Tuesday, May 11, 2010

حالة كده ...





كالعادة باغطس كده كام شهر وبظهر فجأه في المدونه..


وكالعاده برضه بظهر ف اوقات غريبه اوي..يعني انا مثلا دلوقتي ف عز ايام الامتحانات الجمييييييله..ايه ده انت بتقول عز؟؟
بس حاسه اني لو مكتبتش اي حاجه هطق و اموت م الغيظ
اللي يفرس اني بقالي كتير جدا الحاله المزاجيه للكتابه عندي ف النازل ومش عارفه اكتب اي حاجه
فكميه الكبت اللي جوايا حاليا محدش يتخيلها
حاسه اني قطب موجب..بستقبل حاجات كتير..تفرح تدايق مش مهم..المهم اني مش عارفه اطلع اي حاجه جوايا
جربت اتكلم مع صحباتي..نخرج سوا.. . هم نص ساعة وبزهق...طب هتكلم ف ايه..ماهو الحاجات اللي خانقاني مش عارفه اقولها حاسه انها حاجات نصها مش مستاهل الكلام عنه ومجرد تراكمات والنص التاني مش عاوزة اتكلم فيه اساسا عشان هتخنق زياده
طب اعمل ايه انا دلوقتي :D
جربت اقرا..اهتم بحاجات جديده..اغير مواعيد نومي..اصاحب ناس جداد..اغير اكلي..نزلت اشتريت حاجات كتيييير....حتي اني بدات اذاكر..طب تخيلو اناااااا واعوذ بالله من كلمه
اناا..لما اذاكر دا معناه ايه..هو الملل وصل بيا للدرجادي
حاجه كمان ..غالبا هي نتيجه لمزاجي اللي زي الزفت
انا مباقيتش طايقه حد..الناس دلوقتي ف نظري كتله من القرف والغش والتلوّن...قال يعني انا اللي ملاك..طب ماهو انا برضه م الناس وبغلط..لييييه بقي منصبه نفسي عليهم قاضي وبقول مين حلو ومين وحش..مانا كده ابقي مقرفه ومتلونه برضه...اذن انا مش طايقه نفسي كماننننننن بالاضافه الي اني زي ماقلت سابقا مش طايقه الناس
جميل جميل
فيييييه حاجه غلط...اكرر..فيه حااااجه غلط..كمان مره..فييييييييييييييه حاااااااااااااااااااجه غلططططط

انا هتجنن

وبمناسبه الحاله الرائعه اللي انا فيها دي..

قريت النهارده قصيده تحححفه للشاعر علي سلامة..
حسيت اوي انها بتعبر عني


معرفش ليه تنحت للدنيا كده
وفجأه لقيتني مسكون بالملل
معرفش ليه..
لا عندي رغبه في البكا
ولا في الكلام
ولا عايز انام
ولا حتى بسأل ايه ده ايه
واخرتها ايه
و ايه العمل
حاله كده

وبخاف أقول لأي حد
أحسن يقوم يـقلبها جد
أو حد صاحبي ينزعج
يمد أيده جوه قلبه من باب الكرم
عشان يشاركني الألم
أو يستلـفلي مـ اللئيم حبه أمل
حاله كده
حاله كده ..معرفش أيه

ساعات تزورني في الشتا
في الربيع
في الحر وفــ عز الشتا
وتجيب حاجات ..
لا فيها روح ولا ميته
حاله كده
لا معاها ينفع كلمتين
ولا غنوتين
ولا لقطه من البوم صور
ألاقي قلبي في الهوا ويا الكور
وبخاف أقول لأي حد
أحسن يقوم يقلبها جد
حاله كده .. معرفش أيه
لكني برجع منها من بعد السكات
فاكر شويه ...
فاهم شويه في اللي فات
حاسس أوي بحضن الصحاب
محظوظ أنا ..
ساعات بشاور
يتـفتـحلي ألف باب
لكني برجع أغلط في الحساب
ومعرفش ليه
تنحت للدنيا كده
محدش يعرف ليه ينوبه فيا ثواب :(:(

3 comments:

يا مراكبي said...

ده تاني بوست أقراه بنفس المضمون
بس في مدونة تانية

الكتابة بتبقى زي الموجة بتصعد وتهبط
وانتي دلوقت في مرحلة اختزان .. لكن بعد كده هتيجي الفرصة وهتطلعي كل اللي جواكي ده

المهم عدم الاستسلام للحالة دي وتبدأي شوية شوية تحاولي تكتبي .. زي مرحلة التليين كده
:-)

Rosa said...

واضح انه فيرس وماشى فى الجو وكمان بيصيب البنات بشده
قولتى نفس الكلام اللى عاوزة اقوله
وابيات الشعر حلوه اوى
مدونتك جميله
وفى انتظار المزيد

آثمة said...
This comment has been removed by a blog administrator.