Sunday, May 22, 2011

رسالة الي المجلس العسكري...إرحل

ًبداية ًاحب اقول ان الايام اثبتت ان مبارك لعبها صح لما سلم سلطتة للمجلس العسكري..لانه كان عارف انه سايب البلد في ايد(امينه ) هتعرف تمسكها زي ماكان هو ماسكها بالظبط..والا فما تفسير بعض المسبحين بحمد المجلس العسكري ومن قبله مبارك المخلوع ..
للتصرفات الصادره من المجلس العسكري واللي بقالنا 3 شهور بنفترض فيها حسن النيه لحد مالناس افتكرتنا هنود..
وطبعا علي سبيل المثال لا الحصر
اعتقال ناشطين في مظاهرات سلميه..المفارقه هنا اننا لم نشهد ولا حاله اعتقال لاي حد من بتوع انا اسف ياريس اللي كانو بيروحو مصطفي محمود.....مش غريبه شوية؟
تعذيب المتظاهرين في المتحف المصري..وما ادراكم ما المتحف المصري..الجيش نجح انه يغير نظرة الشعب للمكان ده 180 درجه..فبعد ماكان رمز لتاريخ مصر..اصبح رمز للتعذيب والكهربا والاهانه لكل الشباب والبنات اللي تم التحفظ عليهم بداخله..وحقيقة لا افهم ايه ممكن يدفع ظباط ف الجيش الي الكشف علي عذريه بنات في مظاهره..وتفرق ايه بالنسبالهم..او انهم يكهربو ويجلدو شباب .دا غير سيل السباب اللي كان بينهال علي مسامعهم..من جيشنا العظيم..وكل دا لانهم شباب طاهر قام بثورة علي الظلم والفساد وفوجئ ان كل اللي اتغير ف البلد..ان مبارك اتنقل من قصر العروبه لمنتجع شرم الشيخ...لا انجاز بصراحه.,
الحاجه التانيه اللي تنقط هي نفي نبره التخوين في رسائل المجلس العسكري..ونفس المصطلحات القديمة اللي شبعنا منها ايام النظام البائد(ولا باينه مابقاش بائد) ..مصطلحات زي مندسين..جهات خارجيه..البلطجيه..مثيري الشغب..ومجموعه من العبارات المطاطيه المبهمة بيحاولو يخوفونا فيها من خطر مش معروف مصدره بالظبط....واساليب مستحيل تكون صادره من نظام جديد مبني علي الشفافيه والصراحه
...وبعد مالمجلس قال انه لا يطمع في الوصول الي السلطه بدأت انباء غريبه عن جمع توقيعات لبقاء المجلس في الحكم..ياااااجمالو
والجمعه اللي فاتت كان فيه منشورات علشان الناس تطلع في مظاهره مؤيده للمجلس..وكأننا قبل 25 يناير...نفس الحركات البلدي المفقوسه والمحفوظة عن ظهر قلب..
الجديد ان الناس اللي كانت بتعبد الصنم مبارك..بعد ازاحته..حطو مكانه صنم المجلس العسكري..ودا مش صنم واحد المرادي للأسف
لما سمعت وشفت شهادات الناس اللي كانو في احداث سفاره الكيان الصهيوني..وسمعت ان عناصر من الجيش(مش الداخليه) كانت بتخلي الشباب ينامو علي بطنهم ويسبهم باقذع الالفاظ عشان هم شباب الثورة وبتتوعدهم بالتعذيب والاهانه ..سالت نفسي سؤال دايقني اوي...هو دا جيشنا فعلا؟؟؟..طب ياتري فين المجلس العسكري؟؟ وياتري عارف ان رصيده لدينا لم يعد يسمح؟؟
ياتري ماسالش نفسه احنا اتخنقنا ليه؟؟
هل مثلا لان سوزان ثابت تم الافراج عنها مقابل تنازلها عن ممتلكاتها اللي حسب الورق..لا تتجاوز ال 24 مليون دولار...ليه..احنا بنشحت؟؟ وايه تتنازل عن ممتلكاتها دي؟؟ هو احنا بلطجيه ثبتناها ومضيناها علي عقد بيع ف وسط الطريق؟...دي فلوسنا وعرقنا وشقانا ودمنا..
