الطول هيبة والقصر خيبه .....واحترس من كل من اقترب من الارض...مي العبي عقله
كلمات بتتقال ليا كتير مع اني مش فاهمه ايه اساسها العلمي.. ولازم اللي يقولها ف وشي من اصحابي يختمها بضحكه شريرة من طراز نيهاهاهاها...
وكأني مثلا بمزاجي اطلع قزعه هههههههههه او يعني بابا وماما استوردوني م الصين وهما اهلهم استوردوهم من ارض العماليق
اللي يغيظ ان حظي دايما بيوقعني ف اصحاب اطول مني بمسافه محترمه
حتي صحبتي الانتيم اطول مني وبنمشي جمب بعض شبه ال عشرة طبعا هيه الواحد وانا الصفر المحترم
واللي يغيظ انها تعتبر اقصر اصحابي..كل الباقي اطول منها بمراحل
لو حصل لا سمح الله وقررنا نخرج سوا..او عشان الاحراج يكمل نتقابل سوا ف بيت واحده مننا وباباها ولا مامتها يدخل يسلم علينا..يفتكر ان حد منهم جابت اختها الصغيره اللي ف تالته اعدادي مثلا واسمع عبارات من طراز..مين الكتكوته دي يا بنات..انتي ف سنه كام ياشطورة...لحد مابتتدخل واحده بنت حلال علشان تكشف الغطا عن السر الخطير اني ف تانيه كليه وينفجر الكل ف ضحك هستيري وينفجر وشي من كتر الدم اللي طلع فيه
اما عن زمايلنا الصبيان فحدث ولا حرج...
هوه ده الاحباط بعينه والشعور بالاستبحس كما يجب ان يكون
واحد منهم مثلا اطول مني بتلاتين سنتي..يعني مسطره م النوع الكبير هوه ده الفرق ف المسافه بينا
المنظر من بعيد لو حد شافه واقف بيكلمني انا وصحباتي وانا ف النص زي عيش الغراب اللي كان نصيبه انه يطلع جمب شويه نخل
المشكله بقي ان كل القصيرين اللي اعرفهم بيحلو المشكله ببساطه وبيلبسو كعب عالي ويبانو زي كل خلق الله
انا بقي اللي مخي متربس عالفلات
المره الوحيده والاخيره اللي جبت فيها بوت بكعب وساعتها كنت حاسه انه مش بوت عادي لا دا فكرني بالكرسي اللي كان ملاك بتاع وجهه نظر بيقف عليه...و كان لازم لما امشي بيه ف الكليه واحده صحبتي تمسكني م اليمين وواحده تمسكني م الشمال لاني كنت بتكعبل ف خيالي ولو راحو ف حته وسابوني احتاس ويبقي موقف محترم هههههههههههههههه
الغريبه ان الكل متدايق م الحكايه دي ا لا انا فرحانه اوي بطولي احم اقصد قصري
هوه صحيح متعب شويه
عشان لو تخنت لاقدر الله حابقي شبه المربع..ولو فضلت زي مانا بيقولو عليا ماديليه مفاتيح
لكن برضه شعور حلو ان الواحد يحس انه عامل زي فاتن حمامه زمان ماهي كانت قصيرة وصغنتته برضه
بس تقول لمين ..دول ناس اولد فاشون اصلا...طب دا حتي الموضه اليومين دول الناس القصيرين ..دا غير اني اكتشفت ان ليهم شويه مزايا
مابياخدوش قماش كتير لو بيفصلو لبس
لو بيشترو لبس من بره حايقصروه والقماش الفاضل ممكن يعملو بيه اي حاجه لانه حايبقي كتيرا وي اوي
اسالوني انا يعني
ممكن لو الاهل عندهم تلات او اربع عيال قصيرين ينيموهم علي سرير واحد..بالعرض وبكده يبقو وفروا كتير
اي حد قصير عمره مابيعاني مع اي حاجه بتخبط ف السقف ودا المشكله اللي بيعاني منها ناس طوال كتير
لو ليهم اخوات طوال مش حايقدرو يستلفو منهم لبسهم عشان قصير عليهم ..ومش حايتخانقو مع بعض
مافتكرش فيه احسن من كده بقي
...انا واثقه ان اي حد طويل بيقرا الكلام ده..
زمانه قاعد يعيط يعيط ويقول ياربي انا ليه طلعت كده...يابختك يامي