مِن رُوح صلاح الدين ومن دَم الحُسين
مِن قلب أوجَاع الوَلد
محفُور علي جبِين السنينْ
وْعَلي كل بيتْ
جُوا البلد
مَكتوب وَطن
مكتوب حِكايه صغيرة
كِبرت علي ادين الزمن
فارس ِمسك مُصحف ف إيد
وفْ إيد سِلاح
سهرانه عِينه ومِش حايغفلْ إلا
لو شَقشق صباح
دي حكاية..الشاطر حَسَن.
.كان الولد
حالف بإن الشمس حاتزور السما
والضَلمة حاتغيب انما
عمَّال بينده من زمن
طب ليه ماحدش مِنَّا بيلبِّي النِّدا
دا البذر محتاج يتروِي
علشان بشايرُه يفتَّحو
والجرح محتاج ينكِوي
علشان نطيِّب مطرحُه
دامفيش قضية بتتكسب من غير تمن
والشمعة لازم تتحرق علشان تطلع لينا نور
والحلم جوانا ابتدا...هز القلوب
وخسارة يرجع يندَفَن..
...ياعيون ولادنا اللي اترسم
جواها صيدا او بعلبك او صُوَر من شط صور
يادموع بناتنا
وأُمهاتنا الي اتفرش
بيها الجَنوبْ..حقِّك ماضاع
يادم ابطال البِقاع
تِقرب لأعمَار الزُهور
والليل يطول
لكن مسيرُة بينطفي
واحنا النَّهار
...جايين عشان ناخُد حجات
كانت من الاول ِلنا
صَحيين ورافضين نختفي
احنا الاساس نفضل هِنا
ولْحِد إيه مستَنيين
الأرض تيجي لعندِنا
واحنا اكتفينا بوشوشه
غُصن الزَّتون
عن عُمر ضاع من وسطِنا
ولإمتي راح يُصبر حسن
ياجْرُوح صلاح الدين وياهَمَّ الحسين
ياكُلّ أوجاع الولد
فاضل أمل
تشهَد علي قلوبنا السنين...يشهَد علي عيونَّا الزمن
حانقوم ويُخرج منّنا
مليون بطل
تكبر علي ادِيه الحِكاية وتكتمل
وحاتتكتب آخر فصولها بدمنا
وحاتتعرف بكره الحقوق حاتعود لمين
بالنَّصر للشاطر حسن
النَّصر للشاطر حسن....
No comments:
Post a Comment