يعني سوزان وكل الحراميه دول وعلي راسهم الشيطان الاكبر مبارك..يتم التعامل معاهم بهذا التباطؤ المقزز..لكن المتظاهرين يتمسكو وتطلع عين اهاليهم احكام عسكريه.....ومبارك يسجل شرايط ويبعتها محطات بره تذيعها..والحياه بمبي ولا فارقه معاه..والراجل عنده ارتجاف اذيني ومحدش يزعله ..ونتنقط احنا بقي
وعلي الجهة الاخري تلاقي احداث فتنه امبابه..قبضو علي كام واحد ويقوللك مش هيتحاكمو عسكري...طب اشمعني..ولمصلحه مين
وازاي الجيش عرف يقتل ناس عشان يدافع عن سفاره الصهاينه
لكن ساب بلطجيه ومتطرفين (الله اعلم مين دافعهم) يقتلو ف مدنيين ابرياء ويولعو في كنيسه
لمصلحه مين الانفلات الامني اللي ف البلد؟؟
والفتن اللي بتولع الدنيا بسبب اشاعه مصدرها مشبوه او خبر هنا او هناك وتلاقي الدنيا ولعت
واحداث ماسبيرو اللي الجيش ماتدخلش فيها خالص؟؟
اه نسيت دا ماسبيرو مش عليه علم اسرائيل...
لمصلحه مين ان الشرطه ماتنزلش وتركب دماغها..وطبعا لا ننكر الدور الجبار لسعاده اللواء منصور العيسوي اللي انا مش عارفه هو عمل ايه لحد دلوقتي
وبرضه زي النظام السابق(اللي اشك انه سابق) يتبع معانا المجلس العسكري نفس الاسلوب القديم..انه يلهينا باي مصيبه تنسينا نفسنا وباقي مطالبنا..
خلصنا من الفتنه طلعلنا مشكله السولار..وكان المظاهرات هي السبب..دا علي اساس ان كل متظاهر بيشرب لترين سولار علي غيار الريق كده عشان يعرف يأدي ف المظاهره..
نسينا السولار يقولولنا دي مصر هاتفلس ف خلال 3 شهور...دا لو محل بقاله عمو ميجو اللي علي اول شارعنا..هاياخد وقت اطول من كده عشان يفلس ..وللاسف الناس البسيطه مش فاهمه..بقت تقدس الجيش وكأنه نبي مابيغلطش..ولو غلط..فهو معذور..
يامجلسنا العسكري..اسفه جدا الكلام ده كان زمان...
احسن لك..وللمؤسسه العسكريه وللبلد كلها
ارحل
ارحل وكفايه تخبط
وكفايه غموض
ارحل وخلينا نبني البلد بقي..ونعرف طريقنا من غير وصايه..زهقنا من دور الابوه ودور العالم بكل شئ اللي بيتحكم في حياتنا
زهقنا محاكمات عسكريه وتطرف وفتن وتهديد بالجوع وتخوين فينا
بجد رصيدكم نفذ لدينا ومفيش اي مجال لاعاده الشحن
لا الدوله المدنيه ولا الديمقراطيه هاتتحقق بالشكل ده
ولا يمكن ابدا تحت اي ظرف اثق في حاكم كان معينه الديكتاتور المخلوع في منصبه
مهما ادعي انه حما الثورة او غيره..
كانت فين حمايه الثورة طول ال 18 يوم؟
كانت فين يوم موقعه الجمل؟
كانت فين لما القناصه كانو بيقتلو شباب زي الورد قدامكو والبلطجيه بيهجمو علي المعتصمين ف التحرير
اسفين جدا
احنا ماخترناش المجلس العسكري ده
وبنرفضه
وبنطالبه انه يرحل
ا
ر
ح
ل

1 comment:

يا مراكبي said...

طيب ولما المجلس العسكري ده يرحل زي ما الناس بتطالب كده .. الدنيا هتمشي ازاي دلوقت؟

المشكلة ان اللي ايده في الميه مش زي اللي ايده في النار

وأي حد هيمسك المسؤلية دي هيكتشف قد ايه انها بجد تقيلة ورهيبة ومش بسيطة ولا سهلة كده

الدنيا مش هتتغير قفش كده مرة
ماحدش فاهم ان كل الأمور لازم تتغير بالتدريج
Overlapping