Sunday, February 14, 2010

انفلوانزا البني أدمين..من وحي الفالانتين


الاسبوع اللي فات كان كارثي بكل ماتحمله الكلمه من معني

فنتيجه الجو قارص البروده للي كنا فيه ده..((بغض النظر عن اليومين الحلوين اللي احنا فيهم دلوقتي))..كانت النتيجه الطبيعيه لامثالي من كارههي البلوفرات اني اصاب بالتهاب في الحلق خلاني معرفش اتكلم اصلا..

وعشان النكته تكمل كنت مضطره اتغلب علي الااااااامي واروح فرح واحده صحبتي..وانا سايلانت كده ودا ف نفس الوقت كان لحسن حظي لان كل صحبات العروسه كانو بيزغرطو وانا طبعا نظرا لظروفي معرفتش لكن مش دا السبب الوحيد..فانا اساسا مبعرفش ازغرط لكن طبعا مقلتش لحد واكتفيت بحجه زوري هههههههه فالحمد لله الحكايه دي حصلت عشان تمنع فضايح كتير

بعد الفرح قضيت ليله بشعه اخري لما فوجئت ان التعب بلغ بيا مبلغه وان بسبب كرتونه الاستربسلز اللي بلبعتها وياريتها جابا نتيجه بدات احس ان فيه عيال صغيره بتتنطط ف معدتي..شعور غبي بصراحه خلاني مش طايقه روحي ومش عارفه انام

قلت معلش

حاولت اتغلب علي كل ده وانام..ماهو انا محدش يقدر يقف قصادي ف النوم..لو مانمتش ال 15 ساعه بتوع كل يوم اتعب بصراحه..لازم اعوض ايام الذل بتاعت الامتحانات

صحيت الصبح وانا مش عارفه اخد نفسي..خير يارب..فوجئت ان الحاله اتطورت..وان التهاب الحلق انضم ليه زكام

واختفي حرف الميم من حياتي وتحول الي باء واصبح صوتي اشبه بصوت يوسف شعبان في مسلسل الضوء الشارد..الامر اللي دفعني اني اتوقف تماما عن الرد علي اي تليفون حفاظا علي مشاعر الناس اللي بتتصل..دا غير انهم كتير اوي كانو بيفتكرو انهم اتصلو بنمره غلط او يقولولي..حضرتك مين(بفتح التاء)

كانت المشكله التالته لما اعلن بابا اننا رايحين معرض الكتاب..قلتله وانا مدهوله تماما من اثر الادويه..

تاليستشلهعلاسشليسشالينتسلينشتسليش7هع

؟؟؟؟؟؟؟

ترجمت له اختي معاناتي وقالت له

بتقوللك هو لازم اروح معاكو..انا تعبانه جدا

قاللي ايوة لازم لان المعرض هيخلص بعد تلات ايام تقريبا وانا مش هفضي بعد كده

عدت لاقول له:

نتالتنيلنتالاتببيبلسثسث

((ماتروحو انتو وسيبوني))

قاللي براحتك بس انا كنت فاكرك عاوزة تشتري الكتب اللي كنتي بتدوري عليها ومستنياها طول السنه

امري لله

رحنا القاهره واللي حصل هناك يحكي في بوست اخر علشان مايكفيهوش البوست ده بصراحه

بدات احس اني تعبانه فعلا وسخنه دا غير اني من كتر الزكام.((اختي الله يساااامحها اشترتلي مناديل مصنوعه من جلد التماسيح تقريبا هههههههههههههه.))..اصابتني بالتهابااات بششششعه في بقي ومناخيري ..بقيت بخاف ابص للمرايه لحد دلوقتي بسببها

حاولت اتغاضي عن كل ده..صحيح عندي خطوبه واحده صحبتي كمان ايام بس اتعشم ان كل ده يكون راح وقتها ..

بس ازااااي..صحيت النهارده احسن الحمد لله

بس خير اللهم اجعله خير ببص ف المرايه

لاقيتني طلعلي بق تاني جمب بقي

ببص كويس

عااااااااااااااااااااااااااااااااااااااااااااااااااا

وكنتيجه طبيعيه لاي دور برد يحترم نفسه..واستكمالا لمسلسل التشوه..جالي هربس لطيف اليف مؤؤؤلم جداا تاني..الامر اللي خلاني للمره التاني افقد القدره مش علي الكلام بس لكن وحتي الاكل...

باقي من الزمن اقل من يومين ع الخطوبه وانا بهذه الحاله التي يرثي لها..اضيفو لكده نوبات الكحه اللي ظهرت فجاه كاني اسطي قديم في الشيشه..لا تنسوا تشوهات المناديل اياها..

انا دايما متعوده قبل اي مناسبه يحصللي حاجه لذيذه كده..قرصه نموسه ف مكان واضح ف وشي..حبايه غلسه تطلع بدون سبب..تعويره ظريفه تزين جبهتي..لكن اللي حصل ده كله..كتير عليا والله :D

اللي لفت نظري اكتر ان اصعب حاجه واجهتها ف دور البرد الخرافي ده مش اعراضه..والله اعراضه تهون وكبيرها قرص بنادول..لكن تبعات الدور هي اللي عجيبه شويه هههههههههههههه ربنا يستر بقي وماصحاش بكره كمان الاقي حاجه تاني..مانا اتعودت طول الاسبوع

الي فات اني كل ماصحي الاقي تغيير جذري ههههههههه

انا عارفه ان كل الكلام العاتشيفي اللي قلته فوق دا مالوش اي علاقه من بعيد او قريب بالفالانتاين اللي مااخدتش بالي انه النهارده الا من ساعات قليله..وماهانش عليا اسيب المدونه فاضيه كده وبتنش..حتي مايصحش
:D
كل سنة وانتو طيبين..يلا عشان متقولوش حارماكو من حاجه
المهم بس
دعواتكو كحححححكححححححكححح..ليا كح كح بالشفاء العاجل كححححح
تحديث..


صحيح..استكمالا لمسلسل التشوهات اللي حصل لي..
امبارح تعرضت لحادث مؤسف كان نتيجه ليه اني اتعورت ف جفني..ودلوقتي صحيت م النوم والمنظر مش لطيف بالمره ههههههه مع العلم ان الخطوبه بتاعت صحبتي النهارده..انا بدات احس ان الخطوبه دي نحس عليا..واني لو اصريت اروحها ممكن ينزل نيزك ولا حاجه او تحصل اي كارثه ههههههههه بجد انا اتعقدت اعمل اييييييه انا خايفه ابص ف المرايه

3 comments:

يا مراكبي said...

يا سلام على البوست اللي كله رومانسية .. أحلى بوست قريته عن الفلانتين بصراحة

:-)

عموما ألف سلامة عليكي وإوعي تكون أنفلوانزا خنازير .. أخاف أكتب كومنت اتعدي

:-)

بس غريبة انك رحتى معاهم معرض الكتاب من غير تردد كبير المرة دي

!!

سلسبيل said...

يامرااااكبي..بجد والله منور
شفت بقي ماسورة الرومانسيه اللي غرقت المكان..عشان بس زي ماقلت مش عاوزة احرم حد من حاجه
وبعدين متخافش..مش انفلوانزا خنازير..هي تقريبا نوع جديد من الانفلوانزا متخصص ف حاجات تانيه مالهاش اي علاقه بالانفلوانزا العاديه هههههههه
وف الحقيقه انا مستغربه اكتر منك اني رحت المعرض المرادي من غير ما اتردد ولا ازن كل شويه عشان عاوزة امشي من هناك ولا اي حاجه..بس لما فكرت كويس اكتشفت ان دا كان فرمان سلطاني..وانا عارفه سقف سلطتي ف البلد دي..ههههههه وطالما بابا قال رايحين يبقي رايحين...
:)

sal said...

ما دام كتبتى البوست الحلو ده
تبقى خفيت والحمد لله
الف سلامة
تحياتى