 5والتانيه ان العينه الاخيره نزلت ويلا يا غجر قومو شوفو شغلكو احنا مش ف سوق التلات...دا كان ملخص كلامها قومنا كلنا لكن لاحظت ان الجو خالي من التوتر...وحسيت اني مفتقده رخامه منال جدا..فين منال ياجماعه..ماحدش جاوبني لكن جوبني صوت ال خخخخخخخخخ الخافت المميز....من تحت البنش..لاجد منال في عااشر نومه طبعا كان فيه 3 احتماللات..وكان فيه شيطان خلاهم 6 احتمالات

اولا اني اصحيها وخلاص

او اني .اصحيها بس الاول.احم احم..اصورها صورة حلوة بالموبايل خاصه ان شكلها وهيه رافعه النضاره علي راسها..ومرجعه راسها لورا وفاتحه بقها عالبحري كان فانتاستيك......وكمان دا غير انها كل ماتسلم عليا تقوللي يالولو وانا اسمي مي بقي
ثانيا اني اسيبها وماليش دعوة وخلاص

او اسيبها وماليش دعوة بس برضه الاول..احم احم..اصورها صورة تحفه كده..وافتكرت تاني ان هيه دايما بتقوللي لولو وانا ماباحبش حد يقوللي يالولو

ثالثا اني اسيبها بس يبقالي دعوة..وانده للدكتورة تشوف شغلها وخلاص ..عشان تعرف ان ماحدش قاللي لولو قبل كده وسيبته واكيد برضه لازم تتصور الاول ماهي حاتتصور حاتتصور بقي
عموما قلبي الطيب خلينا انسي كل ده..واقول يلا يابنت خليكي احسن منها..منال اصحي

(بدلال شديد)تقوللي تؤ

انا بغيظ:منال انتي فاكره نفسك ف البيت؟؟ اصحي احنا ف السكشن الدكتوره حاتزعق

منا:طز

انا:يابنتي ربنا يهديكي

منال:ابعدي بقي يالولو..عاوزة انام مالكيش دعوة انتي خخخخخخخخخخخخقاطع صوت شخير منال العذب صوت

انا:لولو...لا انا حاسيبك تتفلقي بقي

منه توتر من خلفي ماااااااااااااااااااااي

انتفضت ايه ايه في ايه خير

منه:بتعملي ايه بتعملي ايه كده مفيش فايده مش حنخلص قبل المعاد مش حنخلص مش حنخلااااااااااااص..انتي ناسيه كمان ان بعد السكشن فيه كورس دكتور حاتم الحاتم ابو حاتم يعني الطيور المهاجره.

انا:..... ايه..؟

منه:ماي ماي.طب.بقوللك علي ايه(كلمه منه الشهيره)

انا: قوليلي علي ايه..(ردي المنطقي الدائم علي منه)

منه: حانعمل ايه انتي ناسيه انه كمان عندنا بعده دكتور عبكريم.. عامللنا امتحان وانا انا ماذاكرتش ماذاكرتش مفيش فايده كده حاضيع حاضيع عاااااااااا

اانا::ياللااااهوي....افصلي افصلي شويه حانخلص ان شاء الله

منه :لا حانخلص ازاي مفيش فايده السكشن حايخلص قبل مانخلص العينه ومش حالحق اروح اذاكر

انا:ماطظ لو حاتعملي ف نفسك كده ياامي

منه:لالأه لأه اعمل ايه مفيش فايده ارجوكي اقفي جمبي..

انا:منه انتي محسساني ان في حد بيجري وراكي واننا لسه ف ثانويه عامه

تعالي معايا ياحبيبتي حانخلص العينه سوا واخلص انا كمان م الوَش اللي انا فيه ده

وجدت نها وقد ظهر عليها الانهاك النفسي.,

.نها:ايوة ابوس ايدك خلصيني م الشبكه دي..دي ماسكاني بقالها نص ساعه مش حنخلص مش حنخلص..خليتني الف حوالين نفسي مش احنا صحاب الصاحب بيشيل عن صاحبه بقي

انا:وانا باغمز لنها..:يا نها انتي بتباالغي اشتغلي انتي ف اللي قدامك وانا حكمل باقي التجربه الاخيره مع مني عشان تجربه غتته
ذهبنا انا ومني ..بعد ان ودعتني نها بدعواتها ..ربنا يسترها معاكي يابنتي... الي البنش بتاع العينات..فوجدناه مزدحم بغباءالتفت الي البنش الاخراندهشت عندما رايت ثلاثي الاعدقاء يقف هناك...وكأن هذا المكان هو وكر الاوغاد الثلاثة...وجعلوها منطقه محرمه علي الجنس اللطيف..واستفردو بعينات تكفي 20 فرد ل3 افراد فقط..وسابو البنات يتفلقو بس لا ..لست هذا الفتي...اقصد اعمل خير وارميه البحر لالا مش دي..القرعه تتباهي بشعر بنت اختها يوووووه برضه مش دي...اكفي القدره..بلاها امثال خلينا بالدراع احسن

شعرت بمنه ترتعش.وبتقول.يادي النيله لا مفيش فايدااه حانتعامل مع دول ازاي..قلتلها باقوللك ايه ..تحطي ايدك ف ايدي ولا التجربه تروح علينا ومانعملهاش وتبقي راسنا ف التراب قدام الشله؟؟

شاورت نفسها قليلا..وحيث انها بتثق فيا ثقه عمياء.قالت لا طبعا معاك يازعيم

=========

عدلت من ياقه البالطو...وظبطت وضع نظارتي علي انفي..وكنت اشبه لسهير البابلي في ريا وسكينه لما حبت تفرد عضلاتها تقدمت نحو البنش ...بخطي ثابته..ومنه خلفي وبمجرد وصولي..وتثبيت اقدامي في المكان ناديت..:يانها..اللي محتاج عينات ييجي هنا في كتير..وانطلقت جموع الفتيات نحوهم كالتتار..ومسرور لاول مره يتخلي عن التتنيحه..ويبتعد مفسحا المجال لنا في رعب وباحثا عن مكان اخر للاذبهلال دون ازعاج وعز يحاول استغلال الموقف واقناع كل الوافدين بشم تركيبته الجديده اما محمد فانهمك في نوبه عطس فريده من نوعها..بسبب الحسايه اياها..المؤسف انها كلها كانت في وشي....مش مهم كله يهون مقابل انتصارنا

=======

انتهت التجربه المنشودة..وانتهي وقت السكشن..وافاق مسرور من احلام اليقظة..وتوقف عز عن الجري ورا نا علشان يشممنا العينه ومحمد لم يتوقف عن العطس الا بعد السكشن بساعه عندما تاكد تماما ان الناس الوحشين الاشرار اللي اسمهم البنات مشيو من جمبه...ونها حاولت اقناعي انها لا ترتدي جوانتي ولكن عندما اسقط عز البرمنجنات علي يديها فشلت كل المحاولات المستميته في ازالتها حتي بعد تنازلها واضطرارها ان تجرب مستحضره الجديد ....الذي حول لون ايديها للبمبي المسخسخ

ومنه وجدتها تجلس القرفصاء في اخر السكشن تتمتم بعبارات غير مفهومه عن خطتها اللي ماعرفهاش و اللي هيه مقتنعه تماما انها مفيش فايده ومش حتتم



اما منال مجانينو......>خخ خخخ خخخ خخخخ خخخ خخخ سمعت انها نامت لسكشن اللي
بعده

No comments